Минем юлым, минем сукмагым.
статья

Минем юлым, минем сукмагым.....

Мин Казан шәһәре Идел буе районында 90 нчы номерлы катнаш төрдәге татар телендә белем һәм тәрбия бирүче балалар бакчасында татар теле тәрбиячесе булып эшлим. Безнең бакчабызның исеме дә бик матур – “Гөлбакча”. “Гөлбакча” бызда барлыгы  9  тәрбияче һәм 5 белгеч балаларга белем һәм тәрбия бирә.  Бездә барлыгы 6 төркем, шуның 2се  - татар төркеме. Бакчабыз ачылганга быел 5 яшь тула.

      Мин рус балаларын татар теленә өйрәтәм, татар балаларына ана телендә шөгыльләр үткәрәм. Шөгыльләрдә без уйныйбыз, җырлыйбыз, шигырьләр өйрәнәбез. Татар шагыйрләре, язучылары турында беренчел мәгълүмат алабыз, аларның әсәрләре белән танышабыз. Укылган әсәрләр , каралган мультфильмнар буенча рәсемнәр ясыйбыз. Үзем язган шигырьләрне дә балаларга укыйм, аларның фикерен ишетәм, киләчәктә язар өчен илһам алам. Үз эшемдә дидактик, сүзле, хәрәкәтле, сюжетлы-рольле,  интерактив тактада уеннар кулланам. Балаларга уйнаган вакытта белем һәм тәрбия бирелә. Уен балаларның төп шөгыле булып тора. Бакчабызда  татар телендә бик күп чаралар, бәйрәмнәр узып тора: “Карга боткасы”, “Сабантуй”, шагыйрьләребез туган көненә  багышланган кичәләр, “Аулак өй”, шагыйрьләр белән очрашулар, шигырь конкурслары. Ел саен татар балалары  татарча театраль тамаша әзерлибез.Бу безнең бакчабызның күркәм  традициясенә  әйләнеп бара.  Балалар белән төрле конкурсларда катнашып торабыз. “Шаян  ТВ” каналында безнең бакча балалары да  чыгыш ясадылар.

          Балалар белән эшләү авыр да, шул ук вакытта кызыклы да. Хәзерге заман педагогы  ул – тәрбияче дә, табиб та, артист та, балаларның якын дусты да. Тәрбияче булып эшләү өчен психология, физиология өлкәсендә дә белемле булу шарт. Тәрбиячеләр даими рәвештә белемнәрен камилләштереп төрле курсларда  укыйлар, һәрвакыт яңалыкка омтылалар.

           Хәзерге заманда уңышлы кеше булу өчен белемле булу төп шарт булып тора. Ә белемнең  нигезе балалар бакчасында салына.  Әгәр нигез ныклы, ышанычлы   икән, димәк, балаларның киләчәге дә өметле һәм бәхетле булыр. Без, тәрбиячеләр, моның өчен бөтен көчебезне, белемебезне, тәҗрибәбезне кулланып эшлибез.

         Үзем язган шигырьне дә тәкъдим итәсем килә. Ул ел фасыллары турында.  Табигатьтә  - алтын көз. Сихри матурлык күңелдә шигъри  юллар тууыга этәргеч ясый...

Алтын көз

Көз кигән сары күлмәк,

Кызыл балан бакча бизәге

Кырау төште иртәләрен

Сулды бакча гөлләре.

Бакчада уңыш җыелды

Җиргә алма коелды.

Күп яшелчәләр үстердек

Быел уңыш мул булды.

Җырчы кошлар саубуллашып.

Еракка очып китте

Яңгырларына уралып

Алтын көз килеп җитте.