Проект для дошкольников "Рәсәй - зур дәүләт".
проект (подготовительная группа) на тему

“Рәсәй – зур дәүләт”.

(мәктәпкә әзерлек төркеме)

1. Төре:  танып – белү.

2. Дәвамлылыгы: 1 ай.

3. Максат: Рәсәй, Татарстан Республикасы турында белемнәрен киңәйтү.

4. Бурычлар:

• Туган илебезгә карата хөрмәт, горурлык, ярату хисләре  тәрбияләү.
• Дәүләт телләре – татар һәм рус телләренә карата ихтирам тәрбияләү.
• Телләр турында балаларның белемнәрен киңәйтү.

Проектны гамәлгә ашыру этаплары:

I этап - әзерлек этабы:

- эшчәнлекне планлаштыру  (проектның темасын уйлау, максатын, бурычларын билгеләү, эшчәнлек өчен шартлар тудыру);

- перспектив, эш планнары төзү;

- төркем җыелышларында проектның максаты, бурычлары белән таныштыру;

- әти – әниләр белән  проект турында киңәшләшү;

- интернет челтәреннән, китаплардан проектка кирәкле материаллар эзләү, туплау.

II этап - төп этап:

Балалар белән эш:

- материал туплау;

- әңгәмәләр;

- шигырь – җырлар өйрәнү;

- шигырь конкурсы үткәрү;

- җырлы – биюле, хәрәкәтле уеннар уйнау;

- мәкальләр өйрәнү;

- рәсем конкурсы;

- фоторәсемнәр туплау, альбом төзү;

- герб, гимн, тугра белән танышу, аңлату эшләре.

- презентация карау;

Әти – әниләр белән эш:

- материал, рәсем, фотолар туплауда булышу;

- экскурсияләрдә булышлык;

- анкета үткәрү;

- “Туган илем – гөлләр иле”,  “Мәскәү шәһәре – безнең башкалабыз” дигән темаларга рәсемнәр конкурсы үткәрү;

- “Татарстан сиволикасы”, “Рәсәй символикасы” дигән темаларга әңгәмәләр үткәрү;

- “Ачык ишекләр көне”ндә катнашу;

- үстерешле уен үткәрү;

- әдәби кичәдә катнашу.

III этап -  йомгаклау этабы:

- күргәзмәләргә, алган белемнәргә нәтиҗә ясау;

- үстерешле диалог үткәрү.

Проект эшчәнлегенең перспектив – тематик планы.

Көтелгән нәтиҗә: Балалар белән проектны үтәү барышында эзлекле эш алып барылды. Балаларның танып – белү, кызыксынуы, белемнәре тагын да артты. Безнең туган илебез, аның символикасы турында  алган мәгүлүматлары системалаштырып ныгытылды.

“Теле барның – иле бар”.

(үстерешле диалог)

Максат:

- Туган илебезгә, телебезгә карата горурлык хисләре тәрбияләү.

- Бәйләнешле сөйләм телен үстерү.

- Балаларның алган белемнәрен логик кысага салып системалау.

Җиһазлау: фоторәсемнәр, символикалар, ясалган рәсемнәр.

Алдан эшләнгән эшләр: проект барышындагы эшчәнлек.

Эшчәнлек барышы:

       -   Балалар, мин бүген хат таптым. Компьютердан безнең бакча адресына чит илдән электрон хат килгән. Әйдәгез, укып китик әле. (Компьютердан хатны күрсәтү, тәрбияче кычкырып укый).  “Исәнмесез, балалар!  Без Төркиядә яшибез, балалар бакчасына йөрибез. Сезнең илегез белән якыннан бик тә танышасыбыз килә, сезнең телегез турында беләсе килә. Зинһар, булышыгыз әле”.

     - Балалар, булышабызмы чит илдә яшәүче балаларга?

     (Балаларның җаваплары)

Шигырь уку -  Ф.Яруллин “Анам теле.”

Татар теле –анам теле,

Иң беренче бабам теле.

Буыннардан –буыннарга

Күчеп килгән заман теле.

Анам теле-телләр теле,

Милләтемнең бердәнбере.

Син булганга без дә исән,

Син булганга без дә тере.

Балаларга сораулар:

- “Туган тел” дип нинди телне атыйлар?

- Безгә рус телен белү ни өчен кирәк?

- Татарстан нинди җирдә урнашкан? (Рәсәйнең матур җирендә...)

- Аның башкаласы нинди шәһәр?

- Рәсәйнең башкаласы нинди шәһәр?

- Татар теле турында нәрсә әйтергә була? (бабаларыбыз сөйләшкән  борынгы тел.)

-Татар телен тагын ничек әйтергә була? (туган тел, ана теле.)

-Ни өчен туган телне ана теле диләр?

- Ана балаларына иң татлы нәрсәне бүләк итә?

- Туган телебез нинди? (матур, бай, моңлы – җырлы...)

Уен: “Мәскәүгә сәяхәт.”( Уен слайдлар, рәсемнәр  карап оештырыла. Танылган урыннарны  карау, кыскача информация бирү: Кремльдә президентыбыз эшли, анда соборлар бар, Кызыл мәйданда зур бәйрәмнәр, җиңү парады үтә, мәңгелек ут яна һ. б.)

Россия символикасын искә төшерү.

- Әләм һәм туграны кайда очратырга мөмкин?

- Анда нинди төсләрне күрергә була?

- Бу төсләр нәрсә аңлата?

- Тугра формасы буенча нәрсәне хәтерләтә?

- Анда нинди кош сүрәтләнгән?

- Ни өчен аның башы икәү?(Ул зур илебезне саклый,  уяу тора.)

Үстерелешле уеннар: “Дөрес итеп тез!”( Төсле тасмалардан Татарстан һәм Россия  әләмен төзү.) “Туграны җый”.  (Аерым рәсемнәрне бер- берсенә куеп Татарстан һәм Россия туграсын җыю.)

Мәкаль, әйтемнәр әйтү:

- Теле татлының – дусты күп.

- Туган телен кадерләгән халык кадерле булыр.

- Туган телем – иркә гөлем. Киңдер сиңа күңел түрем.

- Иң татлы тел – туган тел, анам сөйләп торган тел.

Тел турында шигырь сөйләү:  (Шәйхи Маннур “Яхшы бел!”)

Русча да яхшы бел.

Икесе дә- безнең өчен,

Иң кирәкле затлы тел.

Татарчасы- туган тел

Безгә газиз булган тел.

Атаң- анаң, әби- бабаң

Сине сөя торган тел.

Тел кешене дус итә

Бер- берсенә беркетә.

Бел, балам, син рус телен

Һәм онытма үз телең.

Җыр җырлау:  Г. Тукай. “Туган тел”.

   - Балалар, булдырдыгыз. Безнең туган илебез, туган телебез, илебез символикасы турында бик матур, төгәл җаваплар бирдегез. Чит ил кунакларыбыз безнең илебез турында җитәрлек дәрәҗәдә мәгълүмәт алгандыр дип уйлыйм. Зур рәхмәт барыгызга да.