Тялонь ковонь илатне

 МБОУ «Мордовско-Козловскяй средняй общеобразовательнай школась»

Атюрьевскяй муниципальнай районць

Азкс

«Тялонь ковонь илатне»

Сёрмадозе 10 классонь тонафнись

                                                     Мишина Альбина      

  Мон пяк кельгсайне тялонь ковонь илатнень  : Роштувать , Къльхчянять, Сире  Од кизоть ,Масланцять  .  Весть арьсезевонь : «А кода аноклакшнесть , васьфнезь тя илатнень щавазень одкс пингстонза ?»

  Нежедень щавазенди и максыне таколфты кизефксозень .Щавазе пеедезевсь  (бъта кунара учсесь тя кизефксть эса) и ушедозе азксонц .  

  Тинь тяни эрь шиня праздниконте : эрятада козя кудботмоса, конат фалу аруфт, наряжафт , а ярцамбяльхне – эрь шиня «пачат». И тиемска тейнть аф лядонды мезевок – аньцек тонафнеда .

  Минь эряфоньке ёфсикс лияль :тевда ламоль ,а ярхцамбяль пяк ашель, аньцек праздниконь шрась  петнезень седиеньконь и каннесь кенярдема.А стакшись …

  Тялонда ведсь эшитнень эзда машнесь и савсь якамс нурдоняса вирень лихтибряняти.Нурдонятне кувакальхть , тоза путневсть кафта стойкат и семьяста  оцю стирнятне и церанятне усксесть ведь эрь шинди . Ускомок пялешка вайгяльбе ня аф азовомшка стака усфть , сяшкава маштат вийда , матрайхть кяднек – пильгонек и сашенды сяка же мяльсь : «Кие кинь уски – минь стойкатнень , или стойкатне минь ?»И куватьс ускомда меле аф саят ежес .

  А праздниконди лама ведьта эрявсь . Эрь шинь нормать коряс нинге позанди и баняв.

  Позась и пачатне эрь праздникста . Сяда танцти эрхцамбяль и симомбяль ашеме сода .

  Позанди эрявсь анокламс солатт : равчт и акшет. Сятнень лихнезень бабазе. Равжа золаттнень равчкофнезь пянакудса : уштомда меле пси пянакудс путсыне ,  а илять  таргасыне и тяфта сънярс , мъзярс аф равчкодыхть , меле косьфтасыне ,  а коськомда меле, минь, иттне, яжсеськ «кевняса», конань шарфнемс эрявсь лама вий . Солаттне яжамальхть ляпоняста , къда лисендсть пялес паморьф рость, бабазе одукс яжафнезень.Яжамста капиелеме равжа золадонь почфта , но салава , сяс мес ламонектама идьта и семба кельгоськ – лия танцтихть ашеме няенде.Мъзярс  пачкотькшнесь танцти симомбяльсь шра лангс , эрявсь тиемс оцю тев.

  А пачатнень перьфке тоже аф кържа тевда : васенда ямксне чуфамат , штоба аф сяпихть улельхть , свиндемат , штамат , косьфтамат , тоса шовар потомоса томсемат петькольса , свиннемат локстемса , и тя сънярс , мъзярс сембе ямксне аф арайхть почфонди , сяльде пидема шонгарям , ламбаськофтома ,и аньцек анокламок тя семботь , иляденди бабазе шорсесь шапакс .        Праздникти акань – сазоронь келеса  кудти тиендеме аруши : скомнятнень- эзепнень   , кияксть къркселеськ къргамаса , сянкса мянь тюжялгодыхть . Кудботмоське валдоми , аруяй – шалхковарятнень котьфтьсыне пиче ваень шиненя .

  Шобдава съргозят танцти шинеть эзда –бабазе пици пачат .Комотнетама полка лангста , коса утселеме сембе идень келеса – лишнай вастт ашельхть , семьясь оцю , шташондоськ шаманьконь , кяденьконь и озсеме шра ваксс танцти пачада ярхцама  .Пачатне пицевсть пянакудса , оцю жар инголе , и кой – кона пачась аф ламода шяендсь  ,бабазе эста рахси : «Офтта сяда аф пельхтяда».

  Пачатне кургозт солазь  соласть : эчкт , ляпт , танцтихть , но сембода танцтинясь ульсь мекольце пачась- сонь бабазе вадендезе тракс вайса «кафта пяльде» . И кода бабазе шарьхкотькшнезе , што минь топодеме ни и пинге венептемс мекольце кафцьке пяльде ватьф пачать ! (А сембе пачатнень вадемс тяфта вайсь ашезь сатне ).

  Кудса урядшись , ярхцамбяльсь , позась – шову , туста , ламбама сахар почфонь апак каяк , - сембось корхтась оцю илать  колга .Илять ашеме кштирне , ашеме котсе , а лисендеме ульцяв и весялготкшнеме гармония инголе: кштикшнеме , морсеме сиде моронят или тарксеме кувака морот  . Юкснеськ сембе стакашитнень и сембе пяльде кеняртькшнеме Роштувати , а станя жа – Кльхчяняти. Кльхчянять самс яксеме катлянянь кулхцондома . Коцькаргаса фкясь тии круг , сембе кокшкочнетама и сетьмоста ащетама . Къда марьсеме ведаркань канзерф – пожаронди , явсемат - ловажанди , кштимат – морамат – свадьбанди .

  Кльхчяняста кудга етнесть од церат , стирьхнень васта потмоста лихнелезь ушу и вальселезь ловса.Ляпе ловнять потмоста стяшендсть валяфне , ашесть кяжиякшне , а мекланкть –ульсь тя оцю павазкс , сяс мес ловсь , ведсь ся шиня лувондовихть пъчкафтыкс .

  Масланцять мархта аделсевсь тялось. Цератне и стирьхне плъхнеме толмархт , тянь мархта ильхнеськ тялоть .Велеса ся пингть ламоль од ломаньда , гармонисттка ульсть , озсетама алашань нурттненди и гармониянь коряс морсезь, арнетама велеть пачк .

 Да , пяк весяласта минь пингстонк етнесть илатне !  А тяни велесь оцю , а  велеряйхть аш  , нъльня оцю иластовок аф кулят моронь морама   . Аф кулевихть идень вайгяльхть  .

А минь пингстонк….!