Ата-әсәләр өсөн файҙалы кәңәштәр
консультация

Атай - әсәләргә кәңәштәр

• Балағыҙ өсөн шатланығыҙ;
• Кескәй балағыҙ менән тыныс, хәстәрлекле һәм уның яҡшы эштәрен, ҡыланыштарын хуплаған тауыш менән һөйләшегеҙ;
• Бала һеҙҙең менән һөйләшкәндә, уны һәр саҡ иғтибар менән тыңлағыҙ;
• Балаға аныҡ, ҡаты һәм мотлаҡ үтәлергә тейешле талаптар ҡуйығыҙ;
• Бала менән һөйләшкәндә, күберәк предметтарҙың исемен һөйләгеҙ;
• Һеҙҙең балаға аңлатыуҙарығыҙ ябай һәм аңлайышлы булырға тейеш;
• Түҙемле булығыҙ,  ашыҡмай һөйләгеҙ;
•  «Нимә?» һәм «ни өсөн?»  - тип йышыраҡ һорағыҙ;
• Баланың һорау биреүгә булған ынтылышын һәр саҡ хуплағыҙ;
• Күберәк китап уҡығыҙ;
• Баланы маҡтарға һаранланмағыҙ;
• Балағыҙҙың һәр нәмә менән ҡыҙыҡһыныуын һәм хыялланыуын ыңғай ҡабул итегеҙ;
• Икенсе бала менән уйнауына ыңғай ҡарашта булығыҙ;
• Баланың бирелеп һөйләй алырлыҡ яңынан-яңы тәьҫораттары барлыҡҡа килеүенә сәбәпле булығыҙ;
• Баланың һеҙҙең менән ашарға әҙерләшеүенә, һауыт-һаба йыуышыуына ирешегеҙ, уның менән күберәк тышта йөрөгөҙ, хәленән килгәнсе бала һеҙгә йорт эштәрендә ярҙамлашырға тырышһын;
• Яратҡан шиғырҙар, әкиәттәр, төрлө тамашалар яҙмаһының аудио, видиокассеталарын алығыҙ: бала йышырыҡ уларҙы тыңлаһын;
• Балаға үҙенең исемен, фамилияһын, адресын, ата-әсәһе һәм яҡындары тураһындағы мәғлүмәттәрҙе ятлап алырға ярҙам итегеҙ;
• Яратҡан шөғөлө менән булышыуына ыңғай ҡарашта булығыҙ;
• Һеҙҙең китап, гәзит, журнал уҡып алған ҡәнәғәтләнеүегеҙҙе күреп, бәләкәстәр һеҙҙән үрнәк  алһын;
• Балалар менән аралашҡанда шаяртыу, юмор тойғоларын юғалтмағыҙ;
• Күп эштәрҙе уртаға һалып, ғаилә менән бергәләп башҡарығыҙ.
• Баланы тупаҫ рәүештә бүлмәгеҙ; бөтәһен дә аңланым, булды, тип, һөйләүенән туҡтатмағыҙ; бала һөйләп бөтмәҫ элек, ситкә әйләнмәгеҙ. Ҡыҫҡаһы, балаға уның һөйләүе һеҙҙе ҡыҙыҡһындырмай тигән һығымта яһарға сәбәп бирмәгеҙ;
• Артыҡ күп һорауҙар бирмәгеҙ;
• Бала башҡарырға әҙер булмаған эште унан талап итмәгеҙ;
• Бала арыған, кәйефһеҙ саҡта, тынысһыҙ ваҡытында, унан көсләп берәр эш башҡарыуын талап итмәгеҙ. Икенсе төрлө эш һайлағыҙ;
• Артыҡ күп нәмә башҡарыуҙы баштан уҡ талап итмәгеҙ. Ваҡыт үтеү менән бала үҙе эшен эҙмә-эҙлекле, ашыҡмай, еренә еткереп башҡара башлаясаҡ;
• Туҡтауһыҙ баланы: «Улай түгел! Былай эшлә! Яңынан эшлә!» - тип төҙәтеп тормағыҙ;
• «Юҡ, ул ҡыҙыл түгел!» - тип әйтеү урынына: «Ул күк», - тип әйтегеҙ;
• Баланы башҡалар алдында тәнҡитләмәгеҙ, икәүҙән-икәү ҡалғанда ла балаға иҫкәртмәләрҙе сама менән биреү кәрәк;
• Бала алдында артыҡ күп ҡағиҙәләр ҡуймағыҙ: ул уларҙың үтәлешенә, шулай уҡ һеҙгә лә иғтибар итмәй башлаясаҡ;
• Баланың күңелен күрәм тип, уны уйынсыҡтар һәм башҡа төр күңел асыу сараларына йөрөтөү менән артыҡ шаштырмағыҙ (ҡайтҡан һайын шоколад, йә туңдырма; йә киноға, ҡунаҡҡа йөрөтөү һ.б.). Һәр нәмәнең самаһы бар. Бала быны белеп үҫергә тейеш;
• Балаларҙағы ҡайһы саҡта килеп сыҡҡан яҡшы йәки насар үҙгәрешкә артыҡ борсолмағыҙ; былар – барыһы ла ваҡытлыса;
• Балағыҙҙы башҡа бер бала менән дә сағыштырмағыҙ, хатта ҡустыһы, йә апаһы менән, бигерәк тә күрше балаларҙы, баҡсаға, мәктәпкә бергә йөрөгән башҡа балалар менән. Ул донъяла берәү генә.