Эзтабарлар булабыз.

Актаныш районы Богады гомуми урта белем бирү

мәктәбенең башлангыч класслар укытучысы

Нурлыева Ләйлә Вәли кызы.

                              “ Эзтабарлар сафына басу бәйрәме”

                                              эшкәртмәсе

   Мәктәп бусагасын атлап кергәч, укытучы алдына  1 нче класс укучыларын дус, тату яшәүче бердәм коллективка туплау бурычы килеп баса. Әлбәттә, бу дәвамлы һәм иҗади эшчәнлекне сорый. Бала психологиясе күп нәрсәне уен аша җиңел кабул итә. Күмәк уеннар белән беррәттән, шигъри юллар, рольле әйтемнәр, җырлы- биюле кичәләрнең дә балалар күңелендә бердәмлеккә омтылыш уятуга әһәмияте зур дип әйтәсем килә. Түбәндә тәкъдим ителгән бәйрәм эшкәртмәсен дә шул максаттан чыгып язарга булдым.

.    (Бәйрәмгә әти - әниләр, мәктәптән кунаклар, вожатыйлар да чакырылды)                    

        2 укучы үзара сөйләшеп керәләр:

       -Кара әле,Алия,бүген безнең мәктәптә ниндидер бәйрәм була дип ишеттем,дөресме икән?

     -Әйе шул,кунаклар да күренә бугай.

   - Тыңла әле син,апа без бүген эзтабарлар булабыз,-ди, нәрсә эзлибез дә, ничек табабыз соң без? Син беләсеңме? Белсәң әйт әле.

-Нигә, Илфия, укый башлаганга 3 ай була бит инде, сизмисеңмени, апа бездән көн саен ни дә булса эзләтә ич.Йә табышмак әйтә дә җавабын таптыра, сүзен табабыз гына – авазларын эзләтә, аннан хәрефен таптыра.

-Әйе,әйе,әле аннан соң ул авазны сузыкмы, тартыкмы,калынмы-нечкәме, тартык булса- яңгыраумы-саңгыраумы,дип тә эзлибез.Табабыз бит.

3 нче укучы керә:

- әй, кызлар, математиканы әйтегез әле сез,ниләр генә эзләтми бездән:

Кайсы сан зур, кайсы кече, кайсы тигез, санга санны кушсаң ничә, алсаң ничә, мәсьәләдә җавап ничә, әйтеп кенә өлгер.

4 нче укучы керә:

-Кызлар, малайлар, син әйт әле азбуканы.

Күпме сүзнең таптык инде русчасын?

Калган укучылар керә:

     -Шулай булгач, күп нәрсәләр тапкач без эзтабарлар булабыз түгелме соң инде? Әйдәгез, апаның үзеннән сорап карыйк.

-Апа, әйтегез әле, без күп нәрсәләр белгәнбез инде, эзтабарлар дияргә буламы безне?

Укытучы:

        -Әйе, укучылар, сез шушы кыска гына чорда күп кенә мәгълүматлар туплагансыз, уңышларга да ирешкәнсез, ләкин чын кешеләр булып үсәр өчен әле болар гына җитми.Шуның өчен без 1 нче класстан ук эзтабарлар дигән зур төркемнең 1 нче баскычына басарга җыйналдык. Эзтабар булу өчен аның кагыйдәләрен белергә кирәк. Нинди кеше эзтабар була ала, сез ничек уйлыйсыз?

 -Эзтабар- кыю кеше.

    -Ә нинди кеше кыю кеше була?(җаваплар тыңлана)

 -Эзтабар- намуслы кеше.

    - Ә нинди кеше намуслы була?(җаваплар тыңлана)

 -Эзтабар- игелекле кеше

    -  Нәрсә ул игелек?(җаваплар алына)

 -Эзтабар- булдыклы кеше.

 -Эзтабар тагын да яхшы булырга омтыла.

        Вожатый сүз башлый:

-Әйе, укучылар, сез кагыйдәләрне дөрес аңлагансыз, бу яхшы. Әле эзтабар белергә тиеш әйберләр тагын да бар:

-Йөгереп уйный торган 3 уен, туп белән 3 уен, 3 күмәк җыр,3 күмәк бию дә белергә тиеш сез. Боларны беләсезме сез?

- Ә хәзер, әйдәгез, һөнәрләребезне күрсәтик.

   Шигырьләр сөйлиләр.

1.                   Без бер класс балалары,

                    Барыбыз да дуслар без.

                      Һәркөн иртүк мәктәпкә дип,

                      Ашыгып киләбез без.

  2.

                      Без укыйбыз шатланып,

                       Йөрибез канатланып.

                       Без бит ялкау түгелләр,

                       Шуңа якты күңелләр.              “Бөрлегәнем – җиләгем”җырын

    3 .                                                                          солист белән башкаралар.

                       Әй, мәктәбем, сентябрьдә        (Г.Зәйнәшева сүз., А.Хөсәенов көе)

                       Кабул иттең кочагыңа.

                       Хәреф танып, укый-яза

                       Белми идек ул чагында.

     4.              Без хәзер беләбез инде

                      Дус һәм тату яшәүне.

                      Безнең хәзер канатлар нык

                       Һич белмәс ару- талуны.

      5.             Без бәхетле,шат балалар,

                      Уйнап- көлеп туймыйбыз.

                      Уйныйбыз да, җырлыйбыз да,

                      Шат, күңелле яшибез.                “Нәни музыкант” җырын хор      

                                                                                      белән башкаралар.

       6.            Бәйрәмсез бик күңелсез бит,

                      Күңелсездер сезгә дә.

                      Бәйрәмнәр кирәк безгә дә,

                      Бәйрәмнәр кирәк сезгә дә,

                      Кирәк һәммәбезгә дә.

        7.           Бәйрәмнәр бездә җитәрлек,

                      Үзе бәйрәм балачак.

                       Балачакның шат еллары,

                      Балачакның шат җырлары

                      Мәңге истә калачак.

       8.           Бүген дә бәйрәм итәбез

                     Эзтабарга керүне.

                     Шатлык дулкыннары били

                     Безнең нәни күңелне.

       9           Сезнең алда сүз бирәбез

                    Дус һәм тату булырга.

                    Үсеп җитеп, сау-сәламәт

                    Чын кешеләр булырга.

                “Күңелле балачак” җыры башкарыла.

       (Эзтабар таныклыгы тапшырыла)

Котлаулар, аерым концерт номерлары дәвам итә.