Ни өчен помидор кызарган?
материал (средняя группа) на тему

Ни өчен помидор кызарган?

(Уртанчылар төркеменә өчен Көз бәйрәме)

Катнашалар: Алып баручы, Кыяр, Кабак, Кишер, Шалкан,Бәрәнге, Суган, Чөгендер, Кәбестә, Сарымсак, Помидор, Карга.

Алып баручы: Бүген бездә зур бәйрәм:

                         Гөрләп күңел ачабыз.

                         Җырлыйбыз да, биибез дә,

                         Шатланабыз барчабыз.

1 нче бала:      Менә җәй дә үтеп китте,

                         Көз айлары килеп җитте.

                         Бала-чага бик шатлана,

                         Көзге бәйрәм башлана.

2 нче бала:      Агачлардан сары яфрак

                        Җиргә коела.

                        Тирә-як алтынга манган

                        Кебек тоела.

3 нче бала:      Миләш, балан бакчаларга

                         Ямь биреп тора,

                         Көз чибәркәй килсә иде,

                         Бик сагындыра!

(Йомшак, назлы көй ишетелә. Залга Көзбикә керә).

Көзбикә:        Сез чакыргач, мин килдем,

                       Дусларны күрим дидем.

Җыр “Көз килде”

Көзбикә: Балалар, бер сорауга җавап бирмәссезме? Ни өчен помидор көз көне кызара? Ярар, баш ватмагыз. Мин сезгә әкият алып килдем, җавапны аннан белерсез. Ә әкият- “Ни өчен помидор кызарган?” дип атала.

                       Борын-борын заманда

                       Яшел, иркен бакчада

                      Яшелчәләр үскәннәр,

                      Дус-тату яшәгәннәр.

(Дәртле татар халык көе астында ЯШЕЛЧӘЛӘР-балалар ярымтүгәрәккә төзелеп басалар).

Кыяр:    Кыярны һәркем таный,

              Кыяр салатка ярый.

              Әгәр дә куйсаң тозлап,

               Кыяр саклана озак.

Кабак:    Ә мин булам Кабак!

                Әйтмим кабат-кабат.

                Боткага да төшәм мин,

                Бәлештә дә пешәм мин.

Кишер:   Көчле, җитез булыйм дисәң,

                Кишер ашап кара син.

                Кишер – саулык чыганагы,

                Кишердә күп каротин.

Шалкан: Минем исемем-Шалкан.

                Өстемдә сары чапан.

                 Минем урыным түрдә,

                  Әкияттә, табында.

Бәрәнге:   Ә мин – тәмле Бәрәнге.

                  Вак булам һәм бик эре.

                  Сары һәм кызыл төстә,

                  Кешегә кирәк бик тә.

Суган:       Ә мин- Суган. Әрчегәндә

                  Килсә дә яшь күзегезгә,

                  Мине ашап, салкыннарда

                  Суык тимәс үзегезгә.

Чөгендер: Мин – Чөгендер. Мин дә кирәк

                  Кешеләргә ашар өчен.

                  Борщ пешерер өчен һәм

                  Винегрет ясар өчен.

Кәбестә:   Ә мин булам Кәбестә.

                  Мин бик тәмле бәлештә.

                  Миннән щи пешерәләр

                  Йә голубцы төрәләр.

Сарымсак:Ә мин – Сарымсак!

                  Микроблар, булыыз сак!

                   Барыгызны да җиңәм,

                   Йөрәккә мин көч бирәм!

Помидор:  Мин булам Помидор!

                   Помидор – зур синьор!

                    Кешегә тик мин кирәк,

                    Мине алыгыз тизрәк!

1 нче бала:  Көз җиткәч, алар

                    Тәмам өлгерде,

                    Кишер, кәбестә,

                    Тәмле бәрәнге.

2 нче бала:  Әйдәгез, дуслар,

                    Бергә җыелык,

                    Көзге бакчага

                    Өмәгә барыйк!

Уеннар

1.“Компот белән аш”

2.”Бәрәнге” (Утырту һәм алу).

Көз:  Яшелчәләр рәхәтләнеп

         Кояшта пешәләр,

         Кояшта пешәләр,

         Дус-тату үсәләр.

         Тик берзаман

          Помидор сүзә килгән,

          Помидор сүзгә килгән,

          Дусларга болай дигән:

Помидор: Кем миннән тәмлерәк?

                  Помидор тәмлерәк,

                  Помидор баллырак.

                  Кешегә тик мин кирәк!

1нче яшелчә: Ни өчен син мактанасың,

                       Дусларыңны кимсетәсең?

2нче яшелчә: Мактанма, ат дип сыерга атланма.

 3нче яшелчә: Безне хур итмә, үзеңне зур тотма.

Помидор(масаеп):  Китегез, килмәгез!

                      Помидор яхшырак,

                      Помидор тәмлерәк!

Яшелчәләр (бергә): Мактанасың,мактанасың,

                       Хәзер өзелеп төшәсең,

                       Хәзер өзелеп төшәсең.

                       Берүзең генә каласың!

(Яшелчәләр урыннарына утыралар, помидор бер үзе кала).

Карга:   Карр! Карр!

              Позор! Кошмар!

              Юкка кәпрәйгән – вакытсыз кәкрәйгән!

              Карр!Карр!Карр!

Помидор: Берүзем генә калдым.

                  Юкка, юкка мактандым,

                  Инде хәзер аңладым,

                  Оятымнан кызардым!

Алып баручы: Теләгең саф булса, тормышыңда тап булмас. Без помидорны кызганыйк, аңа ярдәм кулын сузыйк.

Яшелчә (помидорны юатып): Бакчаларда ике түтәл,

                   Берсен суганга күтәр,

                   Еласаң, күзләрең бетәр,

                   Биеп күңелне күтәр!

Помидор:  Әйдә, дустым, алып барам

                   Алма коелган җиргә,

                   Бер биеми булмас инде

                   Дуслар җыелган җирдә!

1. Күмәк бию “Парлы бию"

Алып баручы: Хөрмәтле кунаклар, инде хәзер сез ни учен көз көне помидор кызарганын беләсез.

2. 2-3 шигырь
3. Җыр “Балалар бакчасында”
4. Музыкаль уен “Түбәтәй”

Көзбикә: Тәмле алмалар өлгерде,

                 Балаларны сыйларга.

                 Ә безгә вакыт җитте

                 Бәйрәмне тәмамларга.