Бәрлебашы авылында күпфункцияле үзәк ачылуга әле ярты еллап кына булса да, шушы кыска гына вакыт эчендә биредә “Мизгел” театры оешты. Алай гына да түгел, инде гастрольләргә дә йөри башладылар. Үзәк методисты, театр җитәкчесе Гүзәл Өметбаеваның ялкынланып эшләве әллә каян сизелеп тора. Чөнки биредә авыл халкы, яшьләр катнашында әледән-әле төрле мәдәни чаралар үткәрелә, Казан артистлары да концертлар куя, кыскасы, авылдашларының ялын оештыруга җитди карыйлар.
