Шенелде чаш шулуктер

Республика чергелиг шүлүк мѳѳрейинге киржикчиниӊ

ат-сывы

Дайынчы эр

Ада-чурттуӊ, арат-чоннуӊ тайбыӊы дээш

Аас-кежик ѳѳрүшкүлүг келир ѳй дээш

Тѳрээн чуртун, тѳрел аймаан арттырып кааш

Тывам оглу ханныг черде тулчуп чоруур.

Ханы изиг, эрес дидим тыва эрлер

Хааржакка чежезин маӊаа эккелбээн дээр

Хары дайын дүрген дооступ соксаан болза

Хамык кижи шупту ѳѳрүп-хѳглээн болза.

Чангыс чурт дээш эгелээн бо дайын-чаазы

Чылдар -биле аай-дедир удурланчып

Чеже кѳвей аныяк чаш оолдар чидип

Черниӊ адаа кара черни кѳрбээн дээрил.

Адазындан, иезинден чоруй баргаш

Аныяк оол чүнү бодап чоруур ирги

Амы-тыны бүдүн-бүрүн чанып кээр деп

Авыралдыг бурганынга тейлеп чор боор.

Амыр-тайбыӊ үе черле чедип келир

Аразында чурттар черле эптиг апаар

Амдыызында чаза дыка дүвүревейн

Ак сүттүг шайыӊарны ѳргүп чоруӊар!

25.03.23ч.

Башкыларга мѳгейиг

Башкы деп сѳс каш ханы утка сиӊген

Баары эриг, буян долган кижилер-дир.

Эртем-билиим делгем оруун эгелеп каан

Энерелдиг башкыларымга мѳгеер мен.

Демир-үжүүм холга тутсааш айыткаштыӊ,

Девидевейн, аяар, чараш бижи дээштиӊ,

Дедир мени кѳгүтпүшаан ѳѳредип каан,

Дендии ынак башкыларымга изиг байыр!

Ажы-тѳл дээш бүгү күжүн үндүрбүшаан,

Ажылынга сеткилинден бердиниптер,

Аажы-чаӊы сүт дег хоюг, хем дег арыг,

Авазы дег кижи дээрге башкы ол-дур.

Эӊ-не берге үелерде чѳленгииш боор,

Эки-бакта сагыш-човап холун сунар,

Эжи-даа боор, ийи дугаар авазы боор

Эргим ынак башкыларга "четтирдим" дээйн.

Чырык черге башкы кижи турбаан болза,

Чырык угаан, дээди эртем кайыын келир.

Чымчак сеткил, буянныг-ла башкылардан

Чылдар ишти аас-кежик ыравазын.

Аарыг-ажык башкыларны оюп чорзун,

Ажы-тѳлү кезээ-шагда ѳѳртүр болзун,

Амыдырал - чуртталгавыс эге оруун

Ажыдып каан башкыларга мѳгеели.

16.05.2023ч.