Бзэр псэ, бзэ зимы1эм лъэпкъ и1эп.

_Ахметова_ _Замира_ _Схатбиевна_
Опубликовано 23.01.2020 - 22:52 - _Ахметова_ _Замира_ _Схатбиевна_
Бзэр псэ, бзэ зимы1эм лъэпкъ и1эп.
 
                                                                           Сыбзэ лъап1эу ныдэлъфыбзэр
                                                                           Сянэ гупсэ къыситыгъ.
                                                                           Сыбзэ лъап1эу адыгабзэр
                                                                           Сянэ дышъэ сигъэш1агъ.
 
 
         Адыгабзэр- адыгэ народым ыбз. Адыгабзэр национальнэ бзэу адыгэмэ а1улъыр ары. Адыгэ хэкум ис адыгэхэм ямызакъоу, хы1ушъо шапсыгъэхэми, къуаджэу Шъхьащэфыжь дэсхэми, тихэгъэгу инэмык1ырэ ч1ып1эхэми  ащыпсэухэрэми абз.Илъэсишъэ пчъагъэхэм къак1оц1 адыгэхэр зэгуры1онхэмк1э агъэфедэрэ ык1и ахэр народ шъхьафэу зэрэщытымк1э адрэ народхэм агозгъэшъхьафык1ырэ амал шъхьа1эу адыгабзэр сыдигъок1и къэнэжьы.
 
 
Ныдэлъфыбзэм нахьы лъап1э
Мы дунаим къытек1ынэп,
Ныдэлъфыбзэм идэхагъэ
Нэмык1 бзэмэ апэсш1ынэп.
         Сыд фэдэрэ ч1ып1и, къиныгъуи уимыхьагъэми убзэ умыхъожь, 1эдэби, ц1ыфыгъи, шъхьэк1эфэныгъи ныдэлъфыбзэм пытэу зэрепхыгъэр зыщымыгъэгъупш. Ц1ыфэу зыбзэ зымыш1эжьырэм нахь тхьамык1э дунаим тетэп.
         Сыадыг зып1ок1э адыгабзэр пш1эн фае. Сабыим бзэр езгъаш1эрэр ян. Уиныдэлъфыбзэ уепэгэк1ы ныр, урымыгущы1эныр емык1у, дахэп, адыгагъэм ар щыщэп.
         Уадыгэмэ, убзэ гъэлъап1э. Бзэр ц1ыф лъэпкъым икультурэ илъапс.
 
 
 

 Жэбзэ дахэр акъылым ылъапс.

 Бзэ хьэрамрэ, тхылъ- хьарамрэ щы1эп.

 Бзэ зимы1эм лъапсэ и1эп.

 Бзэ къабзэ зы1улъ ц1ыфым и1акъыли, игулъыти, инэплъэгъуи чан. 

         Мы адыгэ гущы1эжъхэм ямэхьанэ жъы хъурэп. Адыгэхэм -яшэн, язек1уак1, яш1ык1э дахэхэр хэзыгъэ имы1эу къыщэлъагъох. Ц1ыф лъэпкъыр зык1одк1э, ащ ыбзи, ихабзи дэк1одыщт.

         Тиадыгабзэ непэ тырымыгушхонэу щытэп, сыда п1омэ, адыгабзэр непэ къэрэлыгъуабз. Тыбзэк1э теджэнэу, тытхэнэу амал ти1. Тиныбжьык1эхэр адыгэ филологием ифакультет щеджэх, ш1эныгъэлэжьэу ти1эхэм япчъагъэ хэхъо. Тыбзэ ш1у тлъэгъуныр, дгъэлъэп1эныр шъо, к1элэц1ык1ухэр, шъуипшъэрылъ шъхьа1.

         Бзэр- псэ, щы1эныгъ, адыгэ ц1ыфым идунай, гъэш1эрэ тын лъап1.

         Тхылъыбзэ зимы1эгъэ адыгэхэм ябзи, ятарихъи, яшэни къаухъумагъэх, агъэлъэп1эх, непэ тэ къыднагъэсыжьыгъэх. Тэ тиреспубликэ фитыныгъэ ти1эу тызэрэщыгущы1эрэм фэдэу, 1эк1ыб къэралхэм щы1э адыгэхэм зэрямы1эр зыщыдгъэгъупшэ хъущтэп.

         Ныдэлъфыбзэр -сянэ ыбз, ным ибыдзыщэ к1ыгъоу ар слъя къыхэхьагъ, сырэгушхо, сыгу щизэу къэсэ1о: сыбзэ- си Дунай. Зынахь лъап1э щымы1э ным апэу ыц1э зэрет1орэр адыгабзэ, ащ ижабзэ сабыир ш1ум фещэ, фегъасэ, къыфегъэущы, дунаим идэхагъэ хегъаплъэ.

 

 

         Гущы1эжъ: «Ны зимы1эжьыр, ибэшъ -насыпынчъ. Зыбзэ зымыш1эжьырэр, фэмыфышъ, нэпэнчъ».

         Тыбзэ щы1эмэ, тэри тыщы1.

 

 

Адыгэ ч1ыгум нахь дахэ

Мы дунаишхом темыгъотэн.

Адыгэ пшъашъэм нхь хъупхъэ

Щы1эу ныбжьи зэхэмыхын

Адыгэ къашъом, бзыум фэдэу,

Ошъогум чыжьэу удихьыен.

Адыгэ орэдым лъыр къырифэк1эу,

Гур ыгъэфабэу уз1эпищэн,

Сиадыгабзэ нахь бзэ ш1агъо

Сыд фэдэ жабзи хэмыгъотэн.