Мои публикации в СМИ

Янаул ёросысь Каймашабаш гуртысь «Зангари» нылпи садэ пырыку, вы¬жыкыл дуннее шеди, кожалод. Чебересь сяськаос пӧлтӥкыстӥськись сюрес тунсыко «гондыръёс», «лудкечъёс», «жирафъёс», «тӧдьы юсьёс», «валъёс» доры вуттэ. Адями киосын тупатэм пӧйшуръёс шоры учкыса валаськод: татын пичильтыкъёслэсь дырзэс тунсыко но пайдаё ортчытон сярысь сюлмаськись ужасьёс тыршо.

 «Зангари» 1988-тӥарысен ужа. Усьтӥськем дырысеныз нылпи садэн Роза Борисовна Пазиуллина кивалтэ. Кема аръёс ӵоже пиналъёслэн дуннеязы ужам кивалтӥсь ужасьёсызлэсь тыршись, быръем ужзэс гажась луэмзэс пусъе.

Тыршемлэн «емышъёсыз» вормон бордын, шуо. Роза Борисовналэсь усто кивалтӥсь луэмзэ «шыкысаз» люкаськем Данъян грамотаосыз возьмато. Соос пӧлын БР-ысь Дышетонъя министерстволэн, БР-ысь удмуртъёслэн НКЦ-зылэн, Янаул ёрос администрацилэн ӵектэмъёсыз но вань. Кема ӧвӧл кивалтӥсьлэсь ужзэ РФ-ысь Дышетонъя министерстволэн Данъян грамотаеныз дунъязы.

- Выль дышетскон аре нылпи юртъёсты дасянын ми ёросамы нырысетӥ интылы кузё луим. Бадӟым вормон ужасьёс понна но, нылпиоссэс «Зангарие» нуллӥсь анай-атайёс понна но шумпотымон луиз, - данъяськыса вера Роза Борисовна. - Нылпи садын тупатъян ужъёсты радъян сярысь ужасьёс но анай-атайёс сюлмаськизы.

Туннэ нуналэ нылпи садэ 33 пиналъёс ветло. Соосын воспитательёс Лариса Миншарапова но Инга Шайхутдинова ужало. Лариса Витальевна татын 15 арлэсь кема ужа ини. Усто, трос тодэмо визьнодась нылпиосын ӝог огкыл шедьтыны быгатэменыз висъяське, пӧртэм ужрадъёсы но азинлыко пыриське. 2012-тӥ арын «А ну-ка, воспитатель» ёрос конкурсын со «За преданность профессии» номинациын нырысетӥ интыын луиз. Лариса Витальевна нылпи садэ ветлӥсьёс понна радъяськись «Умелые руки» кружокен но кивалтыны вуэ. Нылпиосты со пӧртэм киужъёслы дышетэ.

Инга Зайдулловна «Зангариын» куинетӥарзэ тырше. Азьвыл школаын ужаса, пичильтык дуннее шедем воспитатель пальпотыса шуэ:

- Пӧртэм аресъем пиналъёс ваньзы ӵошен бере, нырысь секыт йӧтэ вал. Али дышиськиз ини. Соосын вакытлэсь ортчемзэ ик шӧдытэк кылиськод. Нылпи сад – со туж тунсыко, аспӧртэм дунне, шуыны луэ.

«Зангарие» ветлӥсь пиналъёсын воспитательёс анай кылынызы верасько. Ӟуч кылэз, башкир культураез дышетонлы но татын бадӟым саклык висъяське. Роза Пазиуллиналэн кылъёсызъя, пӧртэм ласянь азинскем пиналлы бӧрысь бадӟым улонэ вамыштон капчиен сётӥське. Соин ик пичиослы пӧртэм пумо тодон-валан сётон сярысь сюлмаськоно.

Нылпи садын пӧзьтӥськись Марина Шарафисламова, воспитательлэн юрттӥсез Назима Бадамшина но сторож Людмила Тимирзянова но кемалась ужало ни. Соослэн ужъёссылы но Роза Борисовна вылӥдунъет сётэ.

- Нылпи садмы тыршыса, кутскем ужзэс йылаз-пумаз вуттыса ужасьёс луэмен азинске, вормонъёслы кузё луэ, - вера кивалтӥсь.

Каймашабаш бадӟым гуртэн лыдъяське. Соин куддыр «Зангариын» нылпиослы инты пумысен шуг-секытъёс но кылдо. Али дыре Роза Пазиуллина кыкетӥгруппа кылдытон сярысь сюлмаськонэн улэ. Солэн верамезъя, матысь дыре татын ясельной группа усьтыны чакламын.

Зангариос гуртын радъяськись ужрадъёсы но ӵем пырисько. Пичильтыкъёс гуртооссылы жингырес кырӟанъёссэс но задор эктонъёссэс кузьмало.

Миляуша БУЛАТОВА.

Янаул ёрос.

http://gazeta-oshmes.ru/