ЛОВНОДО ЭРЗЯНЬ КЕЛЬСЭ!

Дова

Мирдевтеме од авинесь кадовсь,

Кавто эйкакшт сюлмизь кедьпензэ…

Теке тусь пильге алдонзо модась.

Ризксэнь шаршавт вельтизь  сельмензэ.

А неи пертьпельксэнь мазынть тунда,

Цёковтнень морамост а мари…

Ашти теке нармушкине кундазь.

Мерят, апак лексе сон эри…

А марят кургостонзо ве валгак,

Ловносак ансяк чамастонзо:

Довась эрьва чи сюды те войнанть -

Саизе валдонть кудостонзо…

Сёрма СВО-сто

Тетяй-авай, арсян шумбрачи!
Монськак шумбран, сюкпря Пазнэнь!
Тюремань паксясолинь течи,
Адонь толсонть изнямс ознынь…

Снарядтнэ перька коштонть керсить…
Тетяй, кирдян валот прясо:
- Удалов ки, цёрам, а эрси,
Бути масторот тол потсо!

Покштянь кедесь свал лавтов лангсон ,
Вайгелензэ марян чить-веть:
- Изнинек минь Ине войнасонть!
Нуцькинем, шка сась ней тонеть!

Ятонть каршо стинь весе сэрьсэ.
Бути а мон, сестэ кие?
А макса шлямс мастором верьсэ.
Сон весемеде тень питней!

- Чачить эйкакшон, нуцькан тесэ, -
Арсематнень марто эрян…
Кадык свал чись пейди менельсэ.
Тень кис, тетяй-авай, тюрян!

Тиринь велем

Пек вечкса мон чачи велем.

Тесэ гайги эрзянь келем…

Сехте мазый тиринь ёнксом

Ёвтни тень вечкевикс ёвксон!

Нуясь велем пильге песэ:

Кундсек калт, экшеляк тесэ…

Пиже вирне инжекс терди,

Кстыев пандынеть  якстердить.

Церькованок  сия сравты,

Веле куншканть мазылгавты!

Эрьва тевсэ минь свал вейсэ!

Морот гайгить тиринь кельсэ!

***

Ашо пухляня вельтявкссо

Ацамков ацы моданть.

Седеем тапазь мелявкссо:

Пряст андсызь нармунть кода?

 Пиштякатне а кадомат!

Покштянь марто мельс прынек.

Анок нармунень андомка!

Вальмалов понгавтынек!

Сёлмов оят эрьва валске

Вешить ярсамо, вешкить...

Почодан тенст суро ямкскеть,

Пекест свал улест пешксеть!

                                                     *     *     *

Кунсолы кискинем пилень стявтозь

Вейсэ мольтяно войнав кода…

Яжасынек арсеманзо ятонть,

Олякстомтсынек тиринь моданть!

                Изницякс велявтано минь кудов.

Кутмордасамизь эрзянь велесь…

Бути эряви, мольтяно одов -

Ушманом марто вейке мелесь!

Изнякшны войнасо свал ояксчись:

Ломантнень ютксо, ракшинетнень…

Казеде седейлембенк эрьва чи

Перька весе эрицятненень!

Минь – вирень ялгат

     Тундонь вейке чистэ велень эйкакштне мольсть вирев. Сонензэ совамсто редясть кавто сёрмадовкст: «Ялган – витев!», «Ятон – кершев!». Седе ламотне эйстэст пурдасть вить ёнов, а кить арсесть, што ялгакс эрси ансяк ломань, аволь кодамояк вирь, пурдасть керш ёнов.  

      Вить ёнов туицятне чалгсесть цецясо викшнезь пиже кумбо ланга. Кода тесэ паро! Кодамо мазый ды ванькс пертьпельксэсь! Вирень цецятне кончтнить эрьва кодамо тюсонь сельминесэст, истя пачтить эсь кенярдомаст инжетненень. Парсте содыть, кияк сынст а сезьсынзе, а ёртсынзе.  Коткудавтнеяк а кекшнить, а кадыть важодема тевест. Вана кодамо «покш чувто» кандыть мирём кудынезэст! «Важодицятне» истя жо содыть, кодамояк зыян а кандыть вакска ютыця «великантнэ». Валдо пиже тюссонь палясо чувтынетнеяк аволить тарадсост, шумбракстнить мартост.  А кода мазыйстэ таргить эсь морост вирень нармунтне! Паро концерт тейсть инжест туртов. Истя сынь ёвтыть сюкпря тенст секс, мекс тельня эзизь кадно вачочинь кирдеме теле лангс кадовиця родняст-раськест.

      Ояксчисэ эрить тесэ весе: и виресь, и ломанесь…

     А керш ёно весе мекевланг... Тесэ эйкакштне эзть маря мазый гайтть, ансяк пильгало коське тарадонь цятордома. Мик чинь налтнэяк а снартнить тей понгомо. Цецинетнеяк, ансяк марить кодамояк кашторкс, сеске кекшить сельминест, комавтыть пряст.  Пелить улемс сезезь ды ёртозь. Коткудавтнеяк эрьва эскельксэнь теемадо мейле кунсолыть, арась ли маласо зыянонь кандыця. Бути мезе, сеске кадсызь тевест ды орголить кекшема таркаваст. Чувтотнеяк пелить савтомс кежть тарадкень лыкавтомасо. Аштить теке ушмант постсо. Нармунень морояк виренть те пеле а марят! Эдь сынь морсить ансяк сестэ, зярдо весе вакссост уцяскавт. А тесэ костояк а неят кеняркс, весе пертьпельксэсь стазь кодамо-бути потмурачисэ, пелемасо… Тесэ весе пелить прявт ятодост – ломанденть.

    Виренть те пеле эйкакштненьгак куродызе кодамо-бути пелема ды сынь капшазевсть лисеме тестэ. Вастовсть вить ёнов туицятнень марто сёрмадовкстнэнь вакссо. Тонат апак лотксе ёвтнесть виренть мазычиде, ваньксчиде, инжень вечкемадо. А керш ёндо сыцятне ансяк чатьмонезь кунсолость. Вейке ашназа пря цёрынесь весемень пельде пачтясь, што течинь чистэ саезь сыньгак кармить улеме вирентень паро ялгакс. Эряви теемс вейке сёрмадовкс «Минь – вирень ялгат!».  Виренть илязт уле ятонзо. Кадык сон свал ули уцяскав!