А.С. Малькинонь творчестванц коряс литературнай вечер «Мъзярда панжихть марлюфне»

1-це ведущайсь.

 – Шумбратада, ялгат! Тячи минь мархтонт васедеме, штоба лятфтамс минь писателеньконь Александр Степанович Малькинонь. И тя вечерть минь ушедсаськ «Акша серал» мороть  эзда.

Акша серал

Косат, косат, акша серал,

Косат, панжи марлюня?

Коса, коса колгат морат,

Сенем сельме аруня?

Коса, кодама ки лангса,

Акша сорга васедят?

Коса седизень тейть панчса,

Келу ронга, весенда?

2-це ведущайсь.

Родина. Фкя вал. А конашкава питни и кельгови эрь ломанти, коса афоль эря и афоль работа.

        Тя, сон, Родинась, касфтомазь, макссь тейнек паваз, нолдамазь оцю эряфс. Сон, Родинась, макссь эрьгя, конань путнесаськ сянкса, штоба ломанць марялезе прянц азоркс.

1-це ведущайсь. 

Войнань стака пингть Родина валть мархта ломаттне якасть вишке бойс, ашезь ужяльне эсь  эряфснон. И фалу верондат, мъзярда поэттне корхтайхть: «Инь кайги валть – Родинати, инь цебярь тевоньконь - Родинати». Аф стак мокшэрзянь литератураса  аш стама поэт, кона афоль сермада лямбе валхт Родинати кельгоманц колга.

        Лувость А.С. Малькинонь стихонзон, поэманзон и инголент стяй вии художественнай образ – Родинась.

«Россия, кельгома Россиия»

Россия, кельгома Россия,

Ки крайса акша келу нал.

Тунда тейть менель нармонь лии,

И ляйхне комболдозь унайхть.

Россия, кельгома Россия,

Сияса палы раса ведь.

И вельфкат валда тяшттне лиихть,

Од тяштьса валдопнесак веть.

«Каркне тердихть куду»

Шумбранят, шачем-касом васта,

Тонь вельхкссот моли лайме порф,

И марян ляйсот, лийхтибрястот

Сия монетакс кайги горьф…

И орта лангсот пиже нарнясь,

Шиньфтазь тись раса цифторфкат.

Эрь келуть пряса тонь псьмархне,

Най морайхть вальмя ингольгат.

Мон пяле мастор шаронь-етань

И няень ефксста мазы крайхть,

Но кизе козонга изь лотка

И киньге пяли ашезь пра.

Иляса улень аньцек конак,

Най кирдень колгат пичефкскя

И няень, кода качамсь понай

Кудбрясот шобдава пикскя.

И аньцек тон аф конак лаца

Учсамак кенярди куднязт:

Пря песот (шобдава) вастозе монь ацаф

И щамне повфнефт пулонязт.

«Мес эрь праздникце тонь мазы»

Тячи конакне удалафт

Шамасост – кумаць

Орден цильфне кудсот палыхть

Мани шида лац.

Сембе сазорхне тейть азыхть

Лямбе седи вал.

«Мес тонь стирень ронгце мазы

Сельмотне, тонь валтт».

Прясот сералцень изь тока

Рана порф.

Теждя кямонятне покайхть,

Кудсот кштимо мор.

Мес тонь ортанятне марнек

Иттненди най панчфт

И аф касыхть капакс марнят,

Оцю кицень марс.

2-це ведущайсь.

        Александр Степанович Малькин минь земляконьке, шачсь майть 26-це шистонза 1923-це кизоня, Атюрьевскяй районца Кяшал велеса. Тядянза-алянза крестьятт: соксесть-витцесть паксят, касфнесть жуватат.

        Эсь велесост тонафнесь сисем кизот, сяда меле тусь Темников ошу тонафнема педагогическяй техникуму. Техникумть шумордамда меле мърдась шачема-касома велезонза и кармась тонафнема итть. Ушедсь работама начальнай школаса учителькс.

1-це ведущайсь. 

Литератураса шуроста эряй, штоба писательть васенце произведениясонза кати-кода аф няемге кемоста сувальхть лувихнень седис. Шуроста, но тяфта эряй. Тяфта лиссь Малькинонь литературав суваманц мархтовок. Поэзияв васенце аськолсть тиезе «Тяк юкста» стихотворениянц эзда, кона серматфоль Великай Отечественнай войнань васенце кизоня, няевсь: эвондась поэтическяй ширде крхка и смузю, оцю вайме ломанень вайгяль.

«Эряфть лувондсаськ эрь частста»

Эряфть лувондсась эрь частста,

Но кие ерай тяза прамс?!

Аньцек ляди аськолкс тяста

Паваз шити тейнек самс.

Кие содасы эрь тяштенц,

Коста тейнза сон стяй?

Къда шавован – тон тяштят

Куду тядязти куля.

И ня валхнень лятфтань тячи,

Кодак мельдень цяторфсь кайгсь,

Ялгай, сенем лаца тячикс

Тяштце юрхтценди лийкстай.

2-це ведущайсь.

        А. Малькинонь Великай Отечественнай войнань участник. Етазень войнань толу кизотнень. Москуть алда сявомок и мянь Германияв молемс. Лама няйсь и лама сёрмадсь тянь колга. Кулхцондсть ся пингть колга кой-кона стихонзон.

«Эрек ведь»

Илядень расась тиендсь летьке

И кепсесь шяентьф тишенясь

Солдатть пси ранастонза сетьксесь

Шуваня сюрекс вер киня

Куцьканонь пацякс шуфтомсь менельсь

И пелень панды сетьме перьф

Праф цёрать малазонза кенерсь

Войнань кить ланга бралги смертсь.

Сон эрясь нинге сире койса

Свал шятнесь войнать пильгекис,

Но ашезь сяськонде сонь бойса

Эрь мезьне церась лядондсь шис.

«Шавовсь ялганьке войнаса»

Шавовсь ялганьке войнаса

Прась аф сонцень моданц лангс,

Но сонь калмаськ рузонь койса

Тиеськ мекольце иланц

Ёмла келуня, кудрявня,

Озафтоме калмонц лангс

Шять Россияста ситявне

Лии тяза весть – аф весть.

Сетьмось ушесь, валдомсь менельсь,

Жольняй саворне вирнясь,

И окопнень бокса кенерсь

Касонц пиже тишенясь.

«Мон матнень цятнкень»

Монь касы цёразе. Сон ёню

И сятяв, кода гуленя

Ши валдти ёмланяста тонадсь

И кеме, кода тумоня.

Сонь ули лямбе пара пизоц

И тоса ули шабань мор

Аф сатсы сёксень кельме пизем

Аф сатсы тялонь вии порф.

Мон тянкса тюрендень войнаса

И етань лакай толонь пачк

И лама масторонь кибряса

Пси верти поразе начксь.

1-це ведущайсь.

        Шачема-касома вастонцты и эряфти кельгоманц А.Малькин няфтезе эсь лирикасонза, природать мазышинц мораманц вельде. Мъзярда морафтсайть стихонзон, нинге сяда пяк питникс арай перьфпяльдень эряфсь: валда сенем тяштю менельсь шачема крайнц вельхксса, сянгяря котфонь паксянза, покорды сетьме пиземнясь, вирсь, шуди ляйнясь, касы мяльце арьсемс эряфть вечнай шинц колга.

«Вирень ляйня»

Сон лихтибряста, кода очкста

Кальюрхнень алга ласьки шанчк

И кати-кинди самста кочкси

Шинь мазы цильфста эрек панчфт.

И шамац инезиса валонтф

И тума судонь шиненяц

Сон кульсы, кода лаймоть малас

Ювадьсы жольдерди стирнянц.

«Сёксень пизелхт»

Тунданьке кадомазь кунара

И цёфксне тейнек аф мрдайхть

Вирть келес сёксень вармась шары

И пизем кярьмасне юрнайхть

Ня кстыхне шачендсть акша панчфса

И кочксезь кизонза ши валдть

Синь тяни нолясазь эсь таньфснон

Од сёксень ару сокса валфт.

2-це ведущайсь.

        Эше перяфкс ваксса Малькин мзярдонга ашезь эря. Сон фалу тевсоль. Тевонь тиемста 1976-це кизонь «Мокша» журналть 3-це номеронц анокламстонза пичедсь, шра ваксса прась кядьстонза ручкась. Кати седиенц марязе, кати ашесть кирдев эряфонь эрь шинь сталмотне. Но «Мокша» журналть тя номерсонза, кона лиссь ни соньфтемонза, поэтть мекольдень стихонзон пачк сувафтф эряфти итогонь тиема мяльс.

1-це ведущайсь.

        Кяшал веле. Тяста сон аськолдась оцю эряфс, тяза мрдась куломдонза мелевок. Пингсь моли. Малькинонь кельгома шуфтонянза венептьсазь лопаву тарадснон шинь сюролдатненди. Синь тага шириназевихть, штоба нинге весть лятфтамс эсь морайснон ару и валда моронзон.

«Мороня»

Пиже порань ала

Эрясь лихтиня

Ласькондсь лаймоть малас

Жольдерди киня

Атяня весть комлят

Кочксесь тя ширьге

Симома валомне

Аськолясь вирьге

Эшеняти венемсь

Сакал сюроняц

Марясы сон веденц

Нупонь шиненянц

Ёрязе шуваронц,

Петезе струпканц,

Узерь нярьса ароптсь

Сяка шудерьксканц

2-це ведущайсь.

        А тяни кулхцондсаськ А. Малькинонь стихотворениянц, рузонь кяльс конань ётафтозе Леонид Жкавро.

«Дарюня»

1. Ули Кяшалса стирня

Ёфси пяшень куймоня

Аньцек клубу сон сувай

Озай шири и нувай

Припев: Эх, тон, Дарю, Дарюня

 Конязт озась каруня

 Эх, тон, Дарю, Дарюня

 Конязт озась каруня

2. Ули Кяшалса стирня

Удозь покоди сурня

Палянь стама сон кундай,

Ванат, сонцень ожанц стай

Припев: Эх, тон, Дарю, Дарюня

          Эздот аяш пароня

  Эх, тон, Дарю, Дарюня

          Эздот аяш пароня

3. Ули Кяшалса стирня

Ялга меле пулоня

Ломатть тевснон шумордайхть,

А сон аньцек шама штай

Припев: Эх, тон, Дарю, Дарюня

          Пула песа шарыня

Эх, тон, Дарю, Дарюня

         Пула песа шарыня

4. Ули Кяшалса стирня

Ёфси ташта куймоня

Картат кайси и нувай,

А кудалай аф сувай.

Припев: Эх, тон, Дарю, Дарюня

          Аш тонь мельгат шарыня

  Эх, тон, Дарю, Дарюня

          Аш тонь мельгат шарыня

1-це ведущайсь.

        Вага, ялгат, и аделавсь минь литературнай иляденьке, конань ётафтоськ А.С. Малькинонь творчестванц коряс. Оцю спасиба астама А.С. Малькиноньди, сонь стихотворениянзон инса. И спасиба, ялгат, тейнть, што сашендоде тя вечерть ванома и кухлцондома.