«Бесәй һәм сысҡандар»

Уйынды ойоштороу: Бесәй уйын майҙансығы ситендә түңәрәктә, күҙен йомоп ултыра. Балалар - сысҡандар уны уятмаҫ өсөн майҙансыҡ буйлап аяҡ осонда ғына йүгерә, уйнай. Бесәй күҙен асып урынынан тороу менән сысҡандар ултыра биреп, ҡыбырламаҫҡа тейеш. 
Бесәй: "Бесәй сыҡты уйнарға,
Һор сысҡандар тоторға,
Хәҙер баҫтырып тотам да йотам",
тип һамаҡлап, урынынан тороп ҡасҡан сысҡандарҙы баҫтыра. Уйын аҙағында табыш һанала, яңы бесәй һайлана һәм уйын дауам итә.

Ҡағиҙәһе: бесәй һамаҡлағанда ҡыбырламай торорға; тотолған сысҡандар уйнауҙан туҡтай, бесәйҙең өйөндә йыйыла бара.

«Бүре менән ҡуяндар»

Уйынды ойоштороу: Уйын өсөн бүре һәм алып барыусы һайлана. Ҡалған балалар - ҡуяндар. Бүре майҙансыҡтың бер яғында эйелеп, йәшенә. Ҡуяндар - һыҙыҡ менән сикләнгән икенсе яҡта. Алып барыусы "ҡуяндар" тип әйтеү менән, улар өйҙәренән сығып, майҙансыҡ буйлап һикергеләй башлай. 
"Аҡ ҡуян, йомшаҡ ҡуян,
Беҙгә ҡунаҡҡа килгән.
Ҡолағы ергә тейгән,
Ҡойроғо ҡыҫҡаҡ ҡына".
Алып барыусы "бүре" тигәс тә, ҡуяндар ике аяҡта һикергеләп, өйҙәренә ҡаса, ә бүре уларҙы баҫтыра.

Ҡағиҙәһе: майҙансыҡ буйлап ике аяҡта һикереп кенә йөрөргә; алып барыусы ҡысҡырғас ҡына өйгә ҡасырға.

«Тирмә»

Маҡсаты: урында йүнәлеш һайлау һәләтен үҫтереү.

Уйынды ойоштороу: балалар дүрт төркөмгә бүленә, һәр ҡайһыһы майҙансыҡ мөйөшөндә түңәрәк яһап баҫа. Һәр түңәрәк уртаһында милли биҙәкле яулыҡ ҡуйылған ултырғыс тора. Ҡулға-ҡул тотоношоп, һәр түңәрәк йырлап әйләнә:

"Беҙ - дәртле ҡыҙҙар-малайҙар, түңәрәккә йыйылдыҡ.

Уйнарбыҙ ҙа, бейербеҙ ҙә, йүгерербеҙ аҡланға"

Һүҙһеҙ көй яңғыраған мәлдә балалар бер ҙур түңәрәккә йыйыла. Көй туҡтау менән һәр ҡайһыһы үҙ түңәрәгендәге ултырғысҡа йүгереп, ундағы яулыҡты өҫкә күтәреп, тирмә рәүешендә тоторға тейеш. 
Методик алымдар: башҡорт халҡының боронғо йәшәү шарттары, йорто сағылдырылған һүрәттәр ҡарау, милли биҙәкле яулыҡтар менән танышыу.
Өҫтәмә кәңәш: көй туҡтағас та тиҙерәк үҙ түңәрәгеңә барып, тирмә яһап өлгөрөр кәрәк. Кемдәр иң тәүге яһай, шулар еңеүсе.
Ҡулланма: башҡорт орнаментлы яулыҡтар, тирмә һүрәте, дүрт ултырғыс.