сочинение по теме « Охранять природу – значит охранять Родину».

« Охранять природу – значит охранять Родину».

                               М.М.Пришвин

       Абон тынг ахсджиаг фарст ӕвӕрд цӕуы ӕрдз бахъахъхъӕныны фӕдыл. Ӕнусты дӕргъы адӕймаг йӕ  ӕнӕрхъуыды архайдӕй  фехӕлдта йӕ цӕрӕнбынат, дыууынӕм ӕнус та сси экологион бӕллӕхты рӕстӕг.

       Райгуырӕн бӕстӕйы рӕсугъддзинад, фыды уӕзӕгмӕ уарзондзинадыл кады зарджытӕ кодтой ӕмӕ кӕнынц бирӕ фысджытӕ ӕмӕ поэттӕ. Уыдонӕй сӕ иу у Михаил Михаилы фырт Пришвин, диссаджы адӕймаг, уӕлмонцӕй ӕрдз чи уарзта, ахӕм. Цыма йӕ намысыл кадджын зарӕг кодта, афтӕ йыл фыста.

    «Кӕсагӕн – дон, маргъӕн – уӕлдӕф, сырдтӕн – хъӕдтӕ, уыгӕрдӕнтӕ, тыгъдбыдыртӕ, хӕхтӕ.Адӕймаджы та хъӕуы Райгуырӕн бӕстӕ. Ӕрдз хъахъхъӕнын нысан кӕны Райгуырӕн бӕстӕ хъахъхъӕнын», - загъта фыссӕг. Нӕ зонын, исчи ма зӕгъдзӕн ӕрдзы тыххӕй тыхджындӕр ӕмӕ растдӕр. Ацы дзырдтӕ сты ӕппӕты хуыздӕр ӕмӕ рӕстдзӕфдӕр ныхӕстӕ ӕрдзы нысаниуӕджы тыххӕй нӕ царды, кӕй йӕ хъӕуы уарзын ӕмӕ хъахъхъӕнын, куыд Райгуырӕн бӕстӕ, афтӕ.Зӕрдыл дарын хъӕуы, удыгас дуне ӕмӕ адӕймаг ӕрдзы хъӕбултӕ кӕй сты, уый, ӕмӕ йӕм нӕ хъус куы нӕ дарӕм, куы нӕ йӕ хъахъхъӕнӕм, уӕд амӕлдзӕнис, уыимӕ иумӕ та фесӕфдзӕнис ӕппӕт цардӕгас дуне дӕр.

    Пришвин йӕ цӕрӕнбонты  ӕрдзимӕ баст уыдис. Уарзта хъӕд ӕмӕ ӕппӕт цардӕгас дуне, ахуыр нӕ кодта райгуырӕн зӕхх уарзын, хъахъхъӕнын ӕй ӕмӕ нӕм сидтис: «Мах стӕм ӕрдзы хицӕуттӕ, ӕмӕ нын уый  у хуры къӕбиц царды стыр хӕзнатимӕ.Уыцы хӕзнатӕ та хъӕуы куыд хъахъхъӕнын, афтӕ раргом  кӕнын дӕр ӕмӕ равдисын дӕр».

   Пришвины радзырдтӕ куы кӕсай, уӕд дӕм афтӕ кӕсы, цыма дын фыссӕг дӕ къухыл ныххӕцыд ӕмӕ дӕ йӕ фӕдыл хоны, ӕмӕ дӕхи цӕстытӕй уыныс,цы ныффыста, уыдон. Ноджы тынгдӕр  дӕ фӕнды уарзын ӕмӕ ӕмбарын райгуырӕн ӕрдз.

      Йӕ уацмысты нӕ автор  зонгӕ кӕны ӕрдз ӕмӕ цӕрӕгойты диссаджы дунеимӕ. Зӕгъӕм, «Кладовая солнца»-йы равдыста ӕрдз ӕмӕ адӕймаджы гармониджын бастдзинады тых. Нымадта, мах кӕй цӕрӕм,егъау хӕзнатӕ кӕм ис, ахӕм диссаджы дунейы. Адӕймаг, зайӕгойтӕ,цӕрӕгойтӕ, зӕхх ӕмӕ йӕ хуылфы иудзинадыл куы ахъуыды кӕнай, уӕд дӕ дисы ӕфтауы канд ӕрдзы куырыхондзинад ӕмӕ бирӕхуызонад нӕ, фӕлӕ ма  йӕ ӕнахуыр ӕнӕрцӕфдзинад  адӕймаджы раз.

     Пришвин йӕ иннӕ радзырд «Сыгъзӕрин уыгӕрдӕн»-ы та чиныгкӕсджыты  зонгӕ кӕны дыууӕ лӕппуимӕ. Уыдон фыццаг нӕ уыдтой хуымӕтӕг дидинӕг къаппа-къуппайы рӕсугъддзинад, фӕлӕ фӕстӕдӕр сӕ иу ӕнӕнхъӕлӕджы бафиппайдта, куыд диссаг сты, уый.Ӕмӕ уӕд лӕппутӕм фӕзынд ӕндӕр цӕстӕнгас уыцы диссаджы хуымӕтӕг дидинджытӕм.

       «Ӕрдзӕн йӕ бон куы уаид адӕймагӕн арфӕ кӕнын, ӕрмӕстдӕр йӕ царды кӕй бахызт ӕмӕ йыл зарджытӕ кӕй скодта, уый тыххӕй, уӕд уыцы арфӕ фӕуыдаид Пришвины хай», - афтӕ нымадта Константин Паустовский.

    Иу ӕмӕ дыууӕ хатты нӕ загъдӕуыд, зӕгъгӕ, адӕймаг ӕрдзы паддзах нӕ, фӕлӕ йӕ ӕнӕхицӕнгӕнгӕ  хай кӕй у, уый.Уыцы цӕгтӕй искӕцы куы амӕлы, уӕд мӕлынӕй тӕссаг у се ‘ппӕтӕн дӕр. Мах хъуамӕ хъахъхъӕнӕм, нӕ фыдӕлтӕ нын цы хӕзнатӕ ныууагътой, уыдон: зӕхх ӕмӕ дон, уӕлдӕф ӕмӕ зайӕгойты. Ӕрдзимӕ гармонийы куы цӕрой адӕм, уӕд алкӕй уды дӕр уыдзӕнис сабырдзинад. Мӕн уырны…