Отзыв на творчество Ногиева
Вложение | Размер |
---|---|
![]() | 19.73 КБ |
«Сöстöмлы да бурлы эскöм»
( Иван Ногиевлöн творчество йылысь пасйöдъяс)
Кодí талун коми гижысьяс пиысь любöпырысь гижö-серпасалö челядьлы сиöм серамбана дженьыдик висьтъяс, а сíдзжö вочасöн сьöлöм нюкыртчана, кыдз шуам «Руб», висьтъяс? Дерт жö, Иван Ногиев, Кулöмдíн районын чужлöм да быдмöм морт. Сíйö нэмсö чужанíнас олö-уджалö, вöр-васьыс, сиктысь, ас йöз костысь корсьö сюжетъяссö, выль геройяссö. Иван Ногиевлöн литературнöй гусяним- Парма Вань.1976- 81 воясö велöдчис СГУ-са физико-математическöй факультетын, велöдíс Кулöмдíнса шöр школаын. 1984-2003 воясö уджалíс Кулöмдíнса РОВД-ын. Дерт жö, тайö уджыс ышöдíс сíйöс гижны босьтчыны. Őд сылöн геройясыс олöмысь босьтöм збыльвывса томулов, а ачыс, Иван Ногиев, найöс веськыд туй вылö туйдöдысь-велöдысь. Медводдза висьт йöзöдíс « Ленин туйöд» газетын 1993 воын. Тайö кадсяньыс уна кодь лои гижöма. Висьт-зэв колана жанр, мед петкöдлыны талунъя мортлысь олöмсö. « Винегрет» небöгö пыртöма матö 22 висьт, кöнí висьтавсьö велöдчысьяслöн олöм, вочасöн быдмöм-верстяммöм да накöд лоöмторъяс йылысь, нöшта пыртöма кык повесьт. Гижанногыс Иван Ногиевлöн аслыспöлöс: кокни, сöдз коми кывъя, и век тöдчö авторлöн нюм сора видзöдлас. Сылöн гижöдъясын- талунъя мортлöн сьöлöмкылöмъяс, чужан сиктлöн мич, чужан кывлöн мылалун. Сíйö гижö аслас сиктса вуж йылысь, коми войтырлöн мывкыдлун йылысь, коми ногöн олöмсö кылöм йылысь, мамöс ыдждöдлöм, челядьдыр йылысь, медводдза радейтчöм йылысь, аслас горт йылысь, олöма йöзлöн вежöр йылысь казьтылöм, и быдöнлöн-шуд вылö лача кутöм. Висьтъясын комическöйыс уна рöма. Тайö – и геройяс дíнö гижысьлöн нюм сорöн матыстчöм, и геройяслöн серамбана, шмонитана сёрни, и прöста миян олöмын тешкодь вöвлöмторъяс. Иван Ногиев зíльö сíдзи лöсьöдны сюжет визьсö, медым сíйö лыддьысьысьöс кыскис, мед эськö окотапырысь висьтсö лыддисны, торъя нин челядь. Колö пасйыны и сíйö, мый сылысь «Руб» висьт пыртöма школаса программаö 6-öд классын велöдöм вылö. Челядьлы зэв сьöкыд психология боксянь донъявны тайö гижöдсö, кöнí кыпöдöма талунъя олöмысь мытшöд : вина юöм – курыд шог, вина юысь мамлöн кага дорас веськодьлун. Витя – висьтын шöр герой,писькöс мывкыда, бур сьöлöма зонка. Бура петкöдлöма и Ыджыд мамлысь мелiлунсö, зонка вöсна кывкутöмсö, но кувсьö сíйö. Торъя нин жальыд петö, кор 5 арöса зонка кольö öтнас, некодлы ковтöм. Воштысьны некытчö, Витяöс босьтöны интернатö. Зонка эскö, мый коркö локтас мамыс да босьтас бöр гортас. Тшöкыда овлö и сíдз, мый висьтсö лыддьöм бöрын öткымын велöдчысьяс бöрдлывлöны урок вылад. Сíдзжö «Руб» висьт вуджöдöма эст кыв вылö. Пырджык гижöдъясын шöр геройясыс- прöстöй сиктса йöз, челядь,быдöнлöн аслас этш. Найö торъялöны мывкыдлуннас, авъялуннас, уджын зíльöны лоны медпервойöн, нырччöны венны олöмас став сьöкыдлунсö, дасьöсь воны быдöнлы отсöг вылö сьöкыд здукъясö, нюжöдны мортлы ки. Гижысь велöдö ичöт войтырöс лоны зíльöн,шаньöн, бур сьöлöмаöн, тшöкыда янöдö вильшасьысьöс, дышöс. Тадз Иван Ногиев нуöдö зэв колана удж: челядьöс бурö велöдöм. И водзö вылö надейтчам, мый сылöн йöртöдын чукöрмас сьöлöмтö вöрзьöдана, ловтö гажöдана уна гижöдъяс. Колö, дерт, унатор йылысь гижны, да он век вевъяв. Гашкö, « Винегрет» небöг туяс школаын велöдысьлы , гашкö, сиктса лыддьысьысь мортлы. Кодкö татысь аддзас радейтана гижöд, кодкö восьтас аслыс выльöс. Сиам Иван Ногиевлы дзоньвидзалун да тыр-бур олöм, удж дорö куслытöм муслун, мед быдтор вылö тырмас кад, мед тíян гижöдъяс уналы лоас отсасьысьöн уджын, велöдчöмын.
Лыддьысьысьяс аттьöалöны тíянöс уджысь, эскам, мый миянкöд, коми войтыркöд, йитöдъяс оз орны. А ми, лыддысьысьяс, лоам веськыд киöн да бур пыкöдöн.
Ручса шöр школаысь ас му туялысьяслöн котыр.
Позвольте, я вам помогу
Яблоко
Извержение вулкана
Белый лист
Домик зимней ночью