СЕДИКЕЛЬКСЭНЬ КУРМОТ-КАРМОТ

ПИВТЕМА ПАРЬ - скалоень пивтема чувтонь парь  

     Минек велесэ сонзэ теильть теке  ниле ужос горобиине вельтявкс марто, лиця ёнкссонть кшнинь кундамка-чаравтомка... 

     Те кедьёнксось ульнесь малав эрьва кудосо. Бути кинь арасель, эли яжавиль, вешильть шабрасто.   Васня таштыльть велькс (колмошка колмолитрань кедьгеть), каилизь парентень ды ушодыльть пивтеме - чаравтомо. Те тевесь саиль аволь аламо шка, секскак, эрсесь, чинь перть аштиль пивтень паресь велькс марто эзем лангсо, а  покш кудораськетнестэ кие ютыль ваксканзо (покш, эйкакш),  кундыль  кундамкантень-чаравтомкантень. Анок оенть  таргселизь парьстэнть ды ламоксть шлилизь кельме ведьсэ. Минь, эйкакштне,  кшинь покш печть марто училинек, зярдо тенек вадьсызь сынст ансяк пивтезь  ойсэнть. Эстенек кадовкшнось почодомс салсо... Зяро танстть! Пивтемадо мейле паренть парсте шлилизь пси ведьсэ... А анок оенть солавтылизь (седе кувать ванстовозо)  явсь каштомсо, пештнилизь апокшке суликань кедьгева (истя жо калязь каштом чиресэ) ды ливтилизь цюланс. Сонзэ эйсэ таншкавтнесть кашат, прякань топот (конатнень пансесть эрьва тарго чине ды лия покшчитнестэ). 

ЭРЯМОСТО САЕВКС

     Велень вейке  эрицянть яжавсь пивтень парезэ. Мольсь эсест буень базаров. Несь эрьва кодамо курмо-кармо ютксто эрявикс кедьёнкс. Кевкстни руз микшницянть: "Ёвтака, почём шолдор-болдор?" Микшницясь а сеске чарькодизе. Зярдо сырькаесь кармась  коштсонть  чаравтомо  кедьсэнзэ, рузось чарькодсь, мезе эряви рамицянтень.