Рабочая программа по родному (мокшанскому) языку 5 класс 2017-2018 уч.год.
календарно-тематическое планирование (5 класс) на тему

РАБОЧАЯ ПРОГРАММА

учебного курса «Мокшанский язык» в 5  классе

                                                   Составитель:  Моисеева Людмила Михайловна

2017 - 2018

                      Тонафнемань курсть основной целенза: Максомс сатомшка содамошит фонетикаса, лексикаса; пачфтемс марнек эряфса кяльть асувонц сяда тов касоманц и виияманц колга 

Тонафнемань курсть характеристикац: Рабочай программась тиф Мордовия Республикань Образованиянь Министерствать программанц коряс М.А Келин, Т.И.Ломакина «Мокшень кялень программат 5-11 классненди» (Саранск «Красный Октябрь» типографиясь 2001к.), рецензентсь О.Е.Поляков.

5-це класса тонафневихть синтаксиссь (нюрьхкяняста), фонетикась, графикась и орфографиясь, лексикась, валонь пяльксне и валонь тиевомась. Сембоц макссеви 68 част.

 Тонафнемань эрь кизоть ушедомста и аделамста ётафть лятфтаманкса программаса нолдафт башка частт. Синь эрявихть ётафтомс васендакиге ся пялькснень и тематнень лятфтамста, конатнень тонафнихне содасазь сяда лафчста. Оцю мяль шарфтави марнек ётафть шарьхкодеманцты.

Темань тонафнемда меле ётафневихть контрольнай работат. 5-це класса 7 диктантт. Тя тиендеви теоретическяй содамошитнень маштомошитнень кемокстаманкса и корхтама маштомать касфтоманкса. Корхтама маштомать касфтоманкса работатне программаса занцихть сатомшка васта и макссевихть эрь класса тонафневи теоретическяй материалть мельгя: 5-це класса 18 част.

  Программаса эрь разделти и темати максфт башка част.

          Лия предметтнень мархта соткссь.

        Кяльть тонафнемста оцю мяль шарфневи лия предметтнень мархта соткссь. Сембода кемот ня сотксне кяльть и литературать ёткса, сяс мес кяльть тонафнемста дидактическяй материалсь сявондеви васендакиге художественнай литнратураста. Корхтама маштомать касфтомаса ламоц работатневок фкат литературать мархта (сочинениятне, изложениятне, азксне, планонь сёрмадоматне и стак тов)

        Кирдевихть соткст биологиять, географиять, историять и лия предметтнень мархта. Сявондевихть синь корязост текстт, эрь кодама работат (ётафтомс рузонь кяльста текст, арьсемс валрисьмот, сёрмадомс сочиненият, изложеният и стак тов).. ванондовихть урокса мокшэрзянь композиторхнень и художникнень произведениясна, синь лац лездыхть содамс мокшетнень и эрзятнень седиснон-ваймоснон, эряфснон.

           Ценностнай ориентирхне: Мокшень кяльсь школаса кода тонафнемань предмет занци пяк эрявикс васта, сонь оцю тонафнемань и цебярь потмовиень касфтомань смузец.

Школаса родной кяльсь тонафневи сянкса, штоба анокламс культурнай, сембе ширде содай ломатть, максомс тейст мокшень литературнай кяльса морафтомань, корхтамань и сёрмадомань содамошит.

Шачема кяльть цебярьста содамац пяк лезды келептемс аерьфпяльть колга содамошитнень, сон максы пара лезкс рузонь кяльть тонафнемста, грамматиканц, марнек козяшинц и виенц шарьхкодемста.

Курсть тонафнемань результаттне: Тонафнихненди эряви максомс сатомшка содамоши родной кялень фонетикаста, лексикаста, морфологияста, валонь тиевомаста, синтаксиста и стилистикаста; пачфтемс марнек эряфсакяльть асувонц колга, сяда тов касоманц и виияманц и масторлангонь лия кяльхнень ёткса сонь вастонц колга. Шачема кяльть лезксонц вельде, сонь лангозонза нежедезь, эряви касфтомс иттнень логическяй мяльснон-арьсемаснон, ёжемарязь морафтомань и корхтамань маштомошиснон. Максомс сёрмадомань, пунктуациянь и интонациянь кеме маштомошит, кеподемс синь мяльснон цебярьста содамс, кельгомс и ванфтомс тядянь-алянь кяльть.

Лия предметтнень мархта соткссь.

        Кяльть тонафнемста оцю мяль шарфневи лия предметтнень мархта соткссь. Сембода кемот ня сотксне кяльть и литературать ёткса, сяс мес кяльть тонафнемста дидактическяй материалсь сявондеви васендакиге художественнай литнратураста. Корхтама маштомать касфтомаса ламоц работатневок фкат литературать мархта (сочинениятне, изложениятне, азксне, планонь сёрмадоматне и стак тов)

        Кирдевихть соткст биологиять, географиять, историять и лия предметтнень мархта. Сявондевихть синь корязост текстт, эрь кодама работат (ётафтомс рузонь кяльста текст, арьсемс валрисьмот, сёрмадомс сочиненият, изложеният и стак тов).. ванондовихть урокса мокшэрзянь композиторхнень и художникнень произведениясна, синь лац лездыхть содамс мокшетнень и эрзятнень седиснон-ваймоснон, эряфснон.

«Мокшанский язык» дисциплинать содержанияц

1-це разделсь. Кяльсь – корхтамань инь эрявикс средства.

2-це разделсь. Начальнай класснень эса тонафнефть лятфтамац.

                Валсь. Валть пяльксова явомац.

                Корхтама пяльксне. Самостоятельнай и служебнай корхтама пяльксне.

                Валрисьмось. Валрисьмонь главнай и зависимай пяльксне. Аф распространённай и распространённай              валрисьмотне.

3-це разделсь. Синтаксиссь. Пунктуациясь. Цебярьста корхтамась.

Валзюлмось. Валзюлмоса главнай и зависимай валхне. Валзюлмось и валрисьмось, синь ётксост аф фкаксшись. Корхтамать целенц коряс валрисьмотнень видсна: азондомань, кизефтемань и кошардомань. Серьгядемань валрисьмотне.  Валрисьмоть главнай пяльксонза: подлежащайсь и сказуемайсь. Валрисьмоть зависимай пяльксонза: дополнениясь, определениясь, обстоятельствась. Кафта главнай пялькс мархта аф распространённай и распространённай валрисьмотне. Фкя составонь валрисьмотнень шарьхкодемсна. Однороднай пялькс мархта валрисьмотне. Однороднай пялькснень ёткса и, а, но союсне. Однороднай пялькснень видеса запятойсь. Пъшкядемась. Пъшкядмать видеса лотксема тяштенятне. Союз мархта валрисьмотне, Мзярда эрь пялькссь моли кафта пялькс мархта. Запятойсь сложнай валрисьмоть пяльксонзон ёткса и, а, но, што, штоба, сяс мес, кона, кодама, мзярда, къда, коса  валхнень инголе. Виде корхтамась. Виде корхтмась авторть валда меле и инголе. Виде корхтамать видеса лотксема тяштенятне. Ламонь корхтамась. Ламонь корхтамать шарьхкодемац. Ламонь корхтамать видеса тиресь.

Маштомс:

• вайгяльть лац вятема азондомань, кизефтемань, кошардомань и серьгядемань валрисьмотнень азомста и       морафтомста;
• выразительнайста ламонь корхтама текстонь морафтома;
• синтаксисонь коряс аф пяк сложнай текстти лотксема тяштенянь путнема и путнемаснон азома

4-це разделсь. Фонетикась. Графикась и орфографиясь.    Цебярьста корхтамась.

Корхтамань вайгяльксне. Корхтамань вайгялькснень тиевомасна. Гласнай и согласнай вайгяльксне. Слогсь. Валхне слогова явомасна. Гласнай вайгяльксне. Рядонь коряс гласнай вайгялькснень явомасна кяльть кеподеманц коряс гласнай вайгялькснень явомасна. Тървань и аф тървань гласнайхне. Согласнай вайгяльксне. Кайги и аф кайги согласнайхне. Калгода и ляпе согласнайхне. Ударениясь. Орфоэпиясь. Вайгяльксне и букватне. Фкя строчкаста омбоцети валонь ётафтомась. 

Маштомс:

• гласнай и согласнай вайгялькснень признакснон содама и азома;
• валти фонетикань разбороньтиема;
• валхнень слогонь-слогонь явома;
• валса ударениять видеста путома;
• сёрмадомста я, е, ё, и, ь букватнень вельде согласнайхнень ляпошиснон няфтема;
• фкя строчкаста омбоцети валонь ётафнема;
• орфографиянь валкс мархта работама                                                            

5-це разделсь Лексикась. Цебярьста корхтамась.

Лексикать шарьхкодемац. Валть смузец. Валть фкя и лама смузенза. Валть виде и аф виде смузенза. Омонипне. Омонипнень типсна. Синонипне и антонипне, корхтамаса синь рольсна. Кевонзаф валзюлмотне (фразеологизматне). Мокшень кяльть валлувксонь составоц. Мокшень литературнай кяльсь и диалекттне. Сире валхне: историзматне и архаизматне. Од валхне (неологизматне). Мокшень кялень валкснень содамасна.

Маштомс:

• текстса или устнай корхтамаса валхнень виде и аф виде смузьснон содама;
• омонипнень лама смузьса валхнень эзда содама;
• синонимонь рядонь кочкама, синонимонь рядонь эрявикс вал мархта валрисьмонь арьсема;
• смузень коряс антонимонь парань кочкама и мархтост валрисьмонь арьсема;
• текстста фразеологизмань мушендома и смузьснон шарьхкодема;
• лия кяльста сявф валхнень и фразеологизматнень устнай корхтамаса и письменнай работаса маштозь тевс ноляма;
• валкс мархта работама.

6-це разделсь. Валбяльксне и валонь тиевомась, орфографиясь. Цебярьста корхтамась.

 Валбяльксне. Валюрсь и валбесь. Апак тик и тиф валъюрхтсь. Гласнай и согласнай валъюрхтсь. Афкуксонь, полатф кирьфтаф валъюрхтсь. Валъюрхсь, суффикссь и валбесь кода валса смузень няфти пялькст. Сотксонь гласнайсь. Валонь тиевомась. Суффикс вельде валхнень тиевомасна и синь сёрмадомасна. Сложнай валхне. Сложнай валхнень тиевомасна и синь сёрмадомасна. Парнай валхне. Парнай валхнень тиевомасна и синь сёрмадомасна.Кирьфтаф сложнай валхне кода рузонь кяльста сявф валлувксонь единицат. Синь азомасна и сёрмадомасна.

Маштомс:

• Валбяльксова валть явома, сонь смузень няфти пяльксонзон мума;
• апак тик, тиф и валонь тии валъюрхттнень ёткса аф фкаксшить содама; гласнай и согласнай, афкуксонь, полатф и кирьфтаф валъюрхттнень содама;
• фкя валъюронь мархта валонь кочкама;
• валъюрста или валъюрхтста суффикс вельде од валонь тиема и видеста синь сёрмадомост;
• простой, сложнай, парнай сложнай и кирьфтаф сложнай валхнень фкя-фкянь эзда явома;
• сложнай валхнень валзюлмотнень эзда, кода и парнай сложнай валхнень эзда, явома и видеста сёрмадома;
• кирьфтаф сложнай валхнень корхтамста видеста тевс ноляма, азома и сёрмадома.

7-це разделсь. Кизоть песта тонафнефть лятфтамац.

Тематическяй планированиясь

Календарно-тематическяй планированиясь

 ПРАКТИЧЕСКЯЙ ДЕЯТЕЛЬНОСТТЬ СОДЕРЖАНИЯЦ

1. К./к. Сочинения Ф.В.Сычковонь картинанц коряс «Стака ётама васта».
2. К./к. Обучающай (тонафнемань) изложения «Эшкс вастоня».
3. Контрольнай диктант «Мокшавань панар».
4. К./к. Рисункать коряс сочинениянь сёрмадомась «Сёксень работатне паксяса».
5. Контрольнай диктант «Чёфксонь пинге».
6. К./к. Свободнай диктант «Оленень стада».
7. К./к. Максф планонь коряс подробнай изложения «Атям».
8. Контрольнай тев «Фонетика» темать коряс.
9. К./к. «Тялонь налхксемат»  картинать коряс сочинениянь сёрмадомась.
10. К./к. Творческяй диктант «Нумол лефкст».
11. К./к. Аф оцю сочинениянь сёрмадомась картинкать коряс «Тундась сась».
12. К./к. Выборочнай изложения «Мес юмась шудерькссь? ».
13. Контрольнай диктант «Ломанень эзда кяшенди».
14. К./к. Стенгазетав заметкань сёрмадомась.
15. К./к. Сочинения «Монь шачема ширезе».
16. К./к. Сочинения «Тундась природаса».
17. Итоговай контрольнай диктант «Девятаев».

Обучающай изложения.

Эшкс вастоня.

Мъзярда озафнесть од шуфтонят, инь парганась эняльдсь шуфтонь эсь Шкаенцты:

        - Макст тейне вастоня, штоба улель тоса ляпоня, эшкскя, штоба аера варматне афолезь синне тараткянень, штоба сери лофне кяшенделемазь цят моли якшамда.

И въдь кулезе шуфтонь Шкайсь парганать эняльдеманц. Кочкась теенза васта лия шуфттнень эшксс, коса модаське сяда ляпе, оцю шуфттне кирнесазь лофнень.

Эрясь-касондсь од шуфтонясь и кеняртькшнесь, мес повсь цебярь вастс. Нъльня пеетькшнесь ялганзон лангса, конат кассть штада вастса. Синь и варматне сейхнезь, и пизепне муськозь, и кельмотне эендафнезь…

Эшкс вастс озафтфсь ламос касондсь. Ронгоц ульсь виденя, пряц паргана. Сонь мялецоль вакссозонза кассы шуфттнень ётамс. Пряц коль шиняти венемсь, а юронза кемокстамаснон колга афи арьсесть.

Сась пинге, керозь ломаттне од шуфтонять перьф кассы шуфттнень. Сядонга кенярдсь шуваня ронгонясь.

Весть кеподсь вии варма, сембе од шуфтонятнень тарадснон мянь модати мянцезень, а виде ронгть тарадонза ульсть вярет, ашесть мянцев вармати. Сяс и таргазе сонь даволсь юрнек, веляфтозе эше вастонь кельгинять.(151)

                                                                                                                                                                                        Н.Голенков

Контрольнай диктант.

Мокшавань панар

        Мокшэрзянь щапне эвондасть пяк кунара. Ся пингть мокшаватне каннесть акша панар. Панарть песа сёрматфтольхть якстерь и равжа тюсса сёрматфкст, конанди мярьгихть «маци кенчт». Авань панарсь сотнекшневсь карксса. Карксть песа нюрьгсть мазы цёконят. Панарть ланга щашендсть сапоня. Тя щамсь ожа мархтоль, ингольде сяда кувака, копорь ширде ульсь сяда нюрьхкяня. Ульсть праздник шинь сапонят, ульсть стакшинь. Праздник шинь сапонятне сяда мозопневсть. Праздникшиста сапонять лангс повфнесть комбоня, къргазост щашендсть къргавкс, ожнакярькст и мазы кърганят, крёскильхть, кядьсост каннесть суркст, кятькст. Прязост сотнекшнесть прянь сотомкат, каштаст, конат ульсть пяк мазыхть. Пильгозост щакшнесть иляназонь акша понкст, ленгаста кодаф карьхть. Праздникшиста щашендсть сърмафкс мархта кямот. Мокшаватне каннесть китькскянь-китькскя понань цюлкат. (102)

                                                                                                                                                                «Мордва» книгать коряс

Контрольнай диктант.

Чёфксонь пинге.

        Тяфтама поездса арнемс тейне нинге ашезь сашендов. Сон рана шобдава станцияста сявомань тундава. Увфса ардонь машина кигя. А лоткай, сетьми, и эстокигя панжада вальмава вагону сембе ширде сувайхть чёфксонь мазы моротне – гайф моли перьфпяле. Мъзяра ина крайсонк чёфкста? Кальхнень прява – чёфкст, садса – чёфкст, вирьса – чёфкст. И тяфта эрь лоткама вастса. Кали марнек перьфпяльсь пяшксе чёфксонь мазы морода?

        А чёфксне ёфси ашемазь ёра кадондомс, гайнясть тясовок, кулевсть ляй берякса, и весть аф весть нолясь вайгяль кукусь.

        Ванка тон, марнек шачема краезень вельхксса морайхть чёфксне, прафнесазь алу ару вайгяльснон, элякофнесазь таколды седицень. (90)

                                                Ю.Кузнецовонь коряс

Свободнай диктант.

Оленень стада.

           Олеттнень ванозь панда ёткса. Синь эздост ульсь тёжяньда лама. Постуфне эжендсть тол мар ваксса. Тяса пинетневок ащесть спокойна. Вдруг оленень стадась токазе вастонц. Пинетне увазевсть. Постуфне шарьхкодсть, што састь върьгаст.

Стадась пуромсь кучкас. Инголи арасть вии букатне. Вача върьгасне анокласть върьгятемс. Олеттне комафтозь пряснон алу.

Вдруг стадась шерьхкозевсь и тусь ардозь върьгаснон лангс. Олеттне пачкодсть и ушедсть кепсема сюроснон лангс върьгаснень, а меле тапсезь пильгснон мархта. Оленень стадать сяськомс аш кода. (71)

Максф планонь коряс подробнай изложения.

Атям.

Панчфкятне и тишесь то комафнезь мазы пряснон, то кепотькшнезь, варжакшнесть перьфпяльгя. Стака розьбрятнень прява вармась колендезь пяльнесь золотань кудрянят. Дуборгодсь атямсь, азсь латта, што тяза сай пизем. Туцятне саворня шаштсть алга нюрьгозь. Сембе перьфпяльсь шоподсь.

Къфчядсь ёндол, лазозе благой туцять пакшень пакш. Атямсь тага торазевсь – и равжа сумань лаца туцясь сязевсь. Модать мяштенцты тоста пяярсть ару путьконят. А минутада меле пиземсь лоськофтсь сембе вийсонза. Шары вармаське начксь и сутямсь.

Кемоньшка-кеветиешка минутада меле туцятне срадсть, и пиземсь ётась. Модать ланга горнясть шудерькскат, кадондсть эсь мельгаст кърхка боразданят…

Атямсь тяни ни увнась ичкозе-ичкозе. А ёндолхне стаки налхксть шинь стяма ширеса. Яфодьсазь толонь плёткаснон, валдоптсазь перьфпяльть сиянь валдса и тага куроконя мадыхть.

Ульцяса встова валдста кърьвязсть лампочкатне, валдоптозь модать шамас туцяста шудеф сельмоветтнень.  (125)

                                                                А.Шуляев

Планць

1. Атямсь азсь латта пиземть саманц колга.
2. Пиземть ушедомац.
3. Перьфпяльсь пиземть ётамда меле.

        Тврческяй диктант.

Нумол лефкст.

Ульсь (пси) киза. Вася мольсь (пиже) лугать ланга. Апак учсек тишеть потмоса кати-мезе шерьхкозевсь. Вася ванць тоза. Нят ульсь (пяк ёмла) нумол лефкст. Тядясна вакссост ашель. Вася курокста вельхтязень синь курткасонза. Васянь мяльс сась качфтомс ня (ёмла) лефкскятнень. Сон кандозень синь куду. Тяни (шуфтонь оцю) ящикса эряйхть (цебярь) нумол лефксне. Синь тонадсть эсь (пара) азорснонды.

А Мъзярда сась тундась, кандозень нумол лефкснень (оцю) вири и нолдазень. Васенда синь ашель мяльсна тумс (тонатф) азорснон эзда. А тоса валомня сърхкасть (Сиде) вирти и кяшевсть сонь потмозонза. Синь музь эсь встснон.  (90)

Выборочнай изложения.

Мес юмась шудерькссь?

Эрь ломанть идькс пингстонза ульсь кельгома уженяц. Фкясь мяляфтсы пандонять, конань пряста ванондозе, коза тусь удома шись; омбоцесь якась келуналу, коста кочксесь панкт; колмоцесь озсесь марлюнять алу скомня лангс, кулхцонкшнезе, кода морай цёфкссь.

        Ион кельгине Явас посёлкатьпеса шудерькскять, сон аф ичкозель алашань кардть эзда. Тунда шудерькскясь ушеткшнесь горняма и арсесь оцю шудерьксокс, прашендсь Явас ляйти. Сашнндонь сей и кулхцонкшнень. Шудерькссь морась и. мярьгат, серьгятькшнемань коза-бди эсь мельганза.

        Ёрянь горняё ведти чепкат и ванондонь, коза туйхть уема.

Уйсть чепкатне. А фкясь повсь нюрьги тарадти, нотфнесь сей-тов, меколи мянць и новольсь сяда тов. Кандозе сонь шудерькссь комболдозь и стаки горнясь.

        Лама пингта ётась сяда меле. И вов тага токадень сей, мялезель васедемс горняй шудерьксть мархта, кулхцондомс, кода сон морай. Варжакснень перьфпяльге и мезе няень? Алашань кардсь тяса ашель. Сонь вастсонза стясь кирпицень оцю куд. Ашель шудерьксське. Куваня мъзярда-бди шудесь, тяни сияня ётась асфальтонь ки, эзганза сей-тов ардсть машинат. (150)

                                                                        А.Дюков

Контрольнай диктант.

Ломанень эзда кяшенди.

Кемоньшка кизоса цёраня кадсть алашатнень вакс. Ниле алятне тусть ласькозь вири. Мерзаев марязешумть, сувась поювонь ситерьксс. Тоса сон эрязста каязень кямонзон и, явфнемок кафту мелкай шуфтонятнень, вишкста ласьксь сяда тов. Вов тага маштсь ситерькссь, лиссь кужес. Върьгаз лаца варжакстсь кафта пяли и ёрдась пря ляйбрять шири. Сон крута беряконза ульсть касфт мелкай кусторксса, върьгазмаринаса. Алу валгомста курькстсть пильгонза и кеворезь прась алу. Сонь шобда потмакссонза ведь и лебонь. Фкя бокста няйсь ведень караф, кона похожай офтонь утонди; сонь сярядсть боконза, ангоряф шамац, кяденза. Сувась ся варяти и прсь кунф. (90)

                                                Л.Макуловонь коряс

Контрольнай диктант.

Девятаев.

Девятаев аделась лётнай школа. И вов сон лиенди ялганзон мархта. Пацяснон ала таргавихть Родинать пефтома просторонза. Лама ни модадонк нолдаф воляс, тага аф лама – и нолдави мекольдень мода пакшкясь. Алува ётнихть то сянгяря лугатне, то куйкс таргави китне. То, ванат – ала мянцевихть ару ведь мархта ляйхне.

А вов и тифтедсь алост ош. Девятаев содасы – тя Львовсь, кунардонь славянскяй ошсь. Тяста венептьк кядцень, и тозк границась. Но синь аф лоткайхть границать ваксс. Эрявихть наказамс гитлеровецне. И ся пингсь аф ичкозе, сон сай. А тяни синь полксна араласы тя ошть, сонь перьфканза велетнень, передовой линияти моли войскатнень. (100)

КОНТРОЛЬНАЙ ТЕВ

1. Максф валрисьмотнень эзда сёрмадость сложнай валхнень.

1) Аф мазышись краскасовок аф архтови. 2) Лама кшице – лама козяшице. 3) Нужашись тонафттанза ванфтома. 4) Эрят нолашиса – ащат кальдяв киса. 5) Саламась – цебярьс аф вяти. 6) Кенерьбакарце маласа, да аф паласак (сусксак). 7) Кие рахафни, ся сельмоветтьке сафни (прафни). 8) Пеедемась лияста сельмоведьс вяти. 9) Сонць сурбряшка, а чуваньшиц капашка. 10) Пряфтомашиса цебярське аф кирдеви.

2. Максф валхнень эзда явфтость валъюрхтть, валбеть.

Калхне, корхтатама, лефкскя, сашендомс, тумс, тонафни, сёрмадан, сеттне, каннемс, шурьхкя, морайхне, шъра, кудня, ърьвяня, кърганя, вирьгя, велева, пилсемс-лаксемс, тяшнемс-нарнемс, нарня, марьня, шуваня, кизонда.

3. Поладость валть омбоце пяльксонц.

Кепотькс: кши – сал.

Тядят – ………, акат – ………., куцюфт – ……………, якамс – ……….., тияне – ……………….., лисемс – ………………., пидемс – …………….,  кит – ……, штамс – ………………….. .

4. Валмуворкснень эзда мусть антонипнень, алгаст таргада китьскат.

1) Ичкози путсак – маласта сявсак. 2) Кие курок кучеви, ся и курок учеви. 3) Муят тят кенярде, юмафтат тят пичеде. 3) Кудсь мазы аваса, пирьфсь – аляса. 4) Тундась мазы панчфса, сёксесь – сёронь таньфса. 5) Кизонда удат – тялонда пря сюдат. 6) Оттне сяда тазат вийса, сиретне – ёньца. 7) Кяльса – козя, тевса – ашу. 8) Ёнюсь кържа корхтай, лама кулхцонды. 9) Ёню ломанть мархта кувака киське нюрьхкяня. 10) Серец пяшешка, ёнец пяштешка.

Диктантть инкса путневи фкя оценка.

  «5»       оценкась путови эльбятьксфтома работать инкса или фкя

               аф оцю орфографиянь или фкя аф оцю пунктуациянь

               эльбятькс мархта работать инкса.

  «4»       оценкась путови, къда диктантса 2 орфографиянь и 2

               пунктуациянь коряс эльбятькст, или васенцетнень эзда 1,

               омбоцетнень 3, или васенцетнень эзда аш, омбоцетнень

               эзда 4. Орфографиянь коряс 3 эльбятькс мархта

               диктанттивок путневи «4» оценка, къда эльбятькснень

              ёткса улихть фкя типонь.

  «3»       оценкась путови, къда диктантса 4 орфографиянь и 4

               пунктуациянь коряс эльбятькст, или васенцетнень эзда 3,

               омбоцетнень 5, или васенцетнень эзда аш, омбоцетнень

               эзда 7. 5-це класса «3» оценкась  путневи и ся диктантть

               инкса, конань эса нолдаф 5 орфографиянь и  4

              пунктуациянь коряс эльбятькст.  «3» оценкась путневи и

              снярда,  мзярда работаса 6 орфографиянь и 6 пунктуациянь

              коряс эльбятькст, но къда ётксост улихть фкя типонь и аф

              оцю эльбятькст.

  «2»      оценкась путови, къда диктантса 7 орфографиянь и 7

              пунктуациянь коряс эльбятькст, или васенцетнень эзда 6,

             омбоцетнень эзда 8, или васенцетнень эзда 5, омбоцетнень

             эзда 9, или васенцетнень эзда 8, омбоцетнень эзда 6.  

 Къда эльбятькста сяда лама, диктантть инкса путови «1» оценка.

     Диктантти оценкань максомста петневихть,

но аф лувондовихть орфографиянь и пунктуациянь эльбятьксокс:

1. фкя строчкаста омбоцети валонь ётафтомаса;
2. правилатненди, конат аф сувсихть школань программати;
3. апак тонафнек правилатненди;
4. авторонь пунктуациять коряс.

Петневихть, но аф лувондовихть эльбятьксокс, сёрматфне, мзярда фкя буквать вастс апак учентт тяшневи лия, кепотьксонди: неше (неже вастс), кадра (карда вастс), мельме (кельме вастс).

      Аф оцю эльбятькснень ёткс сувафневихть:

1. правиласта исключениятне;
2. составной собственнай лепнень эса оцю буквань сёрмадомась;
3. сложнай валхнень, конатнень эса пяльксне исть колав, исть кире, башка валса сёрмадомасна ( стирь шаба – стирьшаба вастс, азор ава – азорава вастс);
4. составной лепнень сложнай валкс сёрмадомасна (кенкшкундама – кенкш кундама вастс, ульмолгоня – ульме олгоня вастс);
5. парнай сложнай валхнень пяльксснон запятой вельде сёрмадомасна (акат, сазорхт – акат-сазорхт вастс);
6. наречиянь смузьса фкя валъюрста ащи кафта валхнень сёрмадомасна (волнань волнань – волнань-волнаньвастс, лиезь-лиемс – лиезь лиемс вастс);
7. лия кяльста сявф собственнай лепнень сёрмадомасна;
8. фкя тяштенянь вастс лия тяштенянь сёрмадомась;
9. мельцек моли тяштенятнень эзда фкять нолдамац  или вастснон полафтомасна.

Къда контрольнай диктантса 5-да лама петькс (аф лац сёрматфсь петьф лац сёрмадомакс), оценкась кирьфневи фкя баллда, сембе сяка аф удовлетворительнай оценка тонафнить работанцты аф путови. «5» оценкась аф путневи, къда работаса 3 или сяда лама петькс.