Сагитова Минзифа Хабировна

«Мин милләттәшләремдә, җирдәшләремдә, замандашларымда әле сүнеп бетмәгән, заманның явыз тизлеге белән капланып өлгермәгән Туган илгә мәхәббәтне кайтарырга телим...» Аяз Гыйләҗев 1. Иң беренче – үз телеңне камил бел! Аңа зур хөрмәт белән кара, башкаларны шуңа өйрәт. Онытма: синең телең дөньядагы иң камил, иң бөек ундүрт телнең берсе. Теленнән йөз чөергәннең – теле көяр! 2. Җиде буын бабаларыңның исемен бел, шәҗәрәсен сакла, алга таба балаларыңа һәм оныкларыңа калдыр. Бабасын оныткан – алдагысын оныткан! 3. Атаң-анаң сүзеннән чыкма, аларны санла һәм шәфкатьле бул. Картайган көннәрендә ярдәм ит. Туганнарыңны, якыннарыңны ташлама. Атасын сүккән – атсыз калган, анасын сүккән – аңсыз калган! 4. Үз халкыңның үткәнен бел, аның чын тарихы белән кызыксын. Өйрән һәм башкаларга да шуны сөйлә. Үткәне юкның – киләчәге дә юк! 5. Татар халкы олуг әдәбиятлы, зур мәдәниятле милләт. Аның әдәбият-сәнгатен үзләштер, даими кызыксынып бар, өйрән һәм башкаларга да шуны сөйлә, өйрәт! Үзенекен кире каккан – үзен кире каккан! 6. Дөньяның кайсы гына почмагына барсаң да яисә торсаң да үз татарың белән туганлашып, оешып, бергә яшә. Үз ишең – кайда да иш, үз татарың – ярты Ватан ич! 7. Эштәге, тормыш-көнкүрештәге тырышлык өстенә, күп белергә тырыш, күп укы, югары белемгә омтыл. Идарә эшләрендә катнаш, бизнеста өлгер бул, әмма һич тә намусыңа тап төшермә, исемең-атың белән рәттән, чиста, тәртипле, берсүзле, ышанычлы, белемле, яхшы күңелле, акыллы, тугрылыклы, талантлы, иманлы, милләтпәрвәр Инсан дигән – иң зур орденнардан да, алтын медальләрдән дә кыйммәтлерәк булган изге сүзләрне куярлык булсын. Алтын китәр – акыл китми, гайбәт бетәр – гадәт бетми! 8. Дөньядагы барлык милләтләрне хөрмәт ит, аларның теленә, культурасына, гореф-гадәтләренә ихтирам белән кара. Булдыра алсаң, берничә чит тел өйрән, Үзен яратканның күзе – көзгедә, башканы яратканның – башкаларның йөзендә!