Проект "Күңелең саф булсын"
проект (подготовительная группа)

Мәктәпкә әзерлек төркемендә
“Күңелең саф булсын” исемле  проект

Максат: Балаларда туган якка, туган телебезгә мәхәббәт, ислам дине йолалары  аша әдәп- әхлак сыйфатлары тәрбияләү.

Бурычлар:

1. Балаларны туган  тел, туган ил һәм туган авыл тарихы белән таныштыру.

2. Татар халкының тормыш-көнкүрешендәге үзенчәлекләре, мөселман бәйрәмнәре, матур йолалары белән таныштыру.

3. Татар халкының тарихына, үткәненә кызыксыну, горурлык хисе уяту, патриотик хисләр  тәрбияләү.

Аңлатма язуы

Балачак чоры – ул кабатланмас, тылсымлы чор. Менә шушы тылсымлы чорда безнең киләчәгебезне дәвам итүчеләр – нәни шәхесләр тәрбияләнә, тернәкләнә. Шушы шытып чыккан  “яшь үсентеләр”  -  шәхесләр өчен җылы кояш, игелекле туфрак кирәк. Нәни өчен ул, мөгаен, халкыбызның гасырлардан килгән зирәк акылы, моңлы күңеле, җор теле тудырган иҗат җәүһәрләре, йолалары, җырлары, гореф-гадәтләредер.

     Без, тәрбиячеләрнең бурычлары: халык йолаларына, традицияләренә, иҗатына, гореф- гадәтләренә, сәнгатенә таянып балаларда туган телгә хөрмәт, халкыбызга карата гүзәл әхлакый сыйфатлар тәрбияләү, милли фольклор әсәрләре аша, балаларның дөрес әдәби телдә сөйләшүләренә ирешү. Балаларыбызда  халкыбызга хас милли үзенчәлекләрне:  кунакчыллык, сабырлык, шаянлык тәрбияләү.

    Гореф-гадәт, йолалар  тормышны бер тәртипкә салу, аның аеруча мөһим булган бер вакыйгаларын мәгънәле, төпле, дөрес итеп кичерү, һәр нәрсәнең урынлы булуын аңлата. Кешегә шатлыклы һәм кайгылы мизгелләрдә югалып калмаска өйрәтә, ярдәм итә.

    Гасырлар аша буыннан буынга килгән бу кануннарның тирән тамырлары динебезгә барып тоташа, шулай ук иманның, әдәп-әхлакның чишмә башы да ислам дине йолаларына барып тоташа . Инде үзгәреш җилләре исә башлагач, күп кенә йолалар, гореф-гадәтләр яңадан чәчәк ата башладылар.

   Шәхес үсешендә һәм формалашуында әхлак тәрбиясенең никадәр мөһим булуы педагогикада борынгы заманнардан ук танылган. Атаклы чех педагогы Ян Коменский “Гадәтләр кулланмасы” дигән хезмәтендә борынгы рим философы Сенеканың түбәндәге фикерен китерә: “Иң башта яхшы гадәтләргә өйрән, аннары зирәклеккә, беренчесеннән башка икенчесен өйрәнү авыр”. Атаклы швейцар педагогы Песталоцци,  “әхлак тәрбиясе балалар учреждениләренең төп бурычы булырга тиеш”,- дип саный. Аның фикеренчә, бары әхлакый тәрбия генә яхшы холык, яшәү авыр чагында кешеләргә ныклылык һәм шәфкатьле мөнәсәбәт формалаштыра...
       Ә халкыбызның атаклы улы Ризаэтдин Фәхретдин: “Бала чакта алынган тәрбияне соңыннан бөтен дөнья халкы да үзгәртә алмас”,- дип язып калдыра.

   Бөек педагогларыбызның хезмәтләренә таянып мин зурлар төркеме балалары белән эшләү өчен “Күңелең саф булсын” исемле эш программасы төзедем. Ул 3 этаптан тора:

• 1 этап- әзерлек
• 2 этап- төп өлеш
• 3этап- йомгаклау, нәтиҗә чыгару

Программа  хәзерлек төркеме (6-7 яшь) балалары өчен төзелде.

Программаны тормышка ашыру вакыты: октябрь – май.

Шөгыльләрне үткәрү вакыты һәм формалары: айга ике тапкыр үткәрелә.

Шөгыльләр балаларның сөйләм телен, фикерләү сәләтен үстерүгә һәм әдәп-әхлак сыйфатлары тәрбияләүгә юнәлдерелгән. Ул үз эченә түбәндәге эш төрләрен ала:

• матур әдәбият әсәрләре белән танышу;
• әңгәмә, очрашулар, экскурсияләр үткәрү;
• күзаллау буенча рәсем ясау;
• рәсемнәр карау;
• әти-әниләр белән эш;
• мәктәп һәм мәчет коллективлары белән элемтә

Көтелгән нәтиҗәләр:

• балада туган якка, туган телгә карата мәхәббәт хисләре арта;
• бала үз гамәлләре турында уйлана;
• өлкәннәр һәм яшьтәшләре белән җиңел аралаша;
• тырышлык һәм гаделлек сыйфатлары тәрбияләнә;
• Ислам дине турында мәгълүмат ала.

Программаны тормышка ашыруның йомгаклау чаралары:

Әдәби кичәләр, әти-әниләр өчен эшлекле уеннар әзерләү, конкурслар, викториналар.

Программаны методик яктан тулыландыру:

Күрсәтмә материал (рәсем, картина, иллюстрацияләр)

Конспектлар

Дидактик һәм үстерешле уеннар

Шигырь җыентыклары, методик әсбаплар, интернет материаллары

Интерактив чаралар

“Күңелең саф булсын”  эш программасының

эчтәлеге һәм тематик планы

Кулланылган әдәбият:

Закирова К. В. Балачак аланы: Балалар бакчасы  тәрбиячеләре һәм  әти-әниләр  өчен хрестоматия. – Казан: “Идел-Пресс” нәшрият комплексы, 2011.

Юсупов Ф. Ю. “Гөлбакча” : Балалар бакчасында эшләүче тәрбиячеләр өчен  кулланма. – Казан: Тат. Кит. Нәшр., 1990.

Юсупов Ф. Ю. “Балалар бакчасы”: Әти- әниләр һәм балалар бакчасы тәрбиячеләре өчен уку китабы. –Казан: “Раннур”, 2003

Закирова  К. В . “ Көч һәм рух тамырлары” : Әдәплелек дәресләре. – Казан: Мәгариф, 2000.

Закирова  К. В. “ Балалар бакчасында әдәп-әхлак тәрбиясе” : Методик кулланма . – Казан: Беренче  полиграфия компаниясе, 2013.

Ягъфәров Р. Ф. “Балалар фольклоры”- Казан:  “Мәгариф”, 2000.