Минем иҗат чишмәм

  Карчәчәк  булыр идем...

Күк  гөмбәзеннән  очучы

Булыр  идем  кар-бөртек.

Салмак  кына төшәр идем-

Алырлар иде  көтеп.

           Кояшның  шаян нурында

          Төшәр  идем  җемелдәп.

          Бәлки   миннән кыш  бабай да

          Куяр  иде   бәс  эрләп.

Тузгак  җилнең  көйләренә

Вальс    та биер идем.

Буран  балга  дип эндәшсә,

Анда   да  килер идем.

                     Зәңгәр күкне иңләр  идем,

                     Йөзәр  идем  туйганчы.

                     Күзәтермен   бар җиһанны

                    Җиргә  төшеп  кунганчы.

Бизәгем  дә гади булмас-

Челтәрләре   укалы.        

Мондый матур   карчәчәкнең  

Туганы  да юк әле.

                    Кая кунар идем икән?-

                    Таптым әле  серен дә:

                    Эресәм  дә сулышыңнан...

                     Кунам  синең  иренгә.

                                                   Лилия   Нәкыйпова

                Кәгазь   пәрәвәзе

               Көннәр сизелми дә үтә,

               Кәгазь  эченә  чумып.

               Җыеп-актаргалап карыйм,

              Тәртип ясамак  булып.

     Кәгазьләрем-бар байлыгым,

     Катлам артса, сөенәм.

     Әрдәнәсе  чуалып китсә,

     Борчылам да,  көенәм.

            Калын-калын томлыкларым-

            Хезмәттән туган  эзләр.

            Безнең кавем шундый  инде:

            Ак биткә уйный күзләр!

 Тәртиплим дип тотынам да,

 Тузаннарын сөрткәләп,

“Бар да кирәк икән”,-диеп,

 Кире өям төрткәләп.

            Папка-папка кәгазьләрне

             Бик  кадерләп җыябыз.

            Берәр бите  юкка чыкса,

            Акылны да җуябыз.

 Бирнәләрем белән тулык:

 Шкаф, чорма, өй асты.

 Кәгазь  пәрәвезе  сырды

 Безнең  бу исәр башны.

           Кәгазь белән түшәккә аву,

           Кәгазь  беләм  уяну.

           Арынып булмасмы икән,

           Табып  бирегез...  дару.

                              Лилия   Нәкыйпова

                                       2015

                                          Әгәр миңа ат бирсәләр,

                                          Атланыр идем мин дә.

                                              Лилия Гарифуллина.

            Кирәкми аты

Әгәр миңа ат бирсәләр,

Атланып булмас.

Тәвәккәллек җитеп бетмәс-

Яшь тә  бар бераз.

       Уйландыдыр: каян миңа?

       Нигә бирәләр?

       Тәбедә генә була бит

       Бушлай  бирнәләр.

Аты тагын нинди була?-

Көчле   дуласа?

Сикергәләп, тибенгәләп,

Җиргә сыласа?

    Авызлыклыйм  дигән чакта

    Кулны тешләсә?

    Башын чайкап, башын болгап,

    Яман  кешнәсә?

Ни әйтерсең атны сорап,

Кире килсәләр?

“Инде тае туган булырга

Тиеш”,-дисәләр.

      Алып тормам, гаепләрләр-

      Табарлар җаен.

     “Сыртын  сындыргансың”,- диеп,

     Булмаган тайның.

                            Лилия Нәкыйпова

                                               2015

Мин укытучы булмасам,

Нәселгә тап төшәр күк.

Әти-әнием һөнәре

Миңа каннан күчәр күк.

Гаиләбез эзләре буйлап

Мин үскәч барачакмын.

Теләсәгез ни әйтегез-

Мөгаллим булачакмын!