ПРОЕКТ «Жизнь и творчества мордовского поэта Григория Ильича Ельмеева – деда Мироновой Л.И.»
статья на тему

Миронова Лариса Ильинична

«Жизнь и творчества мордовского поэта Григория Ильича Ельмеева – деда Мироновой Л.И.»

Скачать:

ВложениеРазмер
Microsoft Office document icon elmeev_diplom_dedushki.doc187 КБ

Предварительный просмотр:

ПРОЕКТ

«Жизнь и творчества мордовского поэта Григория Ильича Ельмеева – деда Мироновой Л.И.»

Содержаниясь

Ингольце валсь    ………………………………………………………………    

1  Г.И. Ельмеевонь эряфонь и творческяй киц  ……………………………....  

2  Литературнай ёфксонь жанрась Г. Ельмеевонь творчестваса  .…………    

2.1 Литературнай ёфксонь жанрать колга шарьхкодемась    ..……………      

2.3 Г. Ельмеевонь «Ёжка» ёфкссонза богатырень образсь ………………      

2.4 Г.  Ельмеевонь «Маза - Таза» ёфкссонза фантастикась и

афкуксоннесь ……………………………………………………………….      

Мекольдень  валсь        ………………………………………………………..  

Ингольдень валсь

Григорий Ильич Ельмеевонь творчестванц колга корхтамста аш кода аф лятфтамс войнаса шавф писательхнень. Сятнень, конат максозь од эряфснон Родинать араламста, фашисттнень машфтоманкса.  

Мордовиянь колмогемонь нилие поэттнень и прозаикнень эзда комсь кафксувось войнань кизотнень ульсть действующай армияса. Геройнь куломаса кулость талантливай прозаикне и поэттне С. Родькин, Г. Ельмеев, А. Зиньков, Ф. Дурнов, А. Рогожин, П. Кономанин, И. Чудайкин и лиятне. Синь штыкса и пераса тюрсть коричневай чумать каршес.

        Войнаса шавф писательхнень ёткса башка васта занци мокшень поэтсь Григорий Ильич Ельмеев. Сон шачсь Рузаевскяй райононь Сузгярьгя велеса. Гриша церанясь сембе сяка касфнезень содамашинзон, якась учительхнень шири книганкса. 1933 кизоня Григорий Ильиченди удалась тумс Саранск ошу учителень курсас.

Учителень курсса тонафнесь киза, а аделамдост меле  трудендась начальнай школань учителькс 1941-це кизоть самс. Ся кизотнень мокшень газетатнень и журналхнень эса кармасть лисендема Г. И. Ельмеевонь стихотворениянза. Сембода лама поэтсь работась колмогемонце кизотнень омбоце пялестост. Аф стак ся пингть сонь лемоц и творчествац цебярьста содафтольхть мокшэрзянь литератураса. Григорий Ильич ульсь Михаил Безбородовонь творчестванцты мольфтикс и сёрмадсь иттнень колга аф кржа произведения. Да и лиякс ашель кода. Вдь тя темась тейнза, кода учителенди, ульсь сембода малакс.

Ельмеевонь творчестваса оцю васта занци «Полю» поэмась. Тя произведениясь сембода оцюсь и няевикссь Григорий Ильич Ельмеевонь творчестваса. Тяса сембе ширде няфтьф мокшень стирть Полють судьбац и эряфонь подвигоц. Поэтсь няфтьсы Полюнь стака идькс пингонц, сонь алянц постуфонь судьбанц, тядянц рана куломанц.

Эряви азомс, што Г. И. Ельмеев лац маштсь аф аньцек стихонь сёрмадома, но и варчсезень вийнзон волшебно-фантастическяй ёфксонь жанраса. Тейнза удалась тяштемс стихса «Ёжка», «Маза – таза» ёфкст. Синь тячемс ашезь юмафта эсь смузьснон, мялень салайхть содержанияс коре и крхкат идеянь ширде.

Григорий Ельмеев лац содазень иттнень психологияснон, мяльснон – арьсемаснон и вешфксснон. Сяс идень ёфксонза тяштьфт пяк тёждя кяльса, крхка поэтическяй вийса.

Григорий Ельмеев каршек Ведьма куйти, кона наругай и салай – грабай простой труженикнень эса, путнесы смелай, мезьдонга аф пели Ёжкать, конань пяк мялец машфтомс аера вайме куйть, а тянь вельде максомс волять ашу ломаттненди. Авторсь, козя художественнай кяльса-валса, мазы обраснень и детальхнень вельде няфтьсы ёмла геройть Ёжкань видешинкса тюремань аф тёждя кинц. Сон повонды разнай стака прябалас, но сякокс лиси сяськикс, машфтсы Ведьма куйть.

        Народнай ёфксонь кой-кона элементтнень сувафнесазь произведениязост и писательхневок, но ряцок волшебнай геройхнень мархта сувафнихть эсь арьсеф геройхть.  Кепотьксонди, Г. Ельмеевонь «Маза-Таза» ёфксса васьфневихть и народнай ёфксонь геройхть, кода Лии лишме, волшебнай крня и стак тов, стане и тяниень пингонь геройхть и предметт – метрось, самолётсь и стак тов.    

1 Г.И. Ельмеевонь эряфонь и творческяй киц.

Григорий Ильич Ельмеевонь творчестванц колга корхтамста аш кода аф лятфтамс войнаса шавф писательхнень. Сятнень, конат максозь од эряфснон Родинать араламста, фашисттнень машфтоманкса.  

Мордовиянь колмогемонь нилие поэттнень и прозаикнень эзда комсь кафксувось войнань кизотнень ульсть действующай армияса. Геройнь куломаса кулость талантливай прозаикне и поэттне С. Родькин, Г. Ельмеев, А. Зиньков, Ф. Дурнов, А. Рогожин, П. Кономанин, И. Чудайкин и лиятне. Синь штыкса и пераса тюрсть коричневай чумать каршес.

        Войнаса шавф писательхнень ёткса башка васта занци мокшень поэтсь Григорий Ильич Ельмеев. Сон шачсь Рузаевскяй райононь Сузгярьгя велеса. Аляц ульсь ашу ломань. Церанять пяк мялецоль тонафнемс, арамс сёрмас содай  ломанькс. Но тейнза удалась аделамс аньцек кафта класст, сяда тов тонафнемс ашель мезь лангс. Гриша церанясь сембе сяка касфнезень содамашинзон, якась учительхнень шири книганкса. 1933 кизоня Григорий Ильиченди удалась тумс Саранск ошу учителень курсас.

Учителень курсса тонафнесь киза, а аделамдост меле  трудендась начальнай школань учителькс 1941-це кизоть самс. Ся кизотнень мокшень газетатнень и журналхнень эса кармасть лисендема Г. И. Ельмеевонь стихотворениянза. Сембода лама поэтсь работась колмогемонце кизотнень омбоце пялестост. Аф стак ся пингть сонь лемоц и творчествац цебярьста содафтольхть мокшэрзянь литератураса. Григорий Ильич ульсь Михаил Безбородовонь творчестванцты мольфтикс и сёрмадсь иттнень колга аф кржа произведения. Да и лиякс ашель кода. Вдь тя темась тейнза, кода учителенди, ульсь сембода малакс. Тяда башка, Григорий Ельмеев пяк мазыста и крхкаста няфнезе шачема – касома крайть козя природанц. Вов, кепотьксонди, кода сон морасыне перьфпяльдень картинатнень «Тундань шитне» стихотворениясонза:

                       

                        Тон, тундань шиня,

                        Псиня валдоня,

                        Ловнять солафтыть,

                        Нардайть нардазне.

                        Уды ляйнять лангс

                        Тоса варжакстоть,

                        Эйнь седнянзон

                        Срафтыть – калафтыть [27, с.45].

Тя аф оцю стихотворенияса няеви, кода Григорий Ельмеев сёрмадомань тевса нажетькшни устнай народнай творчествань традициятненди, сидеста тевс нолясы уменьшительно-ласкательнай суффиксть «шиня», «псиня», «валдоня», «ловнять». Ельмеев перьфпяльть няфнесы аф фкя вастса ащикс, а природась живой, эрьгя эсьсонза кирди «уды ляйнясь», «тоса варжакстоть (тундась)». Кода няйсаськ, поэтсь максси перьфпяльти ломанень действият. Лама васьфнетяма и пшкядемада. Кепотьксонди «тон, тундань шиня».

        Азсаськ сяньге, што кода поэт Григорий Ельмеев ламода тонафни мокшень поэтть М. И. Безбородовонь эзда. Безбородов маштсь няфтема родной крайнь пейзажнай картинат. Тяфтама стихотворениянза,  кода  «Вирь»,  «Вирти»,  «Тунда»,  «Сексе» и лият. «Вирь» и «Вирти» стихотворениятнень эса поэтсь няфни шачема крайнь пяк мазы картинат, вирьхть, лугат. «Тунда» стихотворениясонза тундась пяк мазы аф аньцек природать сргоземанц мархта, но сяда мазы сон паксянь работатнень кенеремаснон мархта: живондай природать мархта эвондайхть и кодама повсь тефт.

Эряви азомс, што Г. И. Ельмеев сяда тов мольфтезень мокшэрзянь литератураса М. Безбородовонь традициянзон. Григорий Ельмеевонь произведениянза тематикас коре стапт жа, кода и ся пингонь мокшень лия поэттнень. Нят – сёра видихнень колхозу сувамасна, общественнай хозяйстваса вийнь аф ужяльдезь работась, од ломаттнень кельгомасна, ваймамасна, марстонь трудсна и содамошиснон касфтомасна. Но тя ёфси аф корхтай сянь колга, што Ельмеевонь стихотворениянза похожайхть лия поэттнень произведенияснон лангс художественно-изобразительнай средстватень и поэтическяй детальхнень ширде. Григорий Ильичень ульсь сонцень эсь лацонь поэтическяй вайгялец. Аньцек тянкса произведениянзон курок содасайть лиятнень ёткста. Синь тёждяста лувовихть, цебярьста шарьхкодевихть. Тянь поэтсь сатнезе сяс, мес пяк лама тонафнесь мокшэрзянь устно - поэтическяй творчествань произведениятнень, сембода пяк мокшень народнай моротнень и сиде моронятнень эзда. Сембось тя макссь оцю лезкс Григорий Ельмеевонь творчестванцты. Кепотьксонди, лувихнень мяльс тушенды «Настанясь» стихотворениясь. Тяса азондови мокшень мазы стирнять колга:

                       Кельгом Настанясь,

                    Пиже лопанясь,

                    Круглай шаманясь,

                    Якстерь щёканясь.

                    Стирнясь цебярьня –

                    Кели лафтуня,

                    Стяда мяштеняц

                    Яви кафтуня…[27, с. 35].

        Тя произведениясь тяштьф мокшень народнай моротнень влиянияснон вельде. Сон нльне морамс тёждя. Тяфтама поэтическяй размерса и формаса сёрматфт Г.И. Ельмеевонь «Тялонда», «Охотник» и лия стихонза. Синь эздост минь няйсаськ аф аньцек природань мазыдонга мазы картинатнень, но и велень покодить эрь шинь тевонц [30, с.89].

Поэтсь кайги вайгяльса, панжадонь седихть морасы ся пингонь велеть и ломаттнень эряфснон. Тянь лац няйсаськ «Захар атя» стихотворенияста. Поэтсь стихть ушедсы мазы морокс:

   

     Вирь кучканяса                                Панчфнень эзда

    Ащи эшиня,                                      Кандыхть мешенза.

    Касы вельхкссонза                            Кафта сядошка

    Лапас пяшеня…                                Атять нешконза,

    Тя вирнять эса                                  Кафта сятт пуд медь

    Ёмла од кудня.                                 Кандсть сонь мешенза.

    Эряй эсонза                                       Сёксень праздникста

    Шаржу атяня.                                    Захар атязе

    Кержи ширети                                   Лац работанкса

    Стяфнефт нешконза,                     Казнять фатязе [27, с.67]

Поэтсь лямбе валса азондcы Захар атянь эряфонц, кода мазы вирьть кучкас стяфнефт нешконза, кода сон вийнь аф ужяльдезь трудендай, кельгсы эсь тевонц, лац работаманкса казеви питни казнеса. Тя стихсь ашезе юмафта эсь эрявикс шинц тячемс аф аньцек сянкса, мес ёфси минь литературасонк аш произведеният нешкеперень работникнень колга, а сяс,  мес тяни лоткасть мешвеленянь кирдема, юмафнесы эсь лемонц пчеловодонь профессиясь. Тя произведениясь сёрматф народнай моронь мотивса, простой кяльса, козя художественно-изобразительнай средстваса. Сонь эздонза няйсаськ, кода колмогемонце кизонь простой колхозникне кельгозь эсь хозяйстваснон, покодемать.

Ельмеевонь творчестваса оцю васта занци «Полю» поэмась. Тя произведениясь сембода оцюсь и няевикссь Григорий Ильич Ельмеевонь творчестваса. Тяса сембе ширде няфтьф мокшень стирть Полють судьбац и эряфонь подвигоц. Поэтсь няфтьсы Полюнь стака идькс пингонц, сонь алянц постуфонь судьбанц, тядянц рана куломанц.

Ушедови азондомась Полють идькс пингстонза. Полють трязе ськамонза аляц. Тядяц кулось вачашить эзда:

          Велеть пеняса

         Калада кудня,

        Эряй эсонза

         Постуф атяня.

         Кулось вачеда

 Кельгом поланяц,

Тяни сонь илядсь

            Стирняц  Полюняц… [27, с.89].

Аф ваномок стака покодемать лангс Полю кассь пяк мазы стирекс.  Вов кодама портретнай характеристика авторсь максси Полю стирняти:

Шамац  круглайня,

Сенем сельмоня,

Мазы щёканя,

Кодаф кафтува

Равжа касаняц,

Седить токасы

Гайняй вайгяльняц.

Шачеманяда

           Сон  удалакшнесь,

Касоманяда

         Сон угадякшнесь

                                                   Щафке-карксафке

         Панксу панарняц,

      Сядонга панксу

               Сонь рукаваняц… [27, с.96].

Григорий  Ельмеев  пачфнесы  лувити,  кодама  аф няемань  ланга  савсь ётамс мокшень стирти. Пяк мяляфтови и ацерфты картитнат няфни авторсь, штоба пачфтемс лувити козятнень шобда ваймоснон:

         Баярсь кяжиясь –

        Мчкор пейнза,

 И аф парста ванцть

         Кяжи сельмонза.

   - Панесть стадать сей,

       Постуфть, сотнесасть,

Нищайть, инекуйть,

   Тейне сей тусасть! …

Ускозь од стирнять,

         Сотнефт кяднянза,

Снавнякс кеворихть

        Сельмоведнянза.

         Пукшу пондонянц

        Пиксозь локшеса,

Кирдезь колма шит

  Кардса шобдаса… [27, с.76].

Тя произведенияса оцю васта занцихть социальнай прябалатне. Авторсь азонды аф аньцек ашуфнень  лангса  козятнень наругамаснон  колга, но и няфнесы  войнать ризфонц. Поэмать омбоце пялькссонза Г.Ельмеев няфтьсы, кода Полю участвондай гражданскяй войнаса. Авторть оцю заслугац тоса, што произведенияса пяк сединь токазь панчф войнать самац:

                           

                              - Ой, война, война! –

                           Марявсь велети,

                            Равжа туця сась

                           Валда менельти,

                           Сявозь велеста

                           Сембе алятнень,

                           Аляфтома лядсть

                           Иттне, аватне.

                           Кие трясыне,

                           Кие щасыне

                           Иттнень, аватнень,

                           Сире бабатнень?... [27, с.54].

Поэтсь ётафты мяль – войнась канды аньцек кулома, вачаши. Шудефтови лама вер. Няфнемок ня стака событиятнень авторсь тевс ноляй лама художественнай средства. Сидеста васьфневихть метафоратне и эпитеттне:

  Оржа шашкатне

       Лама пряда керсть,

    Вай, оцю ляйнякс

            Шудесь якстерь версь.

Вяшки пулятне

       Кода вирь керыхть,

       Сюдоф солдаттнень

                      Калму пяярдихть… [27, с.32].

Полю алянц куломда меле туй батрачкакс помещикти, коса васенцеда эряфсонза васьфти седифтома и совестьфтома ломатть. Авторсь кели планца няфтьсы велеса классовай тюремать, коса участвовандай Полю стирсь. Помещикть шире стака эряфсь, стирть ёжензон лангса наругамась кошярясазь Полють помещикть шавома. Тянкса сон пови ссылкас Сибири, коса васеди политическяй ссыльнайхнень мархта, синь тонафтсазь сёрмадома и лувома, тяса календави смелай стирть обуцяц [31, с.97].

Сяда тов авторсь азонды войнань событиятнень колга, коса участвондай алянь формаса щаф стирсь Полю:

       

 …Тосоль Полю стирсь,

Алякс наряжась,

Эсь винтовканянц

    Кемоста люпштась.

        Кода мяндезе

   Полють каторгась,

Коса сон эрясь,

          Коста фронту сась?.. [27, с.32].

 Войнада меле мрдай родной велезонза, коса тюри козятнень каршес. Кулакне аф весть тяряфнесть стирть машфтомс, но сон сембе сяка аф кадондсы эсь вастонц, кемокснесы велеса колхознай эряфть.

Г. И. Ельмеевонь поэмац васенцеда печатлафоль 1940 кизоня «Колхозонь эряф» журналса, а тяда меле сувафтфоль мокшень-эрзянь школьнай учебникненди.

Эряви азомс, што Г. И. Ельмеев лац маштсь аф аньцек стихонь сёрмадома, но и варчсезень вийнзон волшебно-фантастическяй ёфксонь жанраса. Тейнза удалась тяштемс стихса «Ёжка», «Маза – таза» ёфкст. Синь тячемс ашезь юмафта эсь смузьснон, мялень салайхть содержанияс коре и крхкат идеянь ширде.

Григорий Ельмеев лац содазень иттнень психологияснон, мяльснон – арьсемаснон и вешфксснон. Сяс идень ёфксонза тяштьфт пяк тёждя кяльса, крхка поэтическяй вийса. Лувсак «Ёжка» ёфксонц и мярьгат сёрматф аф колмогемонце кизотнень, а тячи. Авторсь фантастическяй обраснень вельде кепсесы патриотическяй темать, няфнесы ёмла лувити мезе эряфса цебярьть и кальдявть ёткса. Поэтсь сёрмады:

                                   

                                   Островть крайса эряйхть ломатть,

                               Синь инзайхть и сокайхть модать.

                               Лангсост щапне – сязеньтьф котфкат,

                               Мушконь каркссна перьфкаст сотфкат,

                               Эряфсь теест – аньцек горя:

                               Ведьма куйсь изь макссе воля.

                               Хоть тон кулок – мяленц ванк!

                               Сембе паршиняцень кантк.

                               А аф ванцы кие мяленц,

                               Юрнек керсы сюдофть кяленц.

                               Сотни сялдаззонза кев,

                               Лийфтьсы морять омба пев… [26, с.23].

Григорий Ельмеев каршек Ведьма куйти, кона наругай и салай – грабай простой труженикнень эса, путнесы смелай, мезьдонга аф пели Ёжкать, конань пяк мялец машфтомс аера вайме куйть, а тянь вельде максомс волять ашу ломаттненди. Авторсь, козя художественнай кяльса-валса, мазы обраснень и детальхнень вельде няфтьсы ёмла геройть Ёжкань видешинкса тюремань аф тёждя кинц. Сон повонды разнай стака прябалас, но сякокс лиси сяськикс, машфтсы Ведьма куйть. И поэтсь ёфксть песа тии обобщения:

                             Сетьме кожфти комсихть шуфттне,

                         Панчфса кодафт клянцень куттне,

                         Тяза кочкафт мазы стирьхть,

                         Ведьмать инголенза кштихть.

                         Тяфта ванцазь ведьмать мяленц,

                         Штоб аф сафтомс куйнь кяженц.

                         Шинек – венек сисем прясь

                         Салаф стирьхнень пяк муцясь.

                            Климкась кожфса пупордась,

                         Ведьмась шавфста алу прась.

                         Мазы стирьхне Ёжкать каннезь,

                         Кода ёмла идень ваннезь,

                         Корхтайхть: «Цёрась идемазь,

                         Вольнай эряйкс тиемазь»… [26, с.43].

Поэтсь ёфксонь жанрать вельде няфтезе простой ломаттнень волянкса, павазонкса и видешинкса тюремаснон. Произведениясь кошярясыне ёмла лувихнень, да и оцюфнень, улемс честнайкс, аф пелемс сталмода, мзярда эряви араламс видешись, вольнай эряфсь, шачема крайсь и Родинась. Ня мотифне и оцю понятиятне ётайхть Григорий Ельмеевонь ламоц произведениянзон пачк, а сембода пяк «Полю» поэманц эзга.

Григорий Ильич Ельмеевонь оцюфтольхть творческяй планонза. Но синь лядсть апак пяшкотть. 1941 кизоня фашисттне врьгятсть кельгома Родинаньконь лангс. Григорий Ильич, кода афкуксонь патриот, тусь Отчизнать аралама. Сон шавовсь вишке бойса 1941 кизонь сентябрть ковста. Мокшэрзянь литератураста тусь талантливай поэт. Сон кулось геройнь куломаса. Катк тяни аш минь ётксонк Г. И. Ельмеев, но сонь поэтонь кайги вайгялец мзярдонга аф кулы. Аньцек пяк ужяль, што литературасонк юксневихть поэттне – фронтовикне. МССР – нь Писателень союзсь и Мордовскяй книжнай издательствась юкстазь Г. Ельмеевонь, С. Родькинонь, И. Чудайкинонь и лия поэттнень – фронтовикнень литературнай наследстваснон. Пароль нолдамс стихснон, поэмаснон, рассказснон башка книгас. Ужяль сявок, што ламоц поэттнень – фронтовикнень творческяй кисна апак няфтть нльне «Мордовскяй советскяй литературать историянц» книгаса. Колма томонь книгать авторонза мес-бди ашесть му васта Г. И. Ельмеевонди, С. И. Родькинонди, Ф. С. Дурновонди, И. С. Чудайкинонди [32, с.132].

        Мокшень поэтсь – фронтовиксь Г. И. Ельмеев пераса и штыкса тюрсь минь Родинаньконь и народоньконь врагонзон каршес. Сон, ушедомок васенце произведениястонза и творчествастонза мекольдень строчкати молемс, кайги вайгяльса и сембе вийса моразе эряфть; идень павазть и мазы родной природать. Инь цебярь произведениянза тонафневихть школаса.

        Лама произведения казьсь поэтсь и шабатненди. Пяк цебярьста содазе устнай народнай творчествать. Емла лувихненди кельговихть стихса тяштьф волшебно – фантастическяй  ёфксонза: «Ежка», «Маза - таза».

        Григорий Ельмеев пяк смузюволь поэтсь, тя цебярьста няеви произведениянзон эзда. Кда сяда ламоняс эряль, козякафтолезе мокшень -эрзянь литературать. Но тянди шорясь Великай Отечественнай войнась. Поэтсь тусь эряфста 35 кизоса.

         Григорий Ильичень стирец, кона эряй Рузаевскяй райононь Сузгярьге велеса, Зинаида Григорьевна Князькова варчсесы вийнц поэзияса, сёрматкшни стихт.

2 Литературнай  ёфксонь жанрась  Г. Ельмеевонь творчестваса.

2.1. Литературнай  ёфксонь жанрать колга шарьхкодемась

        Сембе прозаическяй и стихотворнай ёфксне эсь шачемаснон и эрямаснон коряс явовихть кафта группава. Литературнай ёфкст рузонь литератураса сёрмадсть А. Пушкин, А. Жуковский, С. Аксаков, П. Ершов, А. Погорельский и лиятне. Мокшэрзянь литератураса содафт А. Мокшонить, С. Аникинонь, Г. Ельмеевонь, Я. Пинясовонь, Ф. Атянинонь, Н. Голенковонь, М. Тарасовать и лиятнень ёфкссна.

        Писательхне ёфксонь жанрати шарфнихть эста, мъзярда эряви простой кепотьксса няфтемс стака шарьхкодематнень, кода куломась и эряфсь, цебярьсь и кальдявсь, павазсь и ризфсь. Фантастикать вельде тиендеви стама прябала, мъзярда лихтевихть лангти ломанть афкуксонь маштомашинза, сатфксонза, виец.

Литературнай ёфксса мялень салазь тиф конфликтське. Мезьса ина явфтовихть фкя - фкада фольклорнай и литературнай ёфксне?

- Литературнай ёфксть ули автороц, фольклорнайть аш.

- Литературнай ёфксть кивок аф полафтсы авторда башка, фольклорнайсь полафневи, ётнемок фкя азондыть эзда омбоцети

Мокшэрзянь  литературнай  ёфкссь, кода содаф, эвондась колмогемонце кизотнень кучкаста, и эстокиге занясь кеме васта идень лувомаса. Эстонь пингонь ёфкснень аф фкя лацонь ширесна ульсь ся, што синь ульсть волшебнайхть, ичкози салсезь иттнень мяльснон. Къда сяда маласта  ваномс произведениятнень, саят мяльс, што тя жанраса няфтьфсь малады афкуксонь эряфти. Ня ёфкснень эса няевихть ся васттне, коса няфневи действиясь, содавихть действующай лицатне [1, с.35].

Литературнай ёфкснень эса аф аньцек азондомась малады эряфти, но и синць произведениятневок арсихть сяда самостоятельнайкс и эсь лацоннекс, тянди улема лезды фольклорти  маладомась.

Мокшэрзятнень устнай народнай творчествасост оцю васта занцихть ёфксне. Ня произведениятнень эса пяк лац няевихть народть мяленза - арьсеманза, нравственнай идеалонза, историяц. Мокшетне  и эрзятне ёрасть няфтемс эряфсост сембе полафткснень и сатфкснень художественнай валса. Народть ёткста мушендовсть талантливай  ломатть, конат маштсть латсема и азонкшнема азкст, морот, ёфкст. Ня произведениятне ётнесть фкя поколенияста омбоцети аф ламода полафнезь. А лисендсь тя тяфта: эрь моронь морайсь или ёфксонь азондысь эсь мяленц коряс мезе аф мезе нолнесь или, меколанкт, сувафнесь. Сяс кой-коста содержанияс коре фкя-сяка текстсь уленди аф ламода лия.

            Ся произведениятненди, конат латсевсть и азонкшневсть устна, мярьгихть английскяй валса -  фольклор ( народть ёнюшиц, смузец).

            Фольклорнай произведениятне азондыхть ся пинкнень колга, конатне аф мувихть кодамовок лия источникста. Синь явондовихть эрь кодама жанрава.

 Няеви васта мокшэрзянь устнай творчестваса заняй идень фольклорсь, коза сувайхть идень ёфксне, идень поэзиясь и налхксематне.

        Иттненди сембодонга пяк кельговихть ёфксне. Фкя вастса тейст мярьгихть «ёфкст», омбоцеса - «баснят», колмоцеса - «побаскат», азондозь азондови, ёфтазь ёфтави произведеният. Тяни ёфксне тейнек няевихть произведениякс, конатнень сембе содержаниясна тиендеви чудань коряс. Кунардонь пингонь ёфксненди кемасть.

        Ёфкснень азонкшнезь ащема кудса тевонь тиемста, охотендамста, вирень керомста. Вирень керыхне сивотькшнесть ломань - ёфксонь содай, сявонделезь сонь мархтост вирень кудняс, и сон азонкшнель ёфкст Вирявать колга. Ломаттне сембе мадондсть удома вастозост, а ёфксонь азондысь азондсь ёфкст кулхцондыхнень матодовомозост. Азондови ёфксть вельде ононь няйфсь и афкуксонь эряфсь ётнесть фкя-фкянди. Тяфта ёфкссь содержанияс коре сотневи эряфть мархта. Синь эсост няевихть кой-кодама пингонь пластт. Тя тевсь ётась аф фкя лаца. Одсь сувсесь сирети и шоворькшнесь мархтонза, тиемок фкя целай. Пингсь, сувамок сире ёфксти, полафнезе сонь сюжетонц, одкстоптомок ёфксонь азондыть кяленц.

        Азсаськ нинге сянь, што эрь народть ёфксонзон содержаниясна и геройхнень обуцясна аф фкя лацоннет, сяс мес лият эрямань условиятне, историческяй и национальнай эсь лацонь ширетне.

        Содержанияс коре ёфксне явондовихть колма группава: чудань, животнаень, эряма коень.

        Чудань ёфкснень эса няфневихть кунардонь пингонь ломаттнень верасна, арьсемасна и содамошисна перьфпяльть и эсь эряфснон колга.

        Ломаттне кемасть, што мирсь пяшксе чудада. Тя лисендсь сяс, мес мокшэрзятне эста нинге афолезь шарьхкотькшне перьфпяльть закононзон. Кепотьксонди, ломанць пельсь оцю шобда вирть эзда: эрьгоди ломанть колга ёфксса азонкшневсь, што сонь тоза эрьфтезе Вирявась; ведьс ваяй ломанть васькафтозе Ведявась и стак тов.

        Штоба курок якамс ичкоздень вастс, ломаттне арьсесть эслек лии ковёр, эслек якай кямот. Мезень колга инголи ломаттне арьсекшнесть, мезень колга синь азонкшнесть ёфкст - сембось валом - валом эряфса арась афкуксоннекс. Пинге ётазь, минь содасаськ, ломаттне эслек якай кямотнень вастс арьсесть парохотт, эслек  лии  ковёрть вастс - самолётт и стак тов.

        Животнайхнень колга ёфксса сидеста азонкшневи сятнень колга, конатнень ломаттне васьфнезь мала вирьхнень и эсь хозяйстваснон эса. Зверьхнень пряснон вятемаснон вельде няфневихть ломаттнень обуцясна. Келазсь няфневи ёжукс, машты васькафнема, но лияста сонцьке повонды кальдявс; върьгазсь - кяжи и жаднай, аф ёню; офтсь - ляпе седи, лияста казяма, аф пяк ёню, кельгсы лишнай пореманц; нумолсь сембода пели и стак тов.

        Эряма коень ёфкснень эса лихневихть лангти ломаттнень афсатыкссна. Сидеста действиясь мольфтеви велень ульцяса, кудса, вирьса.

Эряви азомс сявок, што эрь народть эсь устнай поэзияц, но лама и марстоннеда. Ваность тинць, сембе народонь ефкснень эса васьфневихть фкя лацонь геройхть: яга - бабась, Иван дураксь, солдатсь,  лама пряса инекуйхне  и стак тов.

Ефксне явовихть колма группава: жуватань, эрямакоень и чудань. Жуватань колга ефкснень эса главнай геройхне вирень зверьхне и кудонь жувататне. Тейст максовихть ломанень обуцят: келазсь - ёжу, врьгазсь - шава пря, кой - коста кяжи, офтсь - ляпе вайме и стак тов. Синь тиендихть ломанень тефт.  Лятфтасаськ, кода келазсь лездсь Костя атянди араламс пря врьгазть эзда.

        Эрямакоень ёфксса мезевок чудань аш, но эсост азондови эряфса аф  улендиксонь колга. Мяляфтсасть, кода Фокась керозе шалхконц Прокофий попть.

        Чудань ёфксне лувондовихть сембодонга кунардоннекс. Синь эсост няеви ингольдень ломаттнень кемамасна, мяльсна - арьсемасна перьфпяльть закононзон и эсь эряфснон колга. Кунардонь ломанць арьсесь, што перьфпяльсь пяшксе чудада: ведьса эряй ведьава, вирьса - вирьава, юрхта вастса - юрхтава. И кда ня божестватнень мяльснон аф ваномс, синь тииихть ломанти кальдяв. Ня кемаматнень коряс латцевсть и чудань ёфксне. Но эздост няеви, што эста ни  ломанць арьсекшнесь кода маласькафтомс эстейнза перьфпяльть и шарьхкодемс сонь закононзон.

        Чудань ёфкснень эса главнай геройкс эрьсихть инекуйхне, Яга - бабась, Иван - дураксь и стак тов. Тяса васьфневихть и эрь кодама чудеснай предметт: крня, кшнинь чудань пей, живолгофты или кулофты ведь, чудань серьхцемня   и лият. Сембе ёфкснень эса чудатне, кодама виихть тяст уле, ломанць песа сембе сяка лисенди сяськикс.

          Народнай ёфксонь кой - кона элементтнень сувафнесазь произведениязост и писательхневок, но ряцок волшебнай геройхнень мархта сувафнихть эсь арьсеф геройхть.  Кепотьксонди, Г. Ельмеевонь «Маза - Таза» ёфксса васьфневихть и народнай ёфксонь геройхть, кода Лии лишме, волшебнай крня и стак тов, стане и тяниень пингонь геройхть и предметт – метрось, самолётсь и стак тов.    

2.2  Г. Ельмеевонь «Ёжка»  ёфкссонза  богатырень образсь

Литературнай ёфксонь жанрась мокшэрзянь литератураса эвондась колмогемонце кизотнень пингста и эстокиге занясь няевикс васта лувихнень ёткса. Сембодонга пяк тя жанраса сёрматф произведениятне кельговсть иттненди.

Аф фкя киза шабатненди мокшэрзянь литератураса тяшнезь ёфксснон А. Мокшони, З. Дорофеев, С. Аникин, Г. Ельмеев, Л. Макулов, Ф. Атянин, П. Гайни, А. Щеглов, Р. Федькин, Я. Пинясов, А. Ежов, Н. Голенков, М.Тарасова и лиятне. Ламоц ёфкснень эса улихть сюжетт, конат сявфт  народнай фольклорста, но синь ладяфт кода литературнай произведеният.

        Григорий Ельмеев лац содазень иттнень психологияснон, мяльснон – арьсемаснон и вешфксснон. Сяс идень ёфксонза тяштьфт пяк тёждя кяльса, крхка поэтическяй вийса. Ушеды «Ёжка» произведениясь ёфксонь масторть колга азондомаста. Тяса авторсь ноляй тевс мазы художественно-изобразительнай средстват, лама васьфтеви глаголда. Тянь, улема, поэтсь тиендьсы сянь кис, штоба пачфтемс няфневи картинать действияса, кода бы сядонга маласькафтомс лувити. Штоба лувить сельминголенза эвондаль поэтть арьсефоц. И тя удалась Г. Ельмеевонди:  

Морять эса вии бурясь

Шофнень эса вяри ёрясь.                                                                               Шавихть берякти волнат,                                                                                      Ётксост эшеляйхть китат.                                                                                           Ули остров ведть кучкаса,                                                                                               И кунара азоркс тяса

Эряй сисем пряса куй,                                                                                        Народсь куйти сокай, нуй.                                                                               Марлють пряса киза-тяла

Якстерь марьхне нюрьгихть алу.                                                                      Панттнень пряста шудихть ветть,                                                                         Лангаст тиентьфт клянцень сетть.                                                                            Меки-васу нармотть лиихть,                                                                        Шуфттнень прява пизот тиихть;                                                                   Обезьяттне пяштьта порихть,                                                                              Слоттне эшеляма молихть.                                                                                     Лефне идьснон мельгаст вятихть,                                                                       Дикай зверьхнень эса эвфнихть;                                                                Крокодилхне кунцихть калхт;                                                                       Попугайхне нарвайхть алхт…[26, с. 12].

 

Лувсак «Ёжка» ёфксонц и мярьгат сёрматф аф колмогемонце кизотнень, а тячи. Авторсь фантастическяй обраснень вельде кепсесы патриотическяй темать, няфнесы ёмла лувити цебярьть и кальдявть ёткса аффкаксшить. Поэтсь тянь няфнесы народть и Ведьмать образснон вельде. Г. Ельмеев ёфксса азонды мокшетнень эстонь аф тёждя эряфснон колга. Тейст шинек-венек савондовсь покодемс Куйть лангс:

                                 

                                   Островть крайса эряйхть ломатть,

                               Синь инзайхть и сокайхть модать.

                               Лангсост щапне – сязеньтьф котфкат,

                               Мушконь каркссна перьфкаст сотфкат,

                               Эряфсь теест – аньцек горя:

                               Ведьма куйсь изь макссе воля.

                               Хоть тон кулок – мяленц ванк!

                               Сембе паршиняцень кантк.

                               А аф ванцы кие мяленц,

                               Юрнек керсы сюдофть кяленц.

                               Сотни сялдаззонза кев,

                               Лийфтьсы морять омба пев [26, с. 14].

Григорий Ельмеев каршек Ведьма куйти, кона наругай и салай – грабай простой труженикнень эса, путнесы смелай, мезьдонга аф пели Ёжкать, конань пяк мялец машфтомс аера вайме куйть, а тянь вельде максомс волять ашу ломаттненди:

Велеть песа край кудняса

Ёмла Ёжкась эряй тяса.                                                                                      Цёрась эрек, аф нувай,

Ведьмать шавома срхкай.

Понцесь пецек  карькскя пенят,

Каясь сумказонза стрелат,

Сотнесь бокозонза кедь,

Каясь потмозонза ведь.

Пади ламос молемс арай,

Пекце вачи-ярхцамс анай…

Марась кяскавняти кшит,

                                 Штоба сатольхть лама шит… [26, с.16].

Перьфпяльть и ломанть ёткса сотксненди авторсь максси оцю васта.

Моли  Ёжкась лямбе шири,

   Курок пачкодсь шобда вири.

Вармать эзда вирсь увнась,

                                  Ёжкась савор тов сувась… [26, с. 15].

Авторсь, козя художественнай кяльса – валса, мазы обраснень и детальхнень вельде няфтьсы ёмла геройть Ёжкань видешинкса тюремань аф тёждя кинц. Сон повонды разнай стака прябалас, но сякокс лиси сяськикс, машфтсы Ведьма куйть. И поэтсь ёфксть песа тии обобщения:

                             

                            Сетьме кожфти комсихть шуфттне,

                         Панчфса кодафт клянцень куттне,

                         Тяза кочкафт мазы стирьхть,

                         Ведьмать инголенза кштихть.

                         Тяфта ванцазь ведьмать мяленц,

                         Штоб аф сафтомс куйнь кяженц.

                         Шинек – венек сисем прясь

                         Салаф стирьхнень пяк муцясь.

                            Климкась кожфса пупордась,

                         Ведьмась шавфста алу прась.

                         Мазы стирьхне Ёжкать каннезь,

                         Кода ёмла идень ваннезь,

                         Корхтайхть: «Цёрась идемазь,

                         Вольнай эряйкс тиемазь» [26, с.13].

Оцю васта поэтсь максси диалогти. Мяляфтови ся вастсь, коса Ёжкась вирьса васеди атянять мархта. Тя сюжетонь детальсь аф весть васьфневи фольклорнай ёфкснень сюжетсовок. Тяста няеви фольклорть лангс нежедемась:

Сире  атя ляй трваса

       Эряй ськамонза кудняса.

                  Карьсефт пильгозонза карьхть,

                   Кочкси  кептерьс мазы марьхть.

                 – Шумбрат, атяй, мушка сакал!                                                                                            Няйса, эряфце тонь стака.                                                                                        Кие тяза усконзе,                                                                                                   Марень кочкайкс путонзе?                                                                                                – Шумбрат тонцьке, мазы  цёра!                                                                          Мезе  кизефтемс тон ёрат?                                                                                      Ков тон тяфта ки кирдят?                                                                                      Мезень колга пичедят?                                                                                              – Молян, атяй, ичкози,

Cедизе аф пичеди.

Няйса, атяй, пара арьсят,

Азондк  тейне, мезе марьсят.

Кинь тон азоркс лувондат?

Шинек-венек урондат.

– Эрянь кели мода лангса,

Бурясь саламань кить  лангста,

Оцю вири лийфтемань.

Вов тя вастоняти прань.

Ванан, вакссон сире баба,

Авардсь кядьсонза сонь шаба.

Шалхкоц улонцты утясь,

Пиже  ваймонять муцясь.

Корхтай: «Тяса ули пеце,

Стак аф ётай  шице-веце.

Мезе мярьган, сянь тисак.

Весть тят ваймосе, кульсак?».

Лоткась авардемда  шабась,

Ашезь  няев тейне бабась.

Али модати сувась,

Али  меки сон мрдась?

Ёжкась кеподезе  кяденц,

Ёрась касфтомс  атять  мяленц,

Корхтай: «Шиса мон улян,

Сире ваймоцень идян …»  [26, с. 17].

Ельмеевонь ёфксоц тонафты сиретнень мяльснон ванома, лиянь колга арьсема.

Кода и фольклоронь ёфксса аф весть васьфттяма колмонзаф действия. Вов Ёжкась вирьса васеди ведьмать мархта, шарфтсы цёрать сярдокс. Но тя тиевсь аньцек эста, мзярда сире бабась колмоксть уфась шамазонза:

Ашезь кенерь валня азомс,                                                                                                                     Сире ведьмать конянц  лазомс,

Ведьмась сялдазонц люпштась,

Колмоксть шаманц лангс уфась.

Дикай сярдокс Ёжкась арась,

Аф эсь вайгяльсонза парась.

Сире ведьмась пупордась,

Ёжкать сельмоста юмась... [26, с. 28].

        Поэтсь сяда тов азонды ёфксса, кода Ёжкати стакаль ётафнемс эряфсь жуватань пондса. Од цёрась горянц мархта сась тумоти. Тяса няйхтяма фольклорти нежедема, перьфпяльть поэтсь живолгофнесы. Ёжкась тумоти кода ломаненди пшкядсь:  

Меки тумоти мрдась,

Комась, инголенза прась.

– Ах, тон тума, тумонязе,

Стака каннемс сярдонь прязе.

Меки ломанькс тиемак,

Али толса пидемак ... [26, с.14].

 

        Мяленьконь коряс, лоткамс кой-кона афсатыкснень лангс. Тяфта, минь койсонк аф педа пес авторсь пачфтезе сюжетонь сюрекить. Аф шарьхкодеви, кодама богатырь уйсь лодкаса. Колганза ёфси оду аф азондови:         

Вов валомне уи лодка,                                                                                            Ёжкась ляй трвати лоткась.                                                                                   Лодкать уйфтьсы богатырь,                                                                                Озаф ваксозонза стирь.                                                                                                   – Штоли ворьгодсть ведьмать эзда?                                                                                  Кда стане – тейст мон лездан…                                                                      Лодкась малав, малав сась,                                                                                     Ваны, меки сон мрдась ... [26, с.34].

        Аф пяк шарьхкодеви сявок, коста сявовсь Климкась, кона лезды сисем пряса куйть сяськомс. Климкась васенцеда эвондай, мзярда кукунясь лезды арамс Ёжкати меки цёракс, а што Климкать кукунясь прважасы Ёжкати лездыкс аньцек ляткшни шарьхкодемс эстейнза лувити:

                Ёжкась серьгядсь: Климка, Климка!

    Эрят лоткса, шяйхнень ёткса,

 Сире ведьмать тяста паньк,

      Дикай зверьхненди сонь андк.

        Бабась пухокс лии вяри,

   Климкать  кядьста  сон  аф  мяни.

Климкась  кожфса  пупордась,

       Ведьмась  шавфста  алу  прась…[26, с. 34].

        Пяк мазыста няфнесы Ельмеев ёфксонь масторть, коса эряй сисем пряса куйсь и ведьмась. Тяса лятфтави А. С. Пушкинонь «Сказка о царе Салтане» ёфксоц, коса рузонь поэтсь азонды эрь кодама дивань колга:

        Ёжкась няи крепость тяса,

         Сиянь лишмот стенать пряса.

Стяфтат кемонь куцемат,                                                                                            Эста лишмоть ваксс куцят.                                                                                    Панжевсть кафту кевонь ортат.                                                                          Кодак тона боку ётат,                                                                                          Модать лангса од ковёр;                                                                                        Садса гайняй гуслянь мор.                                                                                      Сетьме кожфти комсихть шуфттне,                                                                          Панчфса кодафт клянцень куттне … [26, с. 19].

        Кода и фольклорнай ёфкснень эса, Г. Ельмеевонь героенцты эрявсь  колмоксть сяськомс эрь кодама перяфкст,  штоба машфтомс равжа вийхнень и тя тейнза сатовсь. Сон аралазень стирьхнень и машфтозе сисем пряса куйть ведьмать мархта:

Мазы стирьхне Ёжкать каннезь,                                                                          Кода ёмла идень ваннезь,

Корхтайхть: «Цёрась идемазь,                                                                           Вольнай эряйкс тиемазь… [26, с.26].

        Поэтсь волшебно – фантастическяй ёфксса няфтезе простой ломаттнень волянкса, павазонкса и видешинкса тюремаснон. Произведениясь кошярясыне ёмла лувихнень, да и оцюфнень, улемс честнайкс, аф пелемс сталмода, мзярда эряви араламс видешись, вольнай эряфсь, шачема крайсь.

2. 3 Г. Ельмеевонь «Маза-таза»  ёфксса  фантастикась и афкуксоннесь

Мокшэрзянь литературнай ёфкссь, кода содаф, эвондась  колмогемонце кизотнень кучкаста, и эстокиге занясь кеме васта идень лувомаса. Эстонь пингонь ёфкснень аф фкя лацонь ширесна ульсь ся, што синь ульсть волшебнайхть, ичкози салсезь иттнень мяльснон. Къда сяда маласта  ваномс произведениятнень, саят мяльс, што тя жанраса няфтьфсь малады  афкуксонь эряфти. Ня ёфкснень эса няевихть ся васттне, коса няфневи действиясь, содавихть действующай лицатне.

Литературнай ефкснень эса аф аньцек  азондомась малады  эряфти, но и синць произведениятневок арсихть сяда самостоятельнайкс и эсь лацоннекс, тянди  улема  лезды  фольклорти  маладомась.

Революцияда инголе мокшэрзятнень ашельхть литературнай кялень нормасна, синцень книгасна, журналсна, газетасна, мезсь пяк шорсесь мушендомс и касфнемс литературнай вийхнень. Синь сембе арьсефсна «солсесть», арсесть устнай народнай творчествакс. Хоть васенце вастть эсост сявондезь поэтическяй произведениятне, ряцок мархтост келемкшнесь прозаське, сонь тяфтама ширенза, кода азксне, устнай легендатне, ефксне.

Минь писателеньке тонафнесть устнай поэзиять эзда народть инкса ащема, цебярь эряфти надияма, кялень козяшитнень содама.

Октябрьда ингольдень мокшэрзянь прозаса лама тифоль фольклоронь материалхнень кочкамаснон и петемаснон коряс. Тяфтапт, кепотьксонди, «Красавец Дамай», «Как я ходил богатырей искать», «Про двух девочек» азкснень сермадозень С. Аникин. Инь мяляфтовись эздост «Сабан – богатырь»  ёфкссь, кона жанрань ширде мала  легендати.

Устнай народнай творчествась, кона эвондась письменнай литературать коряс пяк ламода сяда инголе, арась и тячемс ащи юркс письменнай литературать касоманцты.

Литературась и фольклорсь кемоста сотфт фкя – фкянь мархта, синь – художественнайста арьсемань кафта витт. И кда аф видеста шарьхкодевихть фольклоризмань кизефксне литератураса, то пяк теждя эльбядемс традициятнень и новаторствать, национальнай эсь койть и литературать народностенц ваномстост. Устно – поэтическяй творчествать художественнай традициянзон апак содак аш кода шарьхкодемс национальнай ванфть – арьсемать  касоманц.

Народнай поэтическяй традициянь тонафнихнень исследованияснон эса няфневихть, што мокшэрзянь писательхне лама амолясть и амоляйхть фольклоронь  лихтибряста. Сембода пяк тя ульсь 20 – 30-це кизотнень, мзярда сермадыньке тиендезь васенце аськолкснень. Эста синь нинге ашель тяштиень оцю маштомошисна, сяс лезксонди мольсть фольклорнай образецне,  сюжеттне,  конфликттне.

Произведениятнень эзда няеви, кода одкстомсь и козякодсь фольклорнай приемтне, кода келемсть лирическяй геройть и перьфпяльть еткса сотксне.

Фольклорнай традициятнень лангс нежетькшнезь сермадозь эсь произведенияснон И.П. Кривошеев, Н.Л. Эркай, Т.А. Раптанов, М.А. Бебан и лиятне. Ефксонь, балладань, легендань, преданиянь мотифне, художественнай средстватне, приемтне сидеста васьфневихть А.Д. Куторкинонь «Ламзурь», «Оцю ки лангса марлю», Н.Л. Эркайнь «Мора Раторть колга», П.С. Кирилловонь «Шобдавась Сура лангса», В.К. Радаевонь «Пенза и Сура», «Сияжар» произведениясост. Народнай традициятне эрявихть сермадыти аф аньцек национальнай колоритонь сатоманкса, но и сянкса, штоба шарьхкодемс национальнай сельмованфть, мяльть – арьсемать.

        Тяниень пингонь мокшэрзянь идень литератураса авторскяй ёфкссь занцесы инь няевикс вастть. Григорий Ильич Ельмеев ашезь кенере сёрмадомс лама, сон шавовсь Великай Отечественнай войнаса. Содафт лувити тя жанраса сёрматф кафта произведениянза «Ёжка» и «Маза – таза».

Фольклорнай  традициятнень  лангс нежедезь  сёрмадозе  «Маза-Таза» ёфксонц Г. Ельмеев. Кода и фольклолрнай ёфксса, Ельмеевонь произведенияц ушедови сянь эзда, кода идьфтома кунара эряй  атятнень – бабатнень кудса идень шачемать-касомать, оцю кис сонь лихтеманц эзда:

Эрясть-ащесть атят-бабат,

Ламос кудсост ашель шаба.

Нилегемонь кизонц лангс

Бабась эрек цёра кандсь.

Лем путсть идьснонды синь Маза,

Рамасть лемозонза каза.

Лофцта андсазь и симдьсазь,

Пенаклангса удофтсазь ... … [26, с.28].

        Кода и волшебнай ёфкснень эса, цёрась касы пяк вишкста, сонь эсонза няеви богатырень вий:

Ётась колма шит и венят,

Мазать кургонцты шачсть пейнят.

Эрь шиня сон касы вакс,

Ранги, аварди букакс.

Кассь. Ульцява якай Мазась.

Цёрась эрек, вии таза.

Оцю мархта клокса тюрсь,

Богатырень виец ульсь… [26, с.29].

        

        Кис срхкамста богатырьсь веши благословения шачфтыензон-касфтыензон кядьста. Тя приёмть авторсь сявозе фольклорнай ёфксонь сюрекиста:

                      Ломатть корхтайхть: «Ули мастор,

Тоса эряй питни азор,

   Сон народти пара тись,

         Оцю брадоц - валда шись».

                 Мазась ёрась мумс тя масторть,

       Няемс тоста пара азорть.

- Тядяй, аляй, мон туян,

Паваз эстейне муян…

           Сотнесь шнаса тёжянь стрелат,

Песна оржат, кода перат.

Озась ластя, ардозь тусь,

              Панттнень омбокс кяшевсь кудсь.

             Лишмоц арфтсы шуфттнень алга,

                     Лийфтьсы вярьге туцять фталга… [26, с.30].

         Волшебнай ёфксонь ладямань койкс эряви  лувомс и геройти  лезды предметонь сувафтомать. Лятфтасаськ, фольклоронь ёфксса сидеста тяфтама предметокс арсихть  цирьхцемнясь, крнясь, нармонь и стак тов. Ельмеев сувафтозе  лездыкс  крнять. Волшебнай ёфкснень эса лезды предметть макссы кодамовок паронь арьси ломань, Ельмеевонь героец сонць мусы крнять:

     Синь крня ки лангса мусть.

     Лишмось меки лиезь тусь…

Кеворсь инголест лугава,

         Оцю велева, курнява, -

        Кона шири тя крнясь-

        Тоза Мазась и стирнясь… [26, с.47].

Г. Ельмеевонь  произведениясонза малады фольклорти, но эсь пяльденза  лама  сувафни сонценнеда. Тяфта, павазу странать вешемста  богатырьсь  лама  васьфти  аф содафта, кона явлениятне эвондасть ни минь пингстонк: афкуксонь самолёттне, метрось, од машинатне:

          Молихть, молихть крнять мельге,

           Крьнясь - ведьти, синьге - ведьге.

Тяфта чуднай ошс сувасть.

    Месть нят менельса увнасть?

Лиихть вяри, боку, фталу,

             Мельцек, мельцек валгихть алу, -

  Нянди мярьгихть самолёт,

        Эсост бодрай од пилот.

                Стирсь и Мазась мольсть ульцява,

             Ардсть машинат кшнинь кинява,

Ацаф бронзаса ульцясь,

Золотаса валф курнясь.

          Тёжянь  ломатть тяса якайхть.

                 Корхтайхть… весялат и рахайхть.

        Тяса - тоса кели сатт,

Касыхть эсост виногратт.

          Нинге молихть крнять мельге,

              Крнясь - ведьти, синьге - ведьге.

     Кеворьсь башняти крнясь -

Тоза Мазась и стирнясь.

           Башнять потмоц  валф сияса.

        Ломатть мезе учихть тяса?

Валги савор куцемась,

Модать алу синь сувасть.

            Цифтор валдомсть заря тяшттне,

              Нюрьгихть эсост золод пяшттне.

Ацаф мраморса киякссь.

           Тяште цильфне  няфтсть сиякс.

               Валда стенась, мярьгат клянцень.

           Няйсак пачканза эсь пряцень.

Модать алга сай трамвай,

     Мазы станцияс сувай… [26, с.49].

        Г. Ельмеев «Маза-таза» ёфксса оцю мяль шарфни перьфпяльть образонцты. Азонды велева козя саттнень колга, а геройхне синць иттне:

     Ульцять квалма марлюфт касыхть,

Нюрьги марьхне эсост мазыхть.

         Валда кевонь якам кись,

          Цифтордсь эсонза сонь шись.

        Гайнясь морось столба пряса.

          Мазась арьсесь: «Гусля тяса».

  Кляньцса вельхтяф эрь куднясь,

        Панчфне вальманцты утясть.

        Велеть песа, садсь кучкаса

Сливат, вишнят кочкайхть тяса

        Ёмла цёранят, стирнят,

        Синь ульсть павазу иднят…[26, с.46].

 

        Эрямань - ащемань стака пингнень эрь народсь фалу шачфни-лихни эсь ёткстонза  инксонза  ащи,  виень  максы  ломань. Тяфтама  ломанць эвондакшни фалу эсь  пингстонза – аф сяда инголиня, аф сяда меколи. Мярьгат, сонць Шкабавазсь кучсесыне синь масторлангу эсь народоньди лездыкс, юмамаста – арамаста аралайкс. Григорий Ельмеевонь Ёжка и Маза-Таза героенза тяфтама Шкаень кучф ломаттельхть.

        Григорий Ельмеевонь «Маза - Таза» ёфксоц  тиф - ладяф народнай  ёфксонь койхнень коряс: идьфтома кунара эряй  атятнень – бабатнень кудса идень шачемась-касомась, оцю кис сонь лихтемац, вирь трваса кудняса сиреня мархта  васьфтемась, кона азондсы тейнза, лезды мумс павазу странать. Тонафтсы, кода эряви пачкодемс тя странати, максы тейнза кинь няфти крня. Но эзк эряви китькстамс, Григорий Ельмеев  произведениязонза лама сувафни сонценнеда: геройхнень эсь кяльсна, аф шарфни  лиятнень  лангс; азондомань приемтне; персонашнень лемсна, метроть, од машинатнень, самолёттнень, кремлять колга азондомась. Писательсь нежетькшни ёфксонь ладямста  кода  устнай  поэзиять козяшинцты, стане и  литературнай койхнень лангс.

        Григорий Ельмеевонь ёфкссонза сяськондевихть сембе  сталмотне, аньцек эряви кемамс и аф нолямс кяттнень. Фалу аськолямс инголи и сембось сатови – вяти мяльс мокшень писательсь. Сюне шитненеь мельге сайхть валда шит, перяфксне срадыхть и меки  перьфпяльсь ули мани и  варжаксты шись.        


Мекольдень валсь

        Сембе прозаическяй и стихотворнай ёфксне эсь шачемаснон и эрямаснон коряс явовихть кафта группава. Литературнай ёфкст рузонь литератураса сёрмадсть А. Пушкин, А. Жуковский, С. Аксаков, П. Ершов, А.Погорельский и лиятне. Мокшэрзянь литератураса содафт А. Мокшонить, С. Аникинонь, Г. Ельмеевонь, Я. Пинясовонь, Ф. Атянинонь, Н.Голенковонь, М. Тарасовать и лиятнень ёфкссна.

        Писательхне ёфксонь жанрати шарфнихть эста, мъзярда эряви простой кепотьксса няфтемс стака шарьхкодематнень, кода куломась и эряфсь, цебярьсь и кальдявсь, павазсь и ризфсь. Фантастикать вельде тиендеви стама прябала, мъзярда лихтевихть лангти ломанть афкуксонь маштомашинза, сатфксонза, виец.

Литературнай ёфксса мялень салазь тиф конфликтське. Мезьса ина явфтовихть фкя - фкада фольклорнай и литературнай ёфксне?

- Литературнай ёфксть ули автороц, фольклорнайть аш.

- Литературнай ёфксть кивок аф полафтсы авторда башка, фольклорнайсь полафневи, ётнемок фкя азондыть эзда омбоцети

Мокшэрзянь  литературнай  ёфкссь, кода содаф, эвондась колмогемонце кизотнень кучкаста, и эстокиге занясь кеме васта идень лувомаса. Эстонь пингонь ёфкснень аф фкя лацонь ширесна ульсь ся, што синь ульсть волшебнайхть, ичкози салсезь иттнень мяльснон. Къда сяда маласта  ваномс произведениятнень, саят мяльс, што тя жанраса няфтьфсь малады афкуксонь эряфти. Ня ёфкснень эса няевихть ся васттне, коса няфневи действиясь, содавихть действующай лицатне.

Литературнай ёфкснень эса аф аньцек азондомась малады эряфти, но и синць произведениятневок арсихть сяда самостоятельнайкс и эсь лацоннекс, тянди улема лезды фольклорти  маладомась.

        Тяниень пингонь мокшэрзянь идень литератураса авторскяй ёфкссь занцесы инь няевикс вастть. Григорий Ильич Ельмеев ашезь кенере сёрмадомс лама, сон шавовсь Великай Отечественнай войнаса. Содафт лувити тя жанраса сёрматф кафта произведениянза «Ёжка» и «Маза – таза».

        Г.Ельмеев «Ёжка» волшебно – фантастическяй ёфкссонза няфтезе простой ломаттнень волянкса, павазонкса и видешинкса тюремаснон. Произведениясь кошярясыне ёмла лувихнень, да и оцюфнень, улемс честнайкс, аф пелемс сталмода, мзярда эряви араламс видешись, вольнай эряфсь, шачема крайсь.

Кода и фольклорнай ёфкснень эса, Г. Ельмеевонь «Ёжка» произведенияста геройти эрявсь  колмоксть сяськомс эрь кодама перяфкст,  штоба машфтомс равжа вийхнень и тя тейнза сатовсь. Сон аралазень стирьхнень и машфтозе сисем пряса куйть и ведьмать. Колмонзаф действия васьфттяма и эста, мзярда Ёжкась вирьса васеди ведьмать мархта, шарфтсы цёрать сярдокс. Но тя тиевсь аньцек эста, мзярда сире бабась колмоксть уфась шамазонза.

Поэтть «Ёжка» ёфксоц мярьгат сёрматф аф колмогемонце кизотнень, а тячи. Авторсь фантастическяй обраснень вельде кепсесы патриотическяй темать, няфнесы ёмла лувити цебярьть и кальдявть ёткса аффкаксшить. Поэтсь тянь няфнесы народть и Ведьмать образснон вельде. Г. Ельмеев ёфксса азонды мокшетнень эстонь аф тёждя эряфснон колга. Тейст шинек-венек савондовсь покодемс Куйть лангс.

Г. Ельмеев фольклорнай  традициятнень  лангс  нежедезь  сёрмадозе  и «Маза-Таза» волшебно-фантастическяй ёфксонц. Кода и фольклолрнай ёфксса, Ельмеевонь произведенияц ушедови сянь эзда, кода идьфтома кунара эряй  атятнень – бабатнень кудса идень шачемать-касомать, оцю кис сонь лихтеманц эзда.

Ельмеевонь ёфксоц тонафты сиретнень мяльснон ванома, лиянь колга арьсема.

        Волшебнай ёфксонь ладямань койкс эряви  лувомс и геройти  лезды предметонь сувафтомать. Лятфтасаськ, фольклоронь ёфксса сидеста тяфтама предметокс арсихть  цирьхцемнясь, крнясь, нармонь и стак тов. Ельмеев сувафтозе  лездыкс  крнять. Волшебнай ёфкснень эса лезды предметть макссы кодамовок паронь арьси ломань, Ельмеевонь героец сонць мусы крнять.

        Эрямань - ащемань стака пингнень эрь народсь фалу шачфни-лихни эсь ёткстонза  инксонза  ащи,  виень  максы  ломань. Тяфтама  ломанць эвондакшни фалу эсь  пингстонза – аф сяда инголиня, аф сяда меколи. Мярьгат, сонць Шкабавазсь кучсесыне синь масторлангу эсь народоньди лездыкс, юмамаста – арамаста аралайкс. Григорий Ельмеевонь Ёжка и Маза-Таза героенза тяфтама Шкаень кучф ломаттельхть.

        Григорий Ельмеевонь «Маза - Таза» ёфксоц  тиф - ладяф народнай  ёфксонь койхнень коряс: идьфтома кунара эряй  атятнень – бабатнень кудса идень шачемась-касомась, оцю кис сонь лихтемац, вирь трваса кудняса сиреня мархта  васьфтемась, кона азондсы тейнза, лезды мумс павазу странать. Тонафтсы, кода эряви пачкодемс тя странати, максы тейнза кинь няфти крня. Но эзк эряви китькстамс, Григорий Ельмеев  произведениязонза лама сувафни сонценнеда: геройхнень эсь кяльсна, аф шарфни  лиятнень  лангс; азондомань приемтне; персонашнень лемсна, метроть, од машинатнень, самолёттнень, кремлять колга азондомась. Писательсь нежетькшни ёфксонь ладямста  кода  устнай  поэзиять козяшинцты, стане и  литературнай койхнень лангс.

        Мяленьконь коряс, ёфксса васьфневихть кой-кодама ёшмонят. Тяфта, минь койсонк, аф педа пес авторсь пачфтезе сюжетонь сюрекить, мзярда азонды «Маза-Тазать» васьфтеманц лия богатырень мархта. Аф шарьхкодеви, киель богатырьсь, коза и местема уйсь лодкаса. Колганза ёфси оду аф лятфневи и ёфси аф шарьхкодеви мезенди сон сувафтфоль ёфксонь содержанияти.         

        Григорий Ельмеевонь ёфкссонза сяськондевихть сембе  сталмотне, аньцек эряви кемамс и аф нолямс кяттнень. Фалу аськолямс инголи и сембось сатови – вяти мяльс мокшень писательсь. Сюне шитненеь мельге сайхть валда шит, перяфксне срадыхть и меки  перьфпяльсь ули мани и  варжаксты шись.        


По теме: методические разработки, презентации и конспекты

Викторина для педагогов, посвященная жизни и творчеству великого татарского поэта, публициста и общественного деятеля Габдуллы Тукая

Материал для проведения мероприятия, посвященного жизни и творчеству знаменитого татарского поэта Г.Тукая...

Проект "Устно-поэтическое творчество мордовского народа"

Устно-поэтическое творчество мордовского народа....

Проект "Жизнь и творчество русского писателя сказочника А.С.Пушкина"

Проект " Жизнь и творчество русского  писателя сказочника А.С.Пушкина"...

Проект "Жизнь и творчество С.Я.Маршака"

Дети в старшем дошкольном возрасте усваивают информацию об окружающем стремительными темпами. В связи с этим творчесвто С.Я. Маршака наиболее соотвествует потребностям в освоении многих сторон жизни р...

ПРОЕКТ «Знакомство с творчеством Забайкальского поэта Н.В. Ярославцева через интеграцию образовательных областей»

В  рамках  данного  проекта,    вызвать  интерес  дошкольников  к  творчеству  поэта  родного  края Николая Витальевича Ярославцев...

Творческая гостиная «Вечер-встреча с поэтом Григорием Рубцовым»

Творческая гостиная: «Вечер-встреча с поэтом Г. Рубцовым»Ребята очень ждали эту встречу, подготовили стихи наизусть из сборника поэта....

Паспорт педагогического проекта «Жизнь и творчество А.С. Пушкина и его произведения для детей»

Важную роль играет художественная литература в развитии умственного, нравственного и эстетического воспитания детей, а также в речевом, познавательном и личностном  развитии дошкольников. Но к бо...