Тукайлы милләт

Тукайлы милләт

Язлар безгә бүләк итте аны,

Язлар алып китте кинәттән.

Шундый гади, асыл зат туган

Кимсетелгән бөек милләттән.

Кимсетелсә, изелсә дә халык

Саклый белде иман, калебен,

Шуңа туды : Тукай, Җәлил , Туфан...

Белик кенә алар кадерен.

Милләт өчен җанын биргән алар,

Милләт өчен көн-төн көрәшкән.

Корал түгел ныклы кулларында

Үткен каләм,  чиста ак дәфтәр.

Тукай әйткән: “Син каршымда

Бар нәрсәдән изге һәм хөрмәтле”;

Булса иде һәрбер кардәш өчен,

Җандай якын татар милләте.

Күз сал әле Былтыр, Шүрәлегә,

Су анасы барын онытма!

Син дә кардәш, татар милләтенең

Тамырларын берүк корытма!