Остуоруйа "Эйэлээх буолуохха"
план-конспект занятия (подготовительная группа)

Оруолларга:

Кэпсээнньит – Арсений Соловьев

Кутуйах – Айыына Аммосова

Дьуос – Айхал Бурнашев

Тииҥчээн – Туйаара Борисова

Куобах – Сардаана Семенова

Саһыл – Мичийэ Саввина

Бөрө – Айсиэн Степанов

Эһэ – Артем Павлов

Музыканан Кэпсээнньит киирэр. Заал ортотугар бокулуоннуур.

Кэпсээнньит:

• Болҕойуҥ, болҕойуҥ, болҕойуҥ!

Өрөйөн-чөрөйөн биэриҥ,

Бэттэх көрөн истин,

Чуумпуран олорон көрүҥ!

Остуоруйабыт саҕаланна!

Баран олоппоско олорор.

Кэпсээнньит:

• Арай биирдэ,

Кырыа кыһын кэлиитэ,

Кыстык хаар түһүүтэ,

Кыыллар барахсаттар

Кыстыыр сирдэрин көрдөөннөр

Үрүө-тараа сүүрдүлэр!

• Ол курдук, алаас ортотунан

Кутуйах сүүрэн испит.

Музыканан Кутуйах сүүрэн киирэр, заалы эргийэр, үтүлүккэ кэлэн тохтуур.

• Кутуйах:

Уччуу-ычча

“Сылдьыбыт сыыһы булар”

Иэхэйбиин, ичигэс да үтүлүк!

Кутуйах киирэн туораах бурдугун остуолга уурар, олоппоско олорор.

Музыканан Дьуос тэллэйдээх корзинкатын тутан киирэр, заалы эргийэр, үтүлүккэ кэлэн тохтуур.

• Дьуос:

Уччуу-ычча, атахтарым тоҥнулар.

Тук-тук-тук

Ким бу үтүлүккэ олороруй?

• Кутуйах:

Мин, мин Хороонньут Кутуйахпын

Онтон эн кимҥиний?

• Дьуос:

Мин, мин Дьуоспун

Илии тутуурдаах, өттүк харалаах кэллим.

Миигин баһаалыста киллэр.

• Кутуйах:

Аччыгы аһатар, тоҥмуту ириэрэр буолуохха

Чэ, киир киир!

Музыканан Тииҥчээн ыаҕыйалаах эриэхэтин туппутунан сүүрэн киирэр. Заалы эргийэр, үтүлүккэ кэлэн тохтуур.

• Тииҥчээн:

Уччуу-ычча

Кулгаахтарым тоҥнулар!

Тук-тук-тук

Ким бу үтүлүккэ олороруй?

• Кутуйах:

Мин, мин Хороонньут Кутуйахпын,

Мин, мин Дьуоспун

Онтон эн кимҥиний?

• Тииҥчээн:

Мин, мин Хаһаастаах Тииҥчээммин!

Ким доҕордоох, ол дьоллоох

Миигин баһаалыста киллэрин

Үтүө доҕор буолуоҕум!

Иккиэн:

Аччыгы аһатар, тоҥмуту ириэрэр буолуохха

Чэ, киир киир!

Тииҥчээн эриэхэтин Кутуйах ылан остуолга иһиккэ уурар.

Музыканан Куобах ойон киирэр, илиитигэр ыаҕыйалаах моркуобу тутан заалы эргийэр. Үтүлүккэ кэлэн тохтуур.

• Куобах:

Уччу-ычча

Муннум тоҥно,

Тук-тук-тук

Ким бу үтүлүккэ олороруй?

• Кутуйах:

Мин, мин Хороонньут Кутуйахпын,

Мин, мин Дьуоспун,

Мин, Хаһаастаах Тииҥчээммин

Онтон эн кимҥиний?

• Куобах

Мин куттас Куобахчааммын

“Уулаах балык быстыбат,

Ойуурдаах Куобах охтубат”

Миигин баһаалыста киллэрин!

Бары:

Аччыгы аһатар, тоҥмуту ириэрэр буолуохха

Чэ, киир киир!

Кутуйах моркуобу ылан тэриэлкэҕэ уурар.

Музыканан Саһыл киирэр, илиитигэр отонноох ыаҕыйалаах. Заалы эргийэр, үтүлүккэ кэлэн тохтуур.

• Саһыл:
• Уччу-ычча тоҥнохпуон

Тук-тук-тук

Ким бу үтүлүккэ олороруй?

Кыыллар:

Мин, мин Хороонньут Кутуйахпын,

Мин, мин Дьуоспун,

Мин, Хаһаастаах Тииҥчээммин,

Мин, мин куттас Куобахпын

Онтон эн кимҥиний?

Саһыл:

Мин тыа маанылаах кыыла Саһыл буолабын.

“Ааттаһар да ахсааннаах, көрдөһөр да күттүөннээх”

Миигин баһаалыста киллэрин.

Бары:

Аччыгы аһатар, тоҥмуту ириэрэр буолуохха

Чэ, киир киир!

Саһыл отонун Кутуйахха биэрэр.

Музыканан Бөрө киирэр, илиитигэр балыктаах. Үтүлүккэ кэлэн тохтуур.

• Бөрө:

Уччу-ычча, тоҥнохпуон.

Көрдөөбүт көһүйэ көмүһү булар диэн маны эттэхтэрэ.

Тук-тук-тук

Бу ичигэс үтүлүккэ ким олороруй?

Кыыллар:

Мин, мин Хороонньут Кутуйахпын,

Мин, мин Дьуоспун,

Мин, Хаһаастаах Тииҥчээммин,

Мин, мин куттас Куобахпын,

Мин, мин мааны Саһылбын

Онтон эн кимҥиний?

• Бөрө:

“Мин тоҥтон толлубат, ириэнэхтэн иҥнибэт”

Сур Бөрө буолабын

Миигин баһаалыста киллэрин.

          Бары:

Аччыгы аһатар, тоҥмуту ириэрэр буолуохха

Чэ, киир киир!

Музыка тыаһынан кыыллар туран үлэлээн бараллар. Кутуйах хобордооххо ас астыыр, Дьуос уһанар, Тииҥчээн күөрчэх ытыйар, Куобах иистэнэр, Саһыл муоста харбыыр, Бөрө мас хайытар.

Музыканан Эһэ киирэр.

Эһэ:

Уччуу-ычча

 “Барар сирим баҕана үүтэ буолла,

Кэлэр сирим кэлии үүтэ буолла”

Миигин баһаалыста киллэрин!

Кыыллар:

Кутуйах: Оо, улаханын да бэрт!

Дьуос: Баппат буоллаҕын!

Тииҥчээн: Доҕор доҕорун алдьархайга хаалларбат!

Куобах: Доҕорбутун алдьархайга хаалларымыахха!

Саһыл: Улахан дьиэтэ туттуохха!

Бөрө: Бары бииргэ олоруохха!

Музыканан дьиэлэрин киллэрэллэр.

Кэпсээнньит:

Кыыллар бары эйэлээхтик

Үлэлээн-хамсаан, дьиэ туттан

Ньир-бааччы олорбуттар!

Кыыллар бары сиэттиһэн тураллар. Биирдиилээн саҥараллар.

Кутуйах:

Ким үлэлиир, ол аһыыр

Дьуос:

Эйэҕэс киһи элбэх доҕордоох

          Тииҥчээн:

Доҕор доҕорун алдьархайга хаалларбат

Куобах:

Сатаабаты үөрэт, билбэти өйдөт.

Саһыл:

Үлэ киһини киэргэтэр.

Бөрө:

Сүгэ кыайбатаҕын – сүбэ кыайар.

Эһэ:

Норуот күүһэ – көмүөл күүһэ.

Бары:

Күн тыгар халлааҥҥа

Барыбытыгар тэҥҥэ,

Этиспэккэ-охсуспакка

Эйэлээхтик олоруохха!

Бүттэ.