Тропарные гласы (тексты)

                                Тропари 1 глас

Общее воскресение/ прежде Твоея страсти уверяя /из мертвых воздвигл еси Лазаря, Христе Боже/ Темже и мы, яко отроцы победы знамения носяще, /Тебе Победителю смерти вопием: //осанна в вышних, благословен Грядый во Имя Господне.

На Престоле огнезрачнем в вышних седяй/ со Отцем Безначальным, и Божественным Твоим Духом,  /благоволил еси родитися на земли от Отроковицы,/ неискусомужныя Твоея Матере, Иисусе: /сего ради и обрезан был еси яко человек осмодневный. /Слава всеблагому Твоему совету,/ слава смотрению Твоему,  //слава снизхождению Твоему, Едине Человеколюбче.

Во Иордане крещающуся Тебе, Господи, /троическое явися поклонение: /Родителев бо глас свидетельствовавше Тебе, /возлюбленнаго Тя Сына именуя,/ и Дух в виде голубине,/ извествоваше словесе утверждение./ Явлейся Христе Боже, //и мир просвещей, слава Тебе.

Утробу Девичу освятивый рождеством Твоим, /и руце Симеоне благословивый, /якоже подобаше, предварив, / и ныне спасл еси нас Христе Боже,/ но умири во бранех жительство, //Едине Человеколюбче.

Радуйся, Благодатная Богородице Дево,/ из Тебе бо возсия Солнце правды, Христос Бог наш,/ просвещаяй сущия во тьме./ Веселися и ты, старче праведный,/ приемый во объятия Свободителя душ наших, //дарующаго нам воскресение.

Пустынный житель и телеси ангел, /и чудотворец явился еси, богоносе отче наш Иоанне; /постом, бдением,  молитвою небесная дарования приим, /исцеляеши недужныя, и души верою притекающих ти. /Слава Давшему Ти крепость, /слава Венчавшему тя,// слава Действующему тобою всем исцеления.

От святыя иконы Твоея, о Владычице Богородице, /исцеления и цельбы подаются обильно /с верою и любовию приходящим к ней, /тако и мою немощь посети, /и душу мою помилуй, Благая// и тело исцели благодатию Твоею, Пречистая.

Возсия нам, яко солнце светозарное, /от востока в велелепии Твоя, Владычице, икона, /озаряющи чудес  сиянием преславно всех,/ непрестанно приходящих к ней с верою и любовию, и молящихся усердно/ Твоему  еже о Сыне Твоем и Бозе величию./ Слава Богу, Арсением сию давшему нам,/ слава Возвратившему ю от Новаграда,// слава Действующему Тою всем исцеления.

Тропарь,глас 2:

Егда снизшел еси к смерти, Животе Безсмертный,/ тогда ад умертвил еси блистанием Божества:/ егда же и умершия от преисподних воскресил еси, /вся силы небесныя взываху:// Жизнодавче, Христе Боже наш, слава Тебе.

Кондак, Глас 2:

В молитвах неусыпающую Богородицу,/ и в предстательствах непреложное упование,/ гроб и умерщвление не удержаста: /якоже бо Живота Матерь, /к животу престави,// во утробу Вселивыйся Приснодевственную.

Тропарь,Глас2:

Иже в шестый день же и час,/ на кресте пригвождей в раи дерзновенный Адамов грех, /и согрешений наших рукописание раздери, Христе Боже,// и спаси нас.

Тропарь, Глас 2:

Велия веры исправления,/ во источнице пламене, яко на воде упокоения,/ святый мученик Феодор радовашеся; /огнем бо всесожжегся,/ яко хлеб сладкий Троице принесеся.// Того молитвами, Христе Боже, спаси души наша.

Тропарь, Глас 2:

Пречистому Образу Твоему покланяемся, Благий,/ просяще прощения прегрешений наших, Христе Боже;/волею бо благоволил еси плотию взыти на крест,/ да избавиши яже создал от работы вражия./ Тем благодарственно вопием Ти: /радости исполнил еси вся, Спасе наш,// пришедый спасти мир.

Кондак, Глас 2:

Хлеб прием в руце предатель,/ сокровенно тыя простирает,/ и приемлет цену Создавшаго Своима руками человека,// и неисправлен пребысть Иуда раб и льстец.

Кондак, Глас 2:

Радоватися мироносицам повелел еси, /плачь праматере Евы утолил еси воскресением Твоим, Христе Боже,/ апостолом же Твоим проповедати повелел еси:// Спас воскресе от гроба.

Кондак, Глас 2:

Благоприятное Твое чрево, Богородице,/ объемший пояс Твой честный,/ держава граду Твоему необорима,/ и сокровище есть благих неоскудно,// едина рождшая, Приснодево.

Тропарь, Глас 2:

Всех скорбящих Радосте,/ и обидимых Заступнице,/ и алчущих Питательнице,/ странных Утешение,/обуреваемых Пристанище, /больных Посещение,/ немощных покров и заступнице,/ Жезл старости,/ Мати Бога Вышняго Ты еси, Пречистая: //потщися, молимся, спастися рабом Твоим.

Кондак, Глас 2:

Небесныя обители преселившаяся с плотию,/ сущия на земли никакоже оставила еси, Богородице,/ образ Божественный и многочудесный Пречистаго Лица Твоего/ зрети любящим Тя и покланятися даровала еси,/яко знамение Твоея благодати;// чтим его, лобызающе.

                                Тропари 3 глас

Твоих благодеяний и даров туне, /яко раби непотребнии, сподобльшеся, Владыко, /к Тебе усердно притекающе,/ благодарение по силе приносим,/ и Тебе яко Благодетеля и Творца славяще, вопием: //слава Тебе, Боже Прещедрый.

Дева днесь Пресущественнаго раждает,/ и земля вертеп Неприступному приносит, /Ангели с пастырьми  славословят,/ волсви же со звездою путешествуют:/ нас бо ради родися// отроча младо, Превечный Бог.

Душу мою, Господи, во гресех всяческих, /и безместными деяньми люте разслаблену, /воздвигни Божественным Твоим предстательством, /якоже и разслабленнаго воздвигл еси древле, /да зову Ти спасаемъ:  //Щедрый, слава, Христе, державе Твоей.

Твоего предстательства уверение /и милосердия Твоего явление/ икона Иерусалимская нам, Владычице,  показася. /Пред нею же души наша в молитве излеваем/ и верою Тебе вопием: / воззри, Милосердная, на люди Твоя, /вся скорби наша и печали утоли, /утешение благое в сердца наша низпосли //и спасение вечное душам нашим, Пречистая, испроси.

Возсия нам, яко солнце светозарное, /от востока в велелепии Твоя, Владычице, икона, /озаряющи чудес сиянием преславно всех,/ непрестанно приходящих к ней с верою и любовию, /и молящихся усердно Твоему еже о Сыне Твоем и Бозе величию. /Слава Богу, Арсением сию давшему нам,/ слава Возвратившему ю от Новаграда, //слава Действующему Тою всем исцеления.

Волею Отца Небеснаго зачала Сына Божия, /без семени земнаго отца, /прежде творения мира /от отца без  матери Рожденнаго плотию родила еси/, и Егоже моли о даровании нам ума//  ко спасению душ наших.

Пречистая Дево Марие, /Мати Царя небеси,/ благоутробно призираеши на любящих Сына Твоего,/ Христа  Бога нашего,/ и труждающихся во Имя Его вечнаго ради спасения, /и подаеши им вся обильно к наслаждению. /Спорительнице сущи хлебов им, /избавляя их всякия нужды и утеснения /и устрояя им, рабом Твоим сущим, //избавление вечныя муки и жизнь вечную.

                Тропари и кондаки глас 4

Светлую воскресения проповедь/ от Ангела уведевша Господни ученицы/ и прадеднее осуждение отвергша,/ апостолом хвалящася глаголаху: /испровержеся смерть,/ воскресе Христос Бог,//даруяй мирови велию милость.

Еже от века утаенное,/и Ангелом несведомое таинство/, Тобою, Богородице, сущим на земли явися Бог,/ в неслитном соединении воплощаем,/ и Крест волею нас ради восприим,/ Имже воскресив первозданного,// спасе от смерти душы наша.

Небесных воинств Архистратизи,/ молим вас присно мы недостойнии,/ да вашими молитвами оградите нас/ кровом крил невещественныя вашея славы,/ сохраняюще ны припадающия прилежно и вопиющия:/ от бед избавите ны,// яко чиноначальницы Вышних Сил.

Вознесыйся на Крест волею,/ тезоименитому Твоему новому жительству,/ щедроты Твоя даруй, Христе Боже,/ возвесели нас силою Твоею,/ победы дая нам на сопостаты,/ пособие имущим Твое оружие мира,// непобедимую победу.

Правило веры и образ кротости, /воздержания учителя/ яви тя стаду твоему,/ яже вещей истина/ сего ради стяжал еси смирением высокая,/ нищетою богатая,/ отче священноначальниче Николае/ моли Христа Бога //спастися душам нашим.

Скорый в заступлении Един сый, Христе,/ скорое свыше покажи посещение страждущим рабом Твоим,/ и избави от недуг и горьких болезней,/ и воздвигни во еже пети Тя и славити непрестанно// молитвами Богородицы, Едине Человеколюбче.

Рождество Твое, Богородице Дево, /радость возвести всей вселенней: /из Тебе бо возсия Солнце правды Христос Бог наш,/ и разрушив клятву, даде благословение,//и упразднив смерть, дарова нам живот вечный.

Иоаким и Анна поношения безчадства,/ и Адам и Ева от тли смертныя свободистася, Пречистая,/ во святем рождестве Твоем./ То празднуют и людие Твои,/ вины прегрешений избавльшеся,/ внегда звати Ти:// неплоды раждает Богородицу и питательницу жизни нашея.

Рождество Твое, Христе Боже наш,/ возсия мирови свет разума:/ в нем бо звездам служащии, / звездою учахуся,/ Тебе кланятися Солнцу правды,/ и Тебе ведети с высоты Востока:// Господи, слава Тебе.

                              Тропари 5 глас

Собезначальное Слово Отцу и Духови, /от Девы рождшееся на спасение наше, /воспоим, вернии, и поклонимся,/ яко благоволи плотию взыти на крест, /и смерть претерпети, /и воскресити умершия //славным воскресением Своим.

Радуйся, двере Господня непроходимая. /Радуйся, стено и покрове притекающих к Тебе./ Радуйся, необуреваемое пристанище и неискусобрачная, /рождшая плотию Творца Твоего и Бога,/ молящи не оскудевай от воспевающих,// и кланяющихся рождеству Твоему.

Ко аду, Спасе мой, сошел еси,/ и врата сокрушивый яко Всесилен, /умерших яко Создатель совоскресил еси, /и смерти жало сокрушил еси,/ и Адам от клятвы избавлен бысть, Человеколюбче, /темже вси зовем: //спаси нас, Господи.

Якоже первомученик Твой Стефан,/ о убивающих его моляше Тя, Господи,/ и мы припадающе молим: /ненавидящих всех и обидящих нас прости, /во еже ни единому от них нас ради погибнути, //но всем спастися благодатию Твоею, Боже Всещедрый.

Всю надежду на Тя возложившим, Спасе, /буди помощник и избавитель, /и благое намерение дела с путешествием их благослови,/ да вси славим Тя,// Единаго всех благ Подателя.

Под Твой покров прибегаем, Богородице Дево,/ молитв наших не презри в скорбех,/ но от бед избави нас, //Едина Чистая и Благословенная.

Пред святою Твоею иконою, Владычице, /молящиися исцелений сподобляются, /веры истинныя познание приемлют /и агарянская нашествия отражают/ Темже и нам, к Тебе припадающим,/ грехов оставления испроси,/ помыслами благочестия сердца наша проствети/ и к Сыну Твоему молитву вознеси //о спасении душ наших.

                                    Тропари 6 глас

Ангельския силы на гробе Твоем/ и стрегущии омертвеша,/ и стояше Мария во гробе, /ищущи Пречистаго Тела Твоего. /Пленил еси ад, не искусився от него; /сретил еси Деву, даруяй живот// Воскресый из мертвых,  Господи, слава Тебе.

Скорый в заступление и крепкий в помощь,/предстани благодатию силы Твоея ныне /и, благословив, укрепи,  /и в совершение намерения благаго дела рабов Твоих произведи; /вся бо, елика хощеши, //яко Всесильный Бог, творити можеши.

Еже о нас исполнив смотрение, /и яже на земли соединив небесным, /вознеслся еси во славе, Христе Боже наш, /никакоже отлучаяся, /но пребывая неотступный, /и вопия любящим Тя: //        Аз есмь с вами и никтоже на вы.

Премудрости наставниче,/ Смысла Подателю, /немудрых Наказателю, /и нищих Защитителю,/ утверди,  вразуми сердце мое, Владыко! /Ты даждь ми слово, /Отчее слово, /се бо устне мои не возбраню, /во еже звати Тебе: //Милостиве, помилуй мя падшаго.

На престоле на небеси, /на жребяти на земли носимый, Христе Боже,/ Ангелов хваление /и детей воспевание приял еси зовущих Ти: //благословен еси, грядый Адама воззвати.

Еже о нас исполнив смотрение, /и яже на земли соединив небесным, /вознеслся еси во славе, Христе Боже наш, /никакоже отлучаяся, /но пребывая неотступный, /и вопия любящим Тя: //         Аз есмь с вами и никтоже на вы.

Бездну заключивый, мертв зрится, /и смирною и плащаницею обвився, /во гробе полагается, / яко смертный,  Бессмертный;/жены же приидоша помазати Его миром, /плачущи горько и вопиющия:/ сия Суббота есть Преблагословенная, //в нейже Христос уснув, воскреснет тридневен.

                                Тропари 7 глас

Преобразился еси на горе, Христе Боже, /показавый учеником Твоим славу Твою,/якоже можаху:/ да возсияет и нам грешным /свет Твой присносущный, /молитвами Богородицы, //Светодавче, слава Тебе.

Запечатану гробу, /живот от гроба возсиял еси, Христе Боже,/ и дверем заключенным, /учеником предстал еси, /всех воскресение; /дух правый теми обновляя нам, //по велицей Твоей милости.

Звездо пресветлая Церкве Христовы, /на севере просиявшая,/ вся к Царствию Небесному путеводящая,/ учителю и апостоле истинныя веры, /предстателю и заступниче гонимых,/ украшение изящное Святыя Церкве во Америце, /преподобне отче Германе Аляскинский, /молися ко Господу Спасу нашему, //спастися душам нашим.

От Рима возсиял еси,/ якоже звезда пресветлая,/ преподобне отче наш Макарие, /и, в пустыни вселився, /просветил еси чистым житием твоим верно притекающия к тебе. /Темже и мы, прославляюще светлую память твою, вопием ти: /радуйся, преподобне отче Макарие.

Нищету Христову возлюбивши, /безсмертныя трапезы ныне наслаждаешис/ безумием мнимым безумие мира обличивши, /смирением крестным силу Божию восприяла еси. /Сего ради дар чудодейственныя помощи стяжавшая,/ Ксение блаженная, моли Христа Бога// избавитися нам от всякаго зла покаянием.

На горе преобразился еси, /и якоже вмещаху ученицы Твои /славу Твою, Христе Боже, видеша: / да егда Тяузрят распинаема, /страдание убо уразумеют вольное, /мирови же проповедят,//  яко Ты еси воистинну Отчее сияние.

Не ктому пламенное оружие хранит врат Едемских; /на тыя бо найде преславный соуз древо крестное,/  смертное жало, и адова победа прогнася. /Предстал бо еси, Спасе мой, вопия сущим во аде: //внидите паки в рай.

                               Тропари 8 глас

С вышних призирая, убогия приемля, /посети нас озлобленныя грехи, Владыко Всемилостиве,/ молитвами Богородицы даруй душам нашим велию милость.

Глубиною мудрости человеколюбно вся строяй, /и полезное всем подаваяй, /едине Содетелю, упокой,  Господи, души раб Твоих; /на Тя бо упование возложиша, //Творца и Зиждителя, и Бога нашего.

Тебе и стену и пристанище имамы, /и молитвенницу благоприятну к Богу,  // Егоже родила еси, Богородице безневестная, верных спасение.

Взбранной воеводе победительная, /яко избавльшеся от злых, /благодарственная восписуем Ти раби Твои,  Богородице,/ но яко имущая державу непобедимую, /от всяких нас бед свободи, да зовем Ти: //радуйся,  Невесто Неневестная.

Благословен еси, Христе Боже наш, /Иже премудры ловцы явлей, /низпослав им Духа Святаго,/ и теми уловлей вселенную, //Человеколюбче, слава Тебе.

Вышния красоты желая, /нижния сладости телесное ядение тщательно оставил еси, нестяжанием суетнаго мира, /возлюбил еси ангельское житие, /преходя скончався, Иоанне блаженне; /  с нимиже моли Христа Бога непрестанно о всех нас

Житие твое Василие неложное и чистота нескверна,/ Христа ради тело твое изнурил еси постом и бдением, /и мразом и теплотою солнечную, и слотою, и дождевным облаком,/ и просветися лице твое, яко солнце. /И ныне приходят к тебе российстии народи и вси людие,/ прославляюще святое твое успение. /Тем Христа Бога моли, да избавит ны от варварскаго пленения и междоусобныя брани, //и мир мирови подаст, и душам нашим велию милость.

Аще и во гроб снизшел еси, Безсмертне,  /но адову разрушил еси силу,  /и воскресл еси, яко Победитель,  Христе Боже,/ женам мироносицам вещавый: радуйтеся! /и Твоим апостолом мир даруяй, //падшим подаяй воскресение.