Конкурс чтецов Г.Ходырев
методическая разработка (подготовительная группа) на тему

Герман Ходыревлы – 85 арес.

2017 ар – Экологилэн арез. Герман Ходыревлэн кылбуръёсыз инкуазен юн герзаськемын. Инкуазьлэсь чеберлыксэ шодыса, адзыса нылпиослы кылбуръёсыз гожъямын. Зучомем нылпиослы но лякытэн сетиське кылбуръёссэ дышетыны. Кылбуръёсыз пыр нылпиослы тодон-валан сётиськом: инкуазез саптатэк, чылкыт возьыны; пудо-животъёсты утьыны. Кылбуръёсыз пыр нылпиослы валан сётиськом: скалъёс, ыжъёс, кечьёс бусыысь котсэс тырыса берто гуртазы. Бусыын сиськыса бертись пудо-животъёс чус коло гидъёсазы пырыса. Туж умой юрттэт сёто сюжетной суредъёс книгаысь «Чужон быж, вень бугор но мукетъёсыз».

Кылсярысь, «Чипыос» кылбурез. Нылпиос кылбурысь действиоссэ возьматъяса жог сое дышето. Физкультминуткаосы но, чиньыен шудонъёслы но пормытыны луэ.

Кылбур лыдзисьёслэн конкурссы. Экологилэн арез.

 «Вордиськем шаерелы синмаськыса»

Азьмугез: нылпиослэсь удмурт кылын кылбур вольыт лыдзыны быгатэмзэс эскероно. 

Ужпумъёс:

Дышетись: нылпиослэсь удмурт кылын кылбур вольыт лыдзыны быгатэмзэс юнматоно;

волскымтэ предложениосты вераны быгатэмзэс юнматоно;

пиналъёслэсь гурт пудо-животъёс сярысь валанзэс муромытоно;

вераськон кылзэс узырмытоно.

Азинтись: саклыксэс, визьсазьзэс но визьрадзэс юнматоно; кылбурез вольыт лыдзыны быгатэмзэс азьланьтоно.

Визьнодась: чеберлыко удмурт литератураен тунсыкъяськон мылкыд пычатоно; котькыче ужез гажан мылкыд пычатоно.

Азьвыл нуэм уж: Г. Ходыревлэсь «Машилэн азбараз» книгаысьтыз кылбуръёс лыдземын, портэм шудонъёсын тодматэмын, «Вуюись» книгаысь Г. Ходыревлэсь кылбуръёссэ лыдземын, нылпиос асьсэос быръизы кылбур кудзэ дышетозы анай-атаенызы, «Лэйкась гуръёс» книгаын кылбуръёсызъя крезьгуръёс (музыка) гожтэмын. «Вуюись, вуюись», «Чебеляй» Г. Ходыревлэн книгаосыз. Г. Ходыревлэн куд-ог кылбуръёсыз пыремын «Чужон быж, вень бугор но мукетъёсыз», «Зарни дэремен шунды», «Покчи эше» книгаосы.

Уже кутэм арбериос: Г. Ходыревлэн фотографиез, книгаосыз: «Машилэн азбараз», «Чебеляй», «Вуюись, вуюись», дидактической шудон «Кырзась азбар» («Поющий двор»), баян, шудон-карта Алнашысен Ярозь Удмуртии, суредъёс гурт пудо-животъёсын, «Лэйкась гуръёс», «Вуюись», «Зарни дэремен шунды», «Чужон быж, вень бугор но мукетъёсыз», «Покчи эше» книга.

Ужрадлэн мынэмез:

Визьнодась (В.): Зечбуресь, пиналъёс. Нош ик кутскиз вылез дышетскон ар. Ти ваньды бадзымесь будиды. Азьпалан нош ик возьмало трос тодон-валанъёс. Ортчем арын асьмеос кылбур лыдзон конкурс (конкурс чтецов) зуч кылын ортчытъям. Нош али асьмеос кылбур лыдзон конркурс (конкурс чтецов) удмурт кылын ортчытом. Та конкурсмы Герман Алексеевич Ходыревлы сиземын, 85 ар тырмеменыз. Вордскиз со Алнаш гуртын Удмурт АССРын дышетись семьяын, 23 коньывуонэ 1932 аре. (Коньывуон - октябрь) Герман Алексеевич Ходырев трос кылбур гожъяз нылпиослы, соин со нылпи писатель. Солэн таче книгаосыз потэмын: «Машилэн азбараз», «Чебеляй», «Вуюись, вуюись». Герман Ходырев проза, веросъёс (рассказы) гожъяз. Кылбуръёсызъя крезьгуръёс гожтэмын но кырзанъёс кылдытэмын. Одигзэ кырзанзэ асьмеос но тодиськом «Праздникез анаймылэн». Кырзанъёсыз пыремын «Лэйкась гуръёс», «Вуюись» сборникъёсы.

Нош конкурсмес ортчытом солэн гожтэм «Машилэн азбараз» («Во дворе у Маши») книгаезъя. Эшшо тодамы ваём на кин сярысь вераське та книгаяз.

Туннэ та конкурсамы жюримы но вань. Соос туж сак кылзозы но быръёзы чебер, вольы лыдзыны быгатись нылпиосты. Озьыен кутском.

В: Атас. Г. Ходырев 

Чебереныз йонъяське,

Чоръяменыз ушъяське.

Колыны уг сёт чукна –

Кин луоз атас сяна! (Пуктиськом суред-атас)

1 пинал: Чипыос. Г. Ходырев

Пуж-пуж

Курег бурд улэ

Чипыосмы ватскиллям.

- Матамы

Ти эн ветлэ,

Анаймы ведь

Лек милям! (Пуктиськом суред-чипыос)

2 пинал: Ыж. Г. Ходырев.

- Ме-э-э! – боксэ ыжмы,

Ыж гонэ, пе,

Чышкемын.

- Гужем куазен

Шат кынмод?

Сизьылозь

 Гоно луод! (Пуктиськом суред-ыжлэсь)

3 пинал: Эмъясь Маша. Г. Ходырев.

1.Машалы маза овол,

Уж сюриз уга:

Мунёез висе, уг кол, Со возын берга.

2.Бурмытон понна сое

Шобыръя нылаш:

- Чаляк йона, мусое,

Нуные, Наташ!

3.Мон тани таблеткаос

Тырисько азяд.

Ю но, мед жоггес ортчоз

Висенэд тынад.

4.Жытазе горд эмезен

Чай тыныд удо…

Бурмыса тон чуказе

Монэн чош шудод! (Пуктиськом суред-мунё)

Шудон «Кырзась азбар» (Шедьтэ пизэ но вералэ. Шудон карточкаос тыремын жок вылэ. Одигаз жок вылын мойы пудо-животъёс, мукетаз пиоссы. Пиналъёс люкисько кык командалы. Котькуд суредлы парзэ шедьто, верано, валэктон сётоно). (Кылсярысь: Мынам ыж. Ыжлэн пиез ыжпи.)

Азьланьтиськом конкурсмес.

4 пинал: Колоша. Г.Ходырев.

Пыдаз бадзым колоша

Кутчам милям Олеша.

- Ыжъёсмы, лэся, берто,

Ури-бери мон пырто!

Бызьыса Олеш мыниз.

Дэриен гылдиз, усиз –

Таш-таш наштаз ымнырзэ,

Дэремзэ но штанизэ.

Кис-куань! Бордэ Олеша…

Ух! Со бадзым колоша! (Пуктиськом суред-колоша)

5 пинал: Зазегпи Г. Ходырев.

Огпол чукна

Коргидэ –

Учкись, лэся,

Луымтэ –

Огназ кылем

Зазегпи;

- Кытын-о ти,

Пи-пи-пи! (Пуктиськом суред-зазегпи)

6 пинал: Кечтака. Г. Ходырев.

Баблес тушо,

Кузь сюро, -

Сюръёсыныд мар карод?

- Исады ке,

Возьмато –

Кымысады

Сюр пукто! (Пуктиськом суред-кечтака)

7 пинал: Йол. Г. Ходырев.

1.Возь вылысь кучо скалмы

Жытазе бертиз.

Мон сое азбарамы

Вешаса пырти.

2.Шуныт йол кыскиз нэнэ,

Собере сисъяз,

Милемлы чабей нянен

Сиыны сётъяз.

3.Скалмылы ву люктаны

Ведраен потим.

Ми солы шутэтскыны

Кос куро волдим.

4.Тон жадид туннэ, скалмы,

Ойдо, выд но кол.

Чуказе тон милемлы

Нош ик вутты йол. (Пуктиськом суред-скал)

8 пинал: Скал. Г. Ходырев.

Тодьыен-кучо скалмы

Лёгаське азбарамы.

Мынысал, пе, возь вылэ –

Эх, пастух кема колэ!

В: Скалъёслы но, кечьёслы но луд вылэ потыкузы ошыло гырлы. Малы меда, кин тодэ? (Медам ыше шуыса). Асьмеос тодиськом скалъёс но, кечьёс но ческыт вож турын сиыны ярато. Вож турын сиизы ке ческыт йол ваёзы. Соин ик али шудыны отисько тиледыз.

Шудон «Гырлы». (Шудисьёс котыртэме (круге) султо. Лыдъяськыса кык нуисьёсты брыъё. Нуисьёслэсь синъёссэс кертто, одигезлы кияз чингыли сёто. Мукетыз нуись чингыли куарая сое кутыны кулэ, нош таиз уг сётскы, пега. Нылпиос кутиськыса сыло, нош чингыли возисез котыртэм сьоры потыны уг лэзё. Кутэмзы бере шудон выльысь азьланьтиське.)

В: Зечесь. Нош ик азьланьтиськом конкурсмес.

9 пинал: Кочыш. Г. Ходырев.

Куазь зорыку,

Азбарын

Кочышмы

Сучыр котмиз.

Пук вал, кочыш,

Гур вылын,

Потаны нош

Кин косиз? (Пуктиськом суред-кочыш)

10 пинал: Кучапиос. Г. Ходырев.

Уг луы на

Быземзы,

Канжасько,

Усе…

Пичи тир ныд

Вылазы –

Мольк! Гинэ

Пуксё! (Пуктиськом суред-кучапиос)

11 пинал: Чожпиос. Г. Ходырев.

Оло ыжъёс,

Оло скал

Тусьысь вуэз

Быдтиллям,

Пичиесь чожпиослы

Кельтыны

Вунэтиллям.

Черекъяло чожпиос:

- Ух, со пудоос! (Пуктиськом суред-чожпиос)

12 пинал: Парсьпиос. Г. Ходырев.

Ваньмыз ик –

Миськем сяртчы.

Чупресэсь

Соос ортчыт.

Сюпсьыса

Али ноно,

Будыны, пе,

Дыртоно! (Пуктиськом суред-парсьпиос)

Шудон «Кин кызьы котсэ тыре?» (Адземды вань-а кызьы гурт пудо-животъёс сисько? Туж тунсыко. Одигъёсыз нюлиськыса, мукетъёсыз кокчаса. Ти азьын сётэм кылъёс но суредъёс полысь тупасьёссэ быръём. (Сыске, куша-жуёт, кокча-клюёт, нюлэ-лижет, пьёт. Суредъёс: скал, ыж, курег, кочыш, пуны. )

В: Ваньды зечесь. Тау шуэме потэ ваньдылы. Та конкурсмес кутскон азямы верай вал, асьмеос Герман Алексеевич Ходыревлэн кылбурезъя кырзан тодиськом. Ойдолэ, кырзалом озьы анайёсмылы тау шуыны быгатиськом. Ваньмыз понна. Нош со куспын жюримы быръёз чебер, вольы лыдзыны быгатись нылпиосты.

Эшшо тодамы ваем на кин сярысь вераське та книгаяз. (Гурт пудо-животъёс но тылобурдоос сярысь.).

Ти анай-атайёстылы пудо-животъёсты сьоры утялтыны юрттиськоды-а? (Юрттиськом.)

В: Кыл сётиськом жюрилы. Тау.

Литература

1. Лопатина Н.С. Азьлань, тодон-валан люканы! = Вперёд, к познанию тайн!: Занимательный материал. – Ижевск: 2005.
2. Светлакова С.В. Чингыли // Вордскем кыл. – 2016, № 11-12. – 6-7 б.
3. Ходырев Г.А. Машилэн азбараз. – Ижевск: Удмуртия, 2012.
4. Вуюись. Покчи нылпиослы хрестоматия. – Устинов: Удмуртия, 1985.
5. Шудон нылпиослы «Кырзась азбар».