Статья "110 добрых дел" для fm радио. 2019г.
статья

Дарма Жанаевта зорюлагдаһан һайндэр.

Хориин 1-дэхи дунда һургуули 1998 ондо Эсэгэ ороноо хамгаалгын Агууехэ дайнай үедэ Советскэ Союзай Герой гэһэн дээдын нэрэ зэргэдэ хүртэһэн Дарма Жанаевич Жанаевай нэрэ абаһан юм. Байгша оной октябриин 22-то Геройн түрэһөөр 110 жэлэй ой тэмдэглэгдэхээ байна. Манай һургуули энэ һайндэртэ зорюулжа, элдэб хэмжээ ябуулгануудые үнгэргэнэ ба патриотическа проектнүүдые бэелүүлнэ. Тэдэнэй тоодо «110 һайн хэрэгууд» гэһэн акци болоно. Һургуулиимнай үхибүүд  энэ акцида эдэбхитэйгээр хабаадажа, үнэн зүрхэнһөө олон гэгшын һайн дуранай хэрэгүүдые бэелүүлээ. Жэшээнь, Агууехэ дайнда хабаадалсаһан ба тылэй ветерануудые амаршалаа, һургуулиингаа газаа мододые һуулгаа, аймагай амаралтын парк сэбэрлээ.

Сентябриин 26-да үнгэргэгдэһэн хэмжээ ябуулга Дарма Жанаевай мүнхэ дурасхаалда зорюулагдаһан аймагай велопробег (велосипедээр гүйлдөөн) болоо. Гүйлдөөнэй урда, митинг дээрэ, аймагай захиргаанай толгойлогшын орлогшо Элеонора Ламханова, сэрэгэй комиссар Борис Цыбиков гэгшэд бултаниие халуунаар амаршалаа. 11-дэхи классай һурагшадые сугларагшадта Дарма Жанаевай намтар,  сэрэгэй албанда сапёр ябаһан ба Геройн нэрэ зэргэдэ хүртэһэн тухайнь  тобшохоноор хөөрэжэ үгэхэдэнь, бүхы үхибүүд сагаан үнгэтэй шаригуудые тэнгэри дээшэнь табижа, «Мы за мир» («Бидэ эб найрамдалай түлөөбди») гэһэн Бүхэроссин акцида хабаадалсаа.

Велосипедээр гүйгшэд арбаад километр харгы дабажа, Кодун-Бильчир гэһэн Дарма Жанаевичай түрэһэн нютагай газарта хүрөөд, хүшөөгэй тэмдэг нээгээ. Дайнда мордохын урда тээ манай нютагай баатар Улаан-Үдын авиационно заводто хүдэлдэг байгаа һэн, тиимэһээ  авиационно заводой таһагай хүтэлбэрилэгшэ А.Е.Чирков ба ветерануудай Соведэй хүтэлбэрилэгшэ Н.И.Фролова, Дарма Жанаевай түрэлхин – сэрэгэй офицер Жаргал Сергеевич Жанаев гэгшэд гүйлдөөндэ ерэжэ, хабаадагшадта халуун баярые хүргөө юм. Энээнэй һүүлээр бүхы үхибүүд бүлгэмүүд боложо хубаараад, элдэб мүрысөөнүүдтэ хабаадаа: минэтэй (миномёдой һомонһоо) талмай сэбэрлээ, поли дээрэһээ «шархатаһан» хүнүүдые гаргаа, «Мышеловка» гэһэн шатада пластунскаар мүлхёо, граната шэдээ, сагаалсаар буудаа. Бүрхэг уларил байбашье һаа, бүхы үхибүүд эрэлхэг зоригтойгоор бэрхэшээлнүүдые дабажа, илагшадынь шангуудта хүртөө. Тэдэ баяртайнууд гэртээ бусаа.

Дарма Жанаевич Жанаевай болон бусад Геройнуудай баатаршалга арадаймнай түүхэдэ сэгнэшэгүй. Эдэ баатарнуудайнгаа нэрые мүнхэлхэ, хододоо һанажа ябаха манай уялга болоно.