Милли киемәр
план-конспект занятия (старшая группа) на тему

 Алабуга шәһәренең мәктәпкәчә яшьтәге балаларга  белем бирү  оешмасы 34 нче “ Салават күпере” бакчасы.

            Милли киемнәр    

                              ( зурлар төркемендә комплекслы шөгыль)

                                                                                                 Тәрбияче:

                                                                                                 Гәрәева Г.Р.

                                                   Алабуга 2015

Тема : “ Милли киемнәр”.

Максат:  татар милли киемнәре турында балаларның күзаллауларын тирәнәйтү.

Бурычлар:

1. Милли киемнәргә кызыксыну уяту,үзенчәлекләрен ачыклау. Милли киемнәрнең исемнәрен , бизәлешләрен сөйләмдә кулланырга өйрәтү,  татар бизәкләре белән таныштыру.
2. Балаларның кыңгырау, яфрак бизәген кисенү ныгыту.
3. Халык сәнгате аша балаларда зәвыклы, матур итеп киенү теләге тәрбияләү.

Сүзлек:  калфак, түбәтәй, алъяпкыч, читек, лалә, кыңгырау, канәфер чәчәге,  милли.

Җиһазлау: милли киемнән курчаклар, милли киемнәрнең  рәсемнәре,  түбәтәй, калфак,  ИКТ, бизәк үрнәкләре, кайчы, җилем,  гади карандаш. төсле кәгазьләр, түбәтүй  һәм калфак өлгеләре.

Методик алымнар: сораулар, әңгәмә, дидактик уеннар.

Алдан эшләнелгән эшләр: музейда булу , шигырьләр уку, тизәйткечне “ Түбәтәй “ уенын уйнарга өйрәнү.

Шөгыль барышы:

• Исәнмесез, балалар! Карагыз әле бүген безгә кунакка кемнәр килгән?
• Курчаклар.
•  Алар нинди милләт киеменнән киенеп килгәннәр?
• Бу татар милли киеме.
• Әйе, ә  ни өчен ул милли дип атала?
• Чөнки аны татарлар гына кияләр.
• Әйе, балалар. Әйдәгез әле татар кызының киемен карыйк . Башына ул нәрсә кигән икән? Кем белә? Дөрес башына ул кафак кигән. Өстендә күлмәк һәм алъяпкыч, ә аякларында читекләр.
• Ә хәзер бергәләп татар кызларының башка киемнәрен дә карап китик.( презентация күрсәтү)

Кызларның күлмәгенә, читекләренә, бизәнү әйберләренә игътибар итегез. Бик матур , төрле төстәге бизәкләр белән бизәлгән, муенсалар, алкалар такканнар.

•  Ә татар малае нәрсәләр кигән? Татар малае түбәтәй, камзул, читек кигән. Инде бергәләп татар малайларының киемнәрен карап үтик ( презентация күрсәтү). Бәйрәм киемнәре һәм көндәлек киемнәр ничек аерыла.
• Көндәлек кием гади, ә бәйрәм киемнәре бизәлгән.
• Әйе, балалар бик дөрес. Бергәләп сүзләрне кабатлыйк: милли, калфак, түбәтәй, алъяпкыч, камзул, читек.
• Инде бергәләп “ Түбәтәй” уенын уйнап алыйк.

Түбәтәең кигәнсең,

Бик ерактан килгәнсең.

Түбәтәең  укалы,

Менә кемдә тукталды.

( Түбәтәй кемдә кала шул балага “ җәза “бирелә: бии, җырлый һ.б.)

• Балалар без караган киемнәрдә нинди төсләр күбрәк. Яшел, сары, кызыл, зәңгәр.
• Бу бизәкләр нәрсәләрдән тора?
• Төрле чәчәкләрдән, яфраклардан.
• Әйе, татар милли киемнәрен бизәү өчен үсемлек орнаментын кулланалар. Менә алар : кыңгырау , ләла, канәфер чәчәге, өчяфрак ( презентация күрсәтү) Хәзер аларны киемнәрдән эзләп табыйк.  (  “Бизәкне таны “уены уйнала)
• Балалар карагыз әле безнең курчакларыбызның янында нидидер хат та бар. Укып карыйк әле.

“ Хөрмәтле балалар! Безне дусларыбыз кунакка  чакырдылар. Без аларга  бүләккә түбәтәй һәм калфаклар алып  бармакчы идек, тик аларның бизәкләре югалган. Сез безгә ярдәм итә алмассыз микән.”

• Ярдәм итәбезме?  Әйдәгез алайса бергәләп түбәтәй һәм калфакларга бизәкләр ябыштырыйк. Тик башта тизәйткечне искә төшереп алыйк:

“ Итек, читек, энә, без,

   Матур итеп тегәбез.

• Инде эшебезне башлыйк.

( Тактага кыңгырау чәчәге үрнәге куела, төсне дөрес сайлау, кисү алымнары ныгытыла. Балалар әзер үрнәкләр буенча кисеп ябыштыралар. Эшләр буенча нәтиҗә ясала.)

• Балалар күрәсезме бу матур, пөхтә эшләребездән курчакларга күңелле булып китте. Сез аларны бик шатландырдыгыз. Инде аларны кунакка озатыйк, саубуллашыйк.