Яңы йылға шиғырҙар
консультация (младшая, средняя, старшая, подготовительная группа)

Беҙҙең шыршы балҡып тора, 
Ай-һай матур биҙәнгән. 
Йәйғор кеүек сулпылары 
Төшөп тора иҙәнгә.

Бөгөн шыршы балҡып тора 
Бүлмәләрҙә, өйҙәрҙә. 
Ул бейеп китер һымаҡ 
Беҙ уйнаған көйҙәргә. 

Өйөбөҙҙөң иң түрендә 
Балҡый йәшел шыршыбыҙ. 
Күлдәгендә тәтәй шарҙар, 
Энәлекәй ҡупшыбыҙ.

Төрлө төҫтә баҙлауыҡтар 
Йылпылдап янып китһә, 
Күҙҙәренән нур бөркөлөп, 
Ҡустым сәпәкәй итә.

Ул бит быйыл беренсегә 
Күрә шыршы уттарын. 
Ҡупшыҡай янына теҙә 
Машинаһын, аттарын.

Кескәй ҡулдарын күтәрһә, 
Тәтәйҙәр китә сыңлап. 
Ҡустымдың ҡыуанысынан 
Шыршыбыҙ тора йырлап. 

Шыршы матур, шыршы матур, 
Шыршы һәр саҡ йәм-йәшел. 
Энәләрен ҡоймай бер ҙә, 
Һәр ваҡытта йәп-йәш ул.

Шыршы тағы матурлана, 
Уйынсыҡтар тағылһа. 
Аллы-гөллө нурға сума, 
Киске уттар ҡабынһа.

Шыршы матур биҙәкләнһә, 
Ҡыш бабай ҙа ярата. 
«Ҡотло булһын Яңы йыл!» – тип 
Беҙгә бүләк тарата. 

Уның урыны – 
Байрам түрендә. 
Ул бөгөн, ай-һай, 
Матур күренә. 
Толобо йәшел, 
Сыбар нағышлы. 
Ялтыр сылбырҙар – 
Уның ҡайышы.

Башына кейгән 
Йондоҙ түбәтәй. 
Был ҡупшыҡайҙы, 
Йәгеҙ, кем әйтә? 

Йырланыҡ та бергәләп, 
Бейенек тә бергәләп. 
Уйындар ҙа уйнаныҡ 
Шыршыбыҙҙы тирәләп. 

Беренсе булып урмандан 
Килде байрамға шыршы. 
Уйынсыҡтар ҙа эленгәс, 
Бөгөн ул ниндәй ҡупшы.

Иң бейектә йондоҙ яна, 
Шыршыбыҙға йәм биреп. 
Ҡыш бабай аҙашмай килер 
Яҡты йондоҙҙо күреп. 

Иҫәнме, шыршы, һаумы - 
Яңы йыл килеп етте. 
Күңелле шыршы байрамын 
Балалар күптән көттө.

Һағынып бөттөк беҙ һине, 
Көндәрҙе һанап көттөк. 
Календарь биттәренә һәм 
Сәғәткә ҡарап көттөк.

Һин килдең бөгөн кейенеп, 
Биҙәнеп, матурланып. 
Беҙгә, кескәй дуҫтарыңа, 
Күңелле йырҙар алып.