Работа Воспитателей
опыты и эксперименты (младшая, средняя, старшая, подготовительная группа)

Оскуолаҕа киириэн иннинээҕи саастаах оҕолору төрөөбүт төрүт тылга уһуйуу.

Оҕо кыра эрдэҕиттэн төрөөбүт тылын барҕа баайын, төрүт тыл сүмэтин иҥэринэригэр бэйэтин норуотун үгэһин билэн – билсэн улаатарыгар биһиги уһуйааммыттыгар элбэх, үгүс үлэ ыытыллар. Биһиги 2015 сылтан сахалыы хайысхалаах уһуйаан буолан үлэлии – хамныы сылдьабыт. Төрөөбүт ийэ тылы, норуот үйэлэргэ мунньубут үгэстэрин, фольклору үөрэтиини билиһиннэрэр сыалтан оскуолаҕа киириэн иннинээҕи саастаах оҕолорго “Тосхол” бырагыраама – саҥа кэрдиис кэмэ” босуобуйанан үлэлиибит.                            Уһуйааммытыгар тыл сайдыыта диэн дьарыкпыт нэдиэлҕэ иккитэ ыытыллар. Онон сиэттэрэн оҕону толкуйдуурга, кини айар дьоҕурун, талаанын аһарга, сайыннарарга, төрөөбүт тыл сүмэтигэр уһуйарга сүрүн миэстэни “Сыккыс” диэн куруһуокпут үлэтэ буолар. Куруһуокпугар оҕолору бөлөҕүнэн арааран, ыйдарынан аттарыллыбыт «Саха оҕото – омук кэскилэ» - диэн анал былаан оҥостон үлэлиибит. Куруһуокпут нэдиэлэ аайы буолар. Хас нэдиэлэ аайы тус – туспа темалаах дьарык ыытабыт. Дьарыкпытыгар араас хабааннаах эрчиллиилэри киллэрэбит сөпкө тыыныыга, интонацияҕа, дикцияҕа, сөпкө хамсанарга, туттарга – хаптарга уо.д.а. эрчиллиилэр.                                                                                                                              Норуот тылынан уус – уран айымньыта үгүс такайыыта суох оҕону кыра сааһыттан сиэрдээх быһыыга – майгыга иитэр үчүгэй өрүттэрдээх, олору туһанан оҕолорго үөрэтии улахан оруолу ылар. Куруһуокпутугар фольклор жанрдарын кытта билиһиннэрииттэн саҕалаан хоһооннору, таабырыннары, норуот остуоруйаларын, оһуохайы, сахалыы музыкальнай инструменнарга оонньуурга, сахалыы оонньуулары, олоҥхону үөрэтэбит. «Олоҥхо – олох оскуолата» диэн мээнэҕэ эппэттэр. Оҕолорбут олоҥхону наһаа интириэһиргээн, сэргээн истэллэр. Олоҥхо тыла – өһө баай, ойуулааһына элбэх буолан, оҕолорго аан бастаан кэпсээн курдук кэпсиибит, ыарахан тыллары быһааран биэрэбит. Онтон өйгө үөрэтии кыра олуктартан саҕалаан баран, интонациялаах ааҕарга үөрэтэбит, дьарыктыыбыт. Үөрэппит айымньыларбытын мэлдьи хатылата сылдьабыт.                                                                                  Ити курдук биһиги уһуйааммыт  оҕолоро оройуонҥа, республикаҕа ыытыллар күрэхтэргэ көхтөөхтүк кыттан иһэр уонна бу ситиһиилэринэн тохтообокко өссө саҥа хайысхалары туһанан иитэ – үөрэтэ, үлэлии – хамсыы туруохпут.                                                                                              Төрөөбүт төрүт тылбытын таптаан, харыстаан илдьэ сылдьарга бары кыһанабыт.

Муома улууһа, МБОУ «МНОШ»                                                                                                                                           - дошкольная группа «Кэскил»                                                                                                                      Иитээччи: Ильина А.В.