Тәрбия эшчәнлеге
Предварительный просмотр:
Белем бәйрәме – 2014 сценарийе. Күәм урта мәктәбе.
Зал бизәлгән, әзер укучылар алга тезелгән.
Җыр “Бүген белем бәйрәме”.
Организатор. Исәнмесез, укучылар, укытучылар, хөрмәтле әти-әниләр, мәктәбебез кунаклары. Менә 2014 елның беренче сентябрь көне дә килеп җитте. Барыбызның да сау-сәламәт килеш яңадан бергә җыелуыбызга куанып бәйрәм белән котлау өчен сүзне әзерләнгән укучыларга бирәм.
Зөһрә Хисм. Исәнмесез, хәерле көн дуслар!
Саумы мәктәбебез, көттеңме?
Балаларым кайчан килер, диеп,
Зарыгып та инде беттеңме?
Булат Шиһ. Шау чәчәккә батып безне бүген,
Каршылыйсың газиз мәктәбем.
Хезмәт белән дәрәҗәсе көн дә
Югарыга менә Әтнәмнең.
Энҗе Абд. Дөрестән дә безнең районыбыз
Республикабызда алдынгы.
Мәгариф тә авыл хуҗалыгы
Белән бергә атлап барырмы?
Айназ Хаб. Ә анысы аның бездән тора,
Без тырышып әгәр укысак,
Укытучы әйткән һәрбер сүзне
Зур игътибар белән тыңласак...
Гөлгенә Фаз. Хәзерләсәк һәркөн дәресләрне
Иренмичә шигырь ятласак,
Республика конкурсларында
Казан юлын әгәр таптасак.
Гөлия Ган. Бердәм дәүләт имтиханнарын
Без тапшырсак әгәр бишлегә,
Бар яктан да уңыш процентлары
Туры килер фәкать йөзлегә.
Рәмис Сир. Ә былтыргы күрсәткечләребез
Начар түгел, барлык унберләр
Имтиханны әйбәт кенә биреп
Уку йортларына керделәр.
Энҗе Садр. Укуда да, спорт-хезмәттә дә
Мактанырлык безнең уңышлар.
Дипломантлар һәм призерлар булдык
Узган бик күп бәйге-ярышта.
Организатор. Былтыргы уку елын өр-яңа итеп үзгәртелгән, капиталь ремонт ясалган мәктәбебездә башлап җибәрсәк, быелгысында тагын бер зур яңалык – без зарыгып көткән асфальт юлдан килдек бүген мәктәбебезгә. Димәк, хөкүмәтебез, укучылар, сез тырышып укысын өчен, без укытучылар тырышып укытсын өчен барлык шартларны тудыра, моның өчен миллионнарны сарыф итә. Шулай ук күз алдыбыздагы спорт-уен мәданчыгы да моңа бер дәлил булып тора.
Җитәкчедән тора белегез.
Дөрес итеп эшне оештыргач,
Ярдәмләшеп эшләп йөрибез.
Һәр баланың чәч бөртеге саен,
Җаваплылык сезнең җилкәдә.
Хәмит абый, сезнең уйчан караш
Каршы ала һәрбер иртәдә.
Котлау өчен сүз бирелә мәктәбебез директоры Хәкимҗанов Хәмит Газим улына.
Директор чыгышы.
Зөһрә Хисм.Районыбыз авыл хуҗалыгы
Өлкәсендә хезмәт башкара.
Президент та үрнәк итеп куя
Безнең Әтнәбезне башкага.
Хакимият халык өчен яши,
Безнең мәшәкатьне барлыйлар.
Яшь буынга шартлар тудырыйк ди,
Райондагы апа-абыйлар.
Организатор.Бүген безгә район кунагы булып ................................................................-................................................................................................................ җитәкчесе ............... ............................................... ...................................... ......................................... улы килде. Аның безгә нинди әйтер сүзләре бар икән, әйдәгез тыңлап үтик.
Район вәкиленең чыгышы.
Колхоз кешесе чыгышы.
Организатор. Укучылар, мәктәп бусагасын атлап кергәнче сез барыгыз да балалар бакчасында тәрбияләндегез. Иң беренче булып, җөмләләрегезне матур итеп әйтергә, бармакларыгызны бөгеп санарга, буяу карандашлары тотып буярга, пластилиннан аюлар, бүреләр әвәләргә сезне тәрбияче апаларыгыз өйрәтте. Бүген алар исеменнән сезне бәйрәм белән котларга Гөлнар апагыз кергән. Әйдәгез әле, сүзне аңа бирик.
Фазылҗанова Гөлнар чыгышы.
Организатор.Белем бәйрәменә, улларын-кызларын беренче сыйныфка укырга кертү максаты белән әти-әниләребез дә килгән. Аларның тәрбияче апаларга һәм мәктәбебез укытучыларына нинди әйтер сүзләре бар икән, Ильярның әнисе Рәзинә апагызны тыңлап үтик әле!?
Әниләр исеменнән Ахмадуллина Рәзинә чыгышы.
Энҗе Садр.Кичә генә минем Зөһрә сеңлем
Курчак уйный иде бакчада.
Менә инде бүген вакыт җитте
Мәктәп бусагасын атларга.
Ак алъяпкыч, матур күлмәк киеп
Белем дөньясына керегез.
Хәреф күле, саннар диңгезендә
Батмый, колач салып йөзегез.
Организатор. Быелгы уку елында безнең мәктәп бусагасын тәүге тапкыр җиде укучы атлап керә. Беренче сыйныфлар да матур-матур шигырь куплетлары әзерләп килгәннәр, сүзне аларга биреп карыйк әле.
Беренче сыйныфлар чыгышы.
Булат Шиһ.Иң беренче укытучыларны
Искә алып сөйли даһилар.
Чөнки меңнәр, хәтта миллионнар
Алар сызган юлдан атлыйлар.
Ничә тапкыр инде нәниләрне
Бергә кабул итеп алдыгыз.
Люция апа безнең өчен һәрчак
Шундый сабыр булып калыгыз.
Организатор.Баланың күңеле ак кәгазь белән бер. Ә беренче укытучы шушы аклыкны беренче саннар, хәрефләр һәм җөмләләр белән тутыра. Шулай ук, баланың меңләгән соравына, аның аңына барып җитәрлек итеп җавапларын биреп, дөньга карашын формалаштыра башлый. Бу хезмәтнең никадәр авыр, никадәр җаваплы икәнен бары тик башлангыч сыйныф укытучылары гына белә. Яңа укучыларына һәм әти-әниләргә үз фикер-теләкләрен җиткерү өчен сүз Люция Фәезхановнага бирелә.
Ганиева Люция сөйли
Энҗе Назм. Ун ел элек без дә сезнең кебек
Чәчәк тотып нәни кулларга.
Зур игътибар белән аптырашып,
Карап тора идек зурларга.
Зөһрә Мурт. Хәтеремдә кулга каләм тотып
Тәүге хәрефләрне тезгәнем.
Апа дөресме дип дәфтәремне
Укытучыга алып килгәнем.
Илшат Ваф. Бер урынлы санны кушып-алып
Атлап кердек белем иленә.
Инде безгә элек буй җитмәстәй
Имтиханның тавы күренә.
Энҗе Назм. Иң җаваплы ел бу безнең өчен
Бер минут та узмас әрәмгә.
Соңгы беренче кыңгырау чыңлаганын
Тыңлыйк диеп килдек бәйрәмгә.
Зөһрә Мурт. Сезнең өчен нәкъ тә унбер тапкыр
Чыңлап дәшер ел да дәрескә.
Укыгыз сез вакытның кадерен белеп,
Безнең кебек дүрткә һәм бишкә.
11 ләр 1ләргә ӘЛИФБА тапшыралар.
1 классалр җыры “Без инде хәзер зурлар”
Организатор. Беренче кыңгырау чыңнары
Яңгырасын залыбыз түрендә.
Яшәсен чын дуслык, иминлек,
Тынычлык илебез күгендә.
Музыка фонында Муртазина Зөһрә Ахмадуллин Ильярны җитәкләп кыңгырау чыңлатып залны әйләнәләр. Барысы да кереп китәләр.
Организатор. Хөрмәтле укытучылар, укучылар, бәйрәмебез кунаклары. Әзерләнгән белем бәйрәме ахырына якынлашып килә. Хәерле сәгатьтә, төкле аягыгыз белән беренчеләр! Тазалык, саулык һәм сабырлыклар сезгә укытучыларыбыз!!!