Къайдан кельсин халкъыма хайыр?

Къайдан кельсин халкъыма хайыр?

     Баарь йыл мевсими...Табиат къатты къыш юкъусындан уяна. Эр ер ойле     дюльбер ки, чевре-четке бакъкъанда, гонълюнъ хош ола.  Бугунь-ярын къушлар да  узакъ диярлардан мекянына къайтып келеджеклер.

    Акъшам олаята.  Кунеш энди булутлар арасында сакъланмакъта. Серин ельчик эссе де, авасы салкъын дегиль. Кокте бирер-бирер йылдызлар пейда олалар. Олар о къадар дюльбер ки, тап бакъып къалдым. Бир ань оларнынъ арасында бир йылдыз айры тургъан киби  корюнди. Козьлерим шу йылдызгъа тикилип къалды. Бир кереден акълыма рахметли къартбабам кельди....Йырлагъан йырлары этильгендай олды... Севимли къартбабам...Мен  Сизни  корип оламадым, сырларымны сизге  ачып оламадым. Лякин насыл аджайип инан олгъанынъызны анамнынъ икяелеринде ишиттим.   Билесинъизми, семетдешлерим,  насыл о,  Ватанынъны севе эди!  Санки дерсинъ шимди  де юксеклерден Къырымгъа бакъып, озь кечмишини хатырлай, Шу дакъикъаларда мен къратбабамнен субетлешкендай олдым. О, Ватанымызнынъ алыны корип, тюшюнджеге дала....

   Азиз къратбабам! Мен де, Сиз киби, Къырымны пек севем. Шу топракъ мен ичюн Ватандыр,  чюнки мен мында догъдым, ильк адымларымны яптым, достларымнен таныш олдым... Шу гузель дияр-эдждатларымнынъ мекяны. Къырымгъа севгимни анълатып оламам, о садедже меним къальбимде яшай. Къырым! Меним азиз ве севимли Къырымым, дюньяда энъ аджайип ве дюлеьбер ер!

    70 йыллыкъ сюргюнликтен  ватандашларымыз Къырымгъа къайтып кельген сонъ янъы аят къурып башладылар. Къырымнынъ чешит кошелеринде къырымтатарлар  топлу яшагъан янъы къасабалар пейда олды. Шу эвлерге бакъкъанда шашып къаласынъ.Эр бир къасабада ачылгъан джамилерден эзан сеси эшитильгенде, гонълюмде бир енгиллик пейда ола.

Асылында, Ватанымызгъа къайткъан сонъ семетдешлеримизнен чокъ шейлер япылды, Шеэрлерде ве къасабаларда миллий мектеплер ачылды, нидже-нидже янъы китаплар ве дерсликлер басылды. Я бизим къырымтатар театрмыз! Анда кирьгенде, санадаки пьесаларны бакъкъанда, гонълюнъ хош ола! Я чалгъы такъымлары! Я яш-яш йырджылар, оюнджылар! Олар эписи-Ватанымызнынъ огъул ве къызлары.

    Эльбетте, бизлер янъы омюр къурмакъ ниетиндемиз. Япылгъан ишлерининъ эсабы ёкъ. Лякин, языкъ ки, озь топрагъымызнынъ саиплери дегильмиз. Бундан да гъайры, бизим дюльбер ана тилимиз аджыныкълы алда.

Беллесем, мында биз озюмиз де къабаатлымыз.Эр кунь башкъа миллетининъ тилине, аньанелерине даа якъын оламыз. Не ичюн? Замангъа уймагъа тырышамызмы? Не олды я бизлерге? Эр кеске белли ки, тиль олмаса-миллет ёкъ. Беллесем, чокъ кечмеден, бу фена ал халкъымызны Ер курресинден ёкъ етеджек. Бу азиз топракъта асырлар девамында къалдырылгъан излер силинеджек. Не япамалы? Къайдан тапайыкъ биз хайыр?

    Бу джиддий меселени тек биз озюмиз чезип оламыз. Амма ашыкъмакъ керекмиз, ярын дегиль де, энди бугунь башламалы. Ватанымызда учь несиль олып яшаймыз. Эр биримиз озь иссесини къошмакъ керек, чюнки къартана-къартбабаларымыз бизим нумюнемиз олса, ана-бабаларымыз-таянчымыздыр. Биз исе, яш  несиль, -Къырымнынъ келеджегидир. Юреклеримизде олгъан ватанпервер дуйгъуларыны уяндырайыкъ.Миллетимизге садыкъ олып,   бири-биримизнен бирликте яшайыкъ. Буюклерни урьмет этип, кичиклерге козь-къулакъ олайыкъ. Къырымнынъ эр бир кошесинде бизим  дюльбер тилимиз, тылсымлы тюркюлеримиз, аджайип аваларымыз янъгъырасын!

    Ай орталыкъны ярыкълатты. Бойле тюшюнджелернен эвиме кирдим. Мусафир одасында ерлешкен эскиден къалма пластинканы элиме алдым. Агъаргъан арифлернен «Февзи Билялов» деп язылгъан. Явашчыкътан эски проигрывательге къойып, «Эльмаз» йырыны динъледим. Кене тюшюндим...

     Севимли къартбабам, эминим ки, бирликте, Ватангъа ольчюсиз севгисинде халкъымыз хайыр тапар ве эдждатлар топрагъында бахтлы яшар.