Выступление на День родного языка.
материал

Вечкевикс коллегат! Эрзянь келень чи марто тынк! Арсян тенк кеме шумбрачи, уцяска. Кудонк свал улезэ лембе, перьканк улевельть чевте седей ломанть. Келей ды валдо ки тенк, покш тёкш важодема таркасо, чарькодема ды вечкема малавиксэнк пельде.

Келесь ломаненть эрямосо саи покш тарка. Келенть вельде минь кортнетяно, сюпалгавтано содамочинек, ёвтатано меленек, невтяно ёжомарямонок. Ломанесь эрямонзо перть, бути эряви, бути ули мелезэ ды ёрокчизэ, тонавтни ды нолды тевс аволь вейке – зярыя кельть. Ансяк кодат ды зяро кельть ломанесь а содаволь, тиринь келесь эри седейсэнзэ, мельсэнзэ, превсэнзэ чачомастонзо саезь куломазонзо.

Мон тиринь келень ды литературань тонавтыця. Вана 7 иеть тонавтан, теян содавиксэкс тонавтницятнень монь предметэнть мазычинзэ ды поэтичностензэ марто. Эрзянь кель! Кодамо моронь вайгельлув, мазычи ды шожда сон кортамсто, но стака тонавтомсто. Монь бажамом – тонавтомс эйкакштнэнь видестэ кортамо ды сёрмадомо тиринь кельсэ. Штобу бабанок ёвксонь, аванок моронь келесь пачкодевель вишка седейтнес, штобу монь тонатницян авольть визде эсест ундоксто, эсест кельде. Секс уроктне монень ды монь тонавтницятненень – свалшкань вешнема, а лоткавтовиця кортамо, вейсэнь важодема. Монь свал седеем ризны ды сэреди  эрьва тонавтницянть кис, сень лангс апак вано, кода сон тонавтни монь предметэнть коряс. Монь покш мелем теемс тонавтнеманть эйкакштнэнень мельс туицякс ды лезэвекс, свал вешнян эффективной кить эсень тонавтомань проблематненень. Секскак  тиринь келень ды литературань уроктнестэ тевс нолдан информационной технологиятнень,  лия предметнэнь марто сюлмавкстнэнь, эрьва кодамо уроконь форматнень.

Неень шкане информационной технологиянь ролесь пек кассь. ИКТ марто уроктне анокстыть эйкакштнэнь неень шкань эрямонтень ды эрьва кодамо содамочинтень. Истят уроктне пек тукшныть тонавтницятнень мельс. Секс мон покш мель яван урок – презентациятнес мордовской писательтнень шкинемаст тонавтнемстэ, артовксонь коряс сочинениянь сёрмадомсто, урок – викторинасто, урок – налксемасто ды зярдо теян обобщения ды кемекстамо темань коряс.

Пек актуальнойкс келень тонавтнемстэ ашти лия предметнэнь марто сюлмавкстнэнь тевс нолдамось. Те пурны тонавтницятнень мельявома. Теи уроктнень седе домкакс ды мельс туицякс.

Эсень важодемасон бажан ютавтомс истят лия предметэнь марто сюлмавкст, кода: литература ды кель, кель ды искусства, кель ды музыка, кель ды пертьпелькстэ тонавтома. Остаткась лезды тонавтницятнень экологической ды эстетической воспитаниянтень. Эрзянь келень ды литературань уроктнес кочкан пертьпельксэнь материал, невтнян кочказенть эйкакштнэнень, штобу сынь чарькодевлизь сонзэ покшчинзэ ды мазычинзэ, вечкевлизь се тарканть, косо сынь чачсть. Тень коряс ютавтозь зярыя панжадо урокт. Примеркс, 7 классо «Глаголось кода кортамо пелькс» уроконтень совавтозельть седикельксэнь кой кирдатне, ярсамопелесь ды кудопотмонь минеть – сюнотне; 6-це классо «Собственной ды нарицательной существительнойтнень» ютамсто невтнезь пертьпельксэнь касовкст; 5-це классо – «Таштомовозь валтнэ» урокстонть тевс нолдазельть кезэрень пингеде ёвкст, оршамопельть, эрзянь койть.

Мон важодян а умок, ансяк неия, што вейке видэнь уроктне теить тошначи, а тонавтыть эйкакштнэнь тиринь келень вечкеме. Штобу истя аволь уле, мон карминь ютавтомо эрьва кодамо видэнь шкинемань важодемат: те артовксонь коряс сочиненият, сочиненият описаниянь элемент марто, сочиненият – репортажт, эссе, новеллат, очеркть. Истя жо совавтан уроктнес содамоёвкст, валмеревкст, тешкст. Содамоёвкстнэнь содавксост марто теевить зярыя заданият: арсевить валрисьметь, кочкавить  синонимть, омонимть, ютавтовить фонетикань коряс ваннома, арсевить аволь покш стихть ды ёвтнемат.  Эрьва  заданиястонть бажан явомс пек эрявиксэнть.

Весе мелень путозь ютавтан урок-беседат, урок – экскурсият, урок – КВН, урок-путешествият, урок – исследованият ды лият. Неень шкасто яван мель эйкакштнень проектно - исследовательской важодемантень ды аволь содазь уроконь ютавтомантень.  Ведь эрьва ломанентень эряви содамс эсензэ эрямонь пингензэ, эсензэ масторонь культуранть. Национальной колоритэнть ютавтан аволь ансяк уроксто, но и кружоконь ветямстояк, олимпиадас анокстамстояк.

Тень кувалма школасонть теезь-пурназь тиринь келень ды литературань кабинет. Тесэ ламо материал, кона совавтови малав эрьва тонавтомань тевентень. Кабинетэнть методикань сюпалгавтомантень  лездыть сынсь эйкакштнеяк. Монь мереман коряс мельспаросо чиить покштяст-бабаст, шабраст туртов, штобу тонат ёвтневельть кезэрень пингеде, кой-кирдадо, икелень ве таркань эрицядо, куротнень, паксятнень, латкотнень, лисмапрятнень лемдест. Весе те материалось кандови альбомс. Истямо виень вешиця важодемась канды эсензэ, кадык аволь покш, но лезэ. Кабинетсэнть, урокто башка,  ютавтовить эрьва кодат анокставкст.

Те весе важолдемась а юты лезэвтеме. Минек школань тонавтницятне эрьва ие сайнить таркат, кода райононь истя республикань тиринь келень ды литературань олимпиадатнесэ. Эйкакштне пек кецтнить тень кувалма. А тонавтомань тевсэ, монь койсэ, те сехте покш казне эрьва тонавтыцянтень.

Тиринь келесь – те лисьмапря, конась симди ломаненть эйсэ, максы тензэ вий. Ансяк, бути кортамс эрзянь кельденть, те лисьмапрясь аламонь-аламонь коськи, ды тень кис пек мелявты ды ризны седеесь.

Тиринь келесь – ломаненть оймезэ, культуразо, сюпавчизэ, почозо, конань вельде сон сюлмазь  чачома тарканзо, раськензэ марто. Ванстомс тиринь келенть – ванстомс авать, тетять, покштятнень-бабатнень лемест. Тень эряви теемс касыця эйкакштнень туртовгак. Кадык минек а чумондсамизь мейле ды а мерить: «Сынь маштызь келенть».