Гаврил Семенович Самсонов – Герой Социалистического Труда – руководитель пришкольного опытно-семенного участка

Үлэһит үтүөтэ кымырдаҕас

Кырыа кыһын кэлиэ диэн,

Аччыктаан өлбөт кыһалҕаттан

Бэйэтинээҕэр улахан

Дьаабылака тооромоһун булан

Хаһаас гынан уурунаары

Дьарамай көхсүгэр сүгэн

Дьиэлээн иһэн,

Тэтэркэй сибэкки эминньэҕэр

Дьэрэкээн солко кынатынан

Сапсынан ыла-ыла

Кэрэчээн лыах олорорун

Сөбүлүү көрөн эппит:

«Кыраһыабай да лыаххын

Нарыныҥ-намчыҥ да бэрт.

Көҥүллээ, мин эйиэхэ

Эрэллээх доҕор буолуохпун.

Кыһалҕалаах кэмҥэр

Куруук көмөлөһүөм.

Ыҥырдаргын эрэ

Мэлдьи аттыгар баар буолуом», - диэн.

Онуоха туран лыах

Кымырдаҕаһы үөһэттэн көрөөт

Күлүү-элэк гынардыы

Сирэн саҥа аллайбыт:

«Быакайа сытыйан хараҕыан!

Нүксүллэн түһэн бүрэҕиэн!

Ама, миигин бэйэҕиниин

Ханыылыы тутан саҥардаххыан?

Күн үтүөтүн билбэккэ

Үлэҕэ умса түһээхтээҥҥин

Аһыыр аһыҥ да баара

Аһыйбыт дьаабылака буолан

Пахай да!» - диэбитигэр,

Кымырдаҕас эрэйдээх

Кыһыылаах тыллартан

Кыбыстан хаалаахтаата,

Хомойон-хоргутан

Хорҕойор аакка түһээхтээтэ.

Кыра ычалаах лыах

Үлэһит үтүөтүн, бастыҥ майгылааҕы

Алҕас айахтаттым диэн

Аахайа барбакка,

Сиик таммаҕын

Сиэркилэ ньууругар

Үтүө дьүһүнүн көрүнэн үтүгэмсийдэ.

Ол кэннэ

Өрө көтөн тахсаат,

Ооҕуй оҕус илимигэр

Олоччу иилистэн хаалла.

Өрүйүҥ, даа, абырааҥ!-диэн

Үөгүлээн көрдө да,

Ким да биллибэтэ.

Күнэ харааран, ыксаан,

Ооҕуй оҕус баҕайыттан

Көрдөһөн үтүө тыла бүттэ.

Албыннаһан хайгыыр саҥата

баранна даҕаны,

Ардьайбыт тиистээх,

Лээһэйбит истээх,

Адаарыйбыт атахтаах

Ооҕуй ордоотоон кэбистэ:

 “Айдаарыма, акаарыа!

Сапсыҥныырыҥ аанньа

Сирэй көрбөххүн,

Сыыбыргыырыҥ аанньа

Туос сымыйаччыгын!

Миэхэ эн хайҕалыҥ

Даарым наадата суох!”- диэн

Кыырай халлаантан

Ас быстан түспүтүттэн үөрэн

Ааттаһыыны истибэккэ

Кэрэчээн кынатын кумалаан

Хам кэлгийэ суулаата.

Хаһаастанан астынан,

Салбанан кэбистэ.