Посвящаю детям (стихи на эрзянском языке)

 Талны оймем, кармавты сёрмадомо...

Ольга Антипова

Тантей прякинеть.

Луга ланга тулевкс чийни,

Прянзо лангс, секень вант,сти…

Оинензэ пилес бийни:

Тантей прякинест улить.

-Скалось макссь миненек велькске,

Ойгак венстсь пешксе кече.

Авинем монь, седей пелькскем,

 Чевтине чапакс ичесь…

Оинензэ-ракшинетне

Сельмень тетькезь кунсолыть…

-Лангост мазыйнеть, тюжинеть,

Бути сускат, кургс солыть.

Сурксокс мендявозь пулынесь

Прякинень нильнезь корты:

-Авам пансь эйстэдест ламо,

Таргонь перть тенек сатыть!

   Лекш.

Чувтт, куракшт,прок боярават,

Сельме эйстэдест а саят...

Лекш, виензэ апак вансто,

Тейнесь кудрят тенст наянсто.

Арсян: ансяк минек велесь

Эли, паряк, весе пельксэсь

Истямо ашо, цитниця,

Колазь ежинень витиця?

Телень вармась прась энгамос -

А правтни кудрят,оршамот...

Озась лей потмаксс, а лекси,

Ансяк сельмечирькеть кепси...

Кискине онги, нать, ордадсь -

Куринказо мекс эзь содавт...

Ардтни, чувттнэнь лангс кайсети,

Пулозо кежденть кепсети.

Вальмало килеенть тёкшкес

Вирьстэ шекшатыне лотксесь.

Нерьсэнзэ ушодсь «карамо»:

"Ванодо – кодамо паран!"

Позда сексь.

 Сексесь сыре ломань теке

Палка лангс нежедсь, арси:

«Туемс, каня, тень, а туемс?

Телесь кочкаряс чалгси…

Ломантненьгак мелест мольстинь,

Пурнаса стака канстом-

Сайсынь пиземень, рудазон,

Потмура чинтькак мартон…»

Сексенть арсеманзо сезевсть-

Од атякшке друк рангстась.

Венть човоризе чинть марто,

Превстэ лиссь, нать, пиштякась.

Тесэ мельганзо лияткак

Од вайгельсэст кошт сезнить…

Ансяк сексесь а чарькоди-

Панить сонзэ, эль кирдить?…

"Урознэть"

Кизна вейке чистэ

Пангс вирев якинь.

Нать, эзь ульть пиземе:

Вешнемстэ майсинь.

Велькссэнь норовжорчось,

Маряви, лездась.

Гайтев моросонзо

Курот тень ёвтась…

Пешкедсь монь паргинем.

Шка сыргамс кудов.

Варштавинь пертьпельга

Ды коминь одов.

Тикше, лопа потсто

Лангозон ваныть

Вишкине пангинеть

Монень энялдыть.

«Тетясто – авасто

Илямизь яво…

Мука тенек тарка.

Вант, элеть чаво!»

Пурнынь мон «урозтнэнь»

Састыне сыргинь.

Пангинетнень марто

Кудос самс кортнинь.

Панго мельга

Вечкан кизна валскемарто

Панго мельга мон якамо.

Вечкан вастнеме чинть стямонть,

Мазычи оймес таштамо.

Перькан куракшт, сэрей чувтот

Чокшнень оност монень ёвтнить.

Ки чирева мазый цецят

Ведьбайгинесэст тень кончтнить.

Норовжорчтнэ од морынест

Васняяк монень морасызь.

Кукордыця сёрмав кукот

Эрямо иень ёвтасызь.

Вастыть эйсэнь ашо килейть,

Тикшесь токши видьстэ карксос.

Кенярксом а кельги мештес –

Каинь васень панго паргос.

Варма ялтке пувась састо:

«Пангот оно тува вешнек…»

Сюк, Вирява. Эзинь фатя,

Кода паргинем уш пешкедсь.

Паксянь виде кива

Паксянь виде кива

Стамбарнэ чалгсян,

Пертьпельга вановтом

Мизолдозь кайсян.

Кинть чирева цецят -

Менелень кондят,

Тошкить весеменень -

Сынь паксянь ялгат.

Веёндо пилезэнь

Куко пеняцясь -

тякат а кунсолыцят

Чопода вирьс кадсь...

Вана пильгем алдо

Нармушка ливтясь,

Вишка сёрмав алнэть

Пизэс алыясь.

Пульзинь кумажа лангс,

Алнэтнень ловнынь.

"Карми покш семия", -

Тенень пек кецнинь.

Вере норовжорчось

Теке поводезь.

Паксянь эрямодонть

Морась чоледезь.

Чувар лангсо

Тетям усксь вальмалов чувар,

Кенярксонок зярошка!

Весе куринкань эйкакштнэ

Печтить тесэ весе шкаст.

Кить венстявсть чуваронть эзга,

Кудот стявтсть эрьва кува.

А куншкасост - мазый-мазый

Купол марто церькова.

Валскестэ чокшнес эйкакштнэ

Эсь "велинесэст" эрить.

"Садо кудов куш мадеме!" -

Сыненст аваст сеерить.

Тетям прясонзо чаравты:

"Вана косо уцяскась!

Кадык седе курок касты

Эйсэст кизэнь шкась!"

Мекшень кундсицят.

(мизолкс)

Сырькаем тень ёвтнекшнизе,

Алкукс те тевесь ульнесь,

Невтекшнызе натой, кува

Сравтовкшнось нешкепирест.

Кудосо цёрат эзть ульне.

Шабрась вальмава пачтясь:

Пире песэ леенть чирес

Мекшень семия оймась.

Урьват - парыят капшазевсть,

Леенть ёнов напустясть.

Крута лей чирень мештентень

Мекштне покш кирекс педясть.

Чачонть сеткасо вельтизе,

Парыясь яла капшавтсь:

- Седе курок макст сувтеме!

Тенстьке венсть. шканок арась!

Пильгень путнезь сыргась састо.

Зярдо пачкодсь тунь малас, -

Кенерсь мекштнень сон нардамо.

Чаразь тусь леенть потмаксс.

Мекштне, мерят, текень учнесть,

Бизныть, пупсить токицяст.

- Васоло - аволь потмаксось?

Уряжонть кевкстнесь прыцясь.