Цыренова Бальжан. Аглаг нютагни һайхан

Минии  баабай

Ажалда дуратай баабайм

Адуу малаа харадаг.

Багаһаам намай хараһан

Баабайм намдаа һайхан.

Холо һуража байхадаа

Ходол һанажа ябанаб.

Намайгаа эрхэлүүлдэг баабайм

Намдаа ехэл хайратай.

Ургы

Үбэлэй саг үнгэржэ,

Урин хабар болобо.

Наратай дулаан үдэрнүүд

Нютагтам буужа ерэбэ.

Талын саһан хайлажа,

Түрүүшын ургы сэсэглэбэ.

Хүхэ сэсэг хаража,

Хүнүүд ехээр баярлаба.

Хабар

Газар дэлхэй һэргэжэ,

Горход хайлан урдаба.

Уужам дайдын энгэртэ

Ургы сэсэг һалбарба.

Дууша шубууд барандаа

Дулаан оронһоо бусаба.

Гоёхон наратай хабар

Газаамнай буужа ерэбэ.

Бухалшан

Жороо мориёо ташуурдан,

Жолоо барин хатаруулжа,

Бухал шэрэнэб баяртай-

Бухалшан гэжэ солотой.

Жороо моринойм түргэндэ,

Жолоо минии бариһанда,

Үндэр олон бухалнууд

Үсөөрэн байна талада.

Хүдөө зоной заншалаар

Хүбүүд басагад бултадаа

Ажалша малша гэртэхиндээ

Аһан шадалаараа туһалнабди.

Ёохор

Сагаан һара гаража,

Сагаалгамнай буубал даа.

Арадайнгаа һайндэр угтажа,

Арад зомнай баяртайл даа.

Гараа шанга барилсан,

Гараабди булта ёохортоо,

Хонгёо аялга татан,

Хатараабди тойрон бултадаа.

Арад зондом хүндэтэй,

Алдар суута хатарнай

Саг жэлэй ябаашье һаа,

Саашаа хүгжэн байг лэ!

Минии нютаг – Гутаарта

Хүбшэ тайгаар элбэг,

Хада уулануудаар үндэр,

Аршаан булагаар суурхаһан

Аглаг нютагни һайхан.

Хүдөө уужам тоонтодоо

Хэтын жаргал эдлэжэ,

Арадайнгаа  заншал сахижа,

Аха захатанаа хүндэлжэ,

Бугата обоогоо тахижа,

Булта эбтэй ажаһуунабди.

Эгээл дүтөөр һанагдаһан

Энхэ минии нютагни!

Сэдьхэл зүрхым эзэлһэн

Сарюун минии Гутаартам!

Эжымни захяа

Эдир бага наһанһаа

Эжыдээ эрхэлэн үндынэб,

Эльгэ зүрхэндэм дүтэ

Эжым намдаа хайратай.

Эрдэм бэлиг шудалхыем

Хэжэнгэ намай үдэшэдэг.

Эрхим һурагша болохыем

Энхэрэн захижа байдаг:

«Багшын үгэ дуулажа,

Номоо эрхимээр үзэжэ,

Хүндэ ходо һайниие хэжэ,

Нэрээ гамнажа ябаарай».

Эжынгээ  захяа  үгэнүүдые

Мартангүй ябахаб хододоо.