"Йолдыз апа китабыҺ

 “ Йолдыз апа китабы”

Бик яратып укыйбыз без
Йолдыз апа китабын.
Колакчын киеп елмаеп,
Кояш карап торганын.

Йолдыз апа бик шәп яза,
Әйтерсең үзе бала.
Безнең эчкә яшеренгән
Бар серне ачып сала.

Шигырьләре белән безгә
Туры юлны күрсәтә.
Туган җирне, туган телне
Кадерләргә өйрәтә.

Бик матур итеп аңлата
Яхшы белән яманны.
Кадерен белергә өйрәтә
Әти-әни тапканны.

Бу дөньяда һәр нәрсәнең
Кирәклеген күрсәтә.
Кечкенә бер бөҗәкне дә
Рәнҗетмәскә өйрәтә.

Ачуланмый берәүне дә,
Шаян телдә аңлата.
Дөньядагы бар баланы
Йолдыз апа ярата.

Аңлатырлык әйтә белә,
Балаларча һәр сүзе.
Шигъриятебез күгендә
Йолдыздай балкый үзе.