Хыялына хыянәт итмәгән Муса

Хыялына хыянәт итмәгән Муса

   Муса Германиядән каникулга кайткан, укучылар белән очрашу өчен безнең мәктәпкә килергә җыена икән, дигән хәбәр таралды. Әлбәттә, мин мондый мөмкинлекне кулдан ычкындырырга теләмәдем. Көн дә Муса Маликов белән очрашу бәхете эләкми, шуңа күрә форсаттан файдаланып, үземне кызыксындырган сорауларга җаваплар алырга булдым. Сезгә дә кызык булыр дип уйлыйм.

• Муса, биш яшьтән үк инде син сәхнәләрдә чыгыш ясый башладың. Моның  сере нәрсәдә?
• Аның әллә ни гаҗәпләнерлек сере юк, чөнки әти – әнием талантлы кешеләр. Шулай да сәхнәгә юл күрсәтүче, юнәлеш бирүче әнием булды. Мин аңа зур рәхмәтле.
• Иң беренче нинди уен коралында уйный башладың?
• Кечкенә ике рәтле гармун иде ул, аннары әкренләп калганнарында да уйнарга өйрәндем.
• Мәктәптә укыганда сәхнәдә уйнап йөрүләреңнең сиңа нинди дә булса файдасы тидеме?
• Мин бит консерватория каршындагы махсус музыка мәктәбендә 12 ел саксофон классында укыдым. Төп укуга моның берничек тә зыяны була алмый.
• Беренче уңышларыңны хәтерлисеңме?
• Алар бик күп булдылар инде, һәрберсен хәтерләп бетереп тә булмый. Әмма балачактан иң истә калганы – Россия каналындагы “Утренняя звезда” программасында катнашуым. Ул вакытта миңа 12 яшь иде. Ә бүгенге көндә иң абруйлы  исемем – Рихард Вагнер исемендәге Халыкара премия бирелү.
• Кечкенәдән нинди хыял белән яшәдең, ул үзгәрдеме?
• Артист булу хыялы белән яшәдем һәм яшим. Хыялыма хыянәт итмәм, дип уйлыйм.
•  Нинди уку йортларында белем алдың, хәзер берәр кайда укыйсыңмы?
• Элеккеге КДПУның музыка факультетын тәмамладым. Шуннан соң Германиянең Франкфурт-на-Майне шәһәрендәге консерваториянең аспирантурасын бетердем. Бүгенге көндә докторантура факультетында белем алам.
• Германиядә уку һәркемгә дә эләкми. Сиңа ничек мондый бәхет елмайды?
• Үз тырышлыгым белән урнаштым. Әгәр дә үз –үзеңне күрсәтә алсаң, талантың булса, андый зур проблема түгел инде ул.
• Алман иле сиңа кайсы яклары белән ошый?
• Бу ил үзенең чисталыгы, пөхтәлеге һәм халкының төгәллеге белән миңа ошый.
• Киләчәккә нинди планнар белән яшисең? Чит илдә калумы, әллә үзебезнең Ватаныбызга хезмәт итүме?
• Докторлык диссертациясен яклаганнан соң, илебезгә кайтып, татар халкына хезмәт итү.
• Буш вакытың, мөгаен, юктыр, шулай да ялларыңны ничек үткәрергә тырышасың?
• Үз сәламәтлегемне кайгырту максатыннан, атнага ике тапкыр спортзалга йөрим, китаплар укыйм. Германиядә инде 14 ел яшим, шуңа күрә хәзер күбрәк немец телендәге китапларны  укыйм, театрларга йөрергә яратам.
• Традицион сорау:  укучыларга нинди теләкләр теләр идең?
• Иң беренче мәктәптә төпле белем алырга, чөнки белемнең нигезе мәктәптә салына. Югары уку йортына керергә тырышсыннар һәм кемнәндер, нәрсәдер көтеп ятмыйча, үзләре дә эзләнсеннәр, музыка, спорт мәктәпләренә йөрсеннәр, вакытларын әрәм үткәрмәсеннәр. Китаплар, театр – музейлар  кызыклы шәхес тәрбияли.