"Көзге табигать"
план-конспект занятия по рисованию (старшая группа) на тему

Казан шәһәре Мәскәү районының “Татар телендә тәрбия һәм белем бирүче

372 нче номерлы катнаш төрдәге балалар бакчасы” муниципаль

автономияле мәктәпкәчә белем бирү учреждениясе

Тема: «Көзге табигать »

(Зурлар төркемендә үткәрелгән интеграль шөгыль)

                                                                              Төркем тәрбиячесе: Шафигуллина Л. Р.

Казан, 2015

Максат: Табигатьнең сезонлы үзгәрешләре белән таныштыруны дәвам итү.

Бурычлар: 1. Көзге табигатьнең матурлыгына соклана белү сыйфатларын тәрбияләү

2. Балаларның иҗади күзаллауларын, бәйләнешле фикерләү сәләтен үстерү.      3. Традицион булмаган метод белән рәсем ясарга өйрәтү.

Җиһазлау: Кыргый хайваннар турында табышмаклар, кыргый хайван рәсемнәре, ак кәгазь бите, көзге яфраклар, гуашь, пумала.

Эшчәнлек барышы:

Тәрбияче: - Балалар, хәзер табигатьтә нинди ел фасылы?

- Көз айларын санап чыгыгыз.

- Ә хәзер көз билгеләре турында сөйләшик. Көз нинди ел фасылы соң?

Көз көне нинди үзгәрешләр күзәтелә? Җавалар:

• Яңгырлар ява.
• Көннәр салкыная, салкын җилләр исә.
• Агач яфраклары сары төскә керә.
• Кошлар җылы якларга очып китәләр.
• Кешеләр җылы киемнәргә күчәләр.

Тәрбияче: - Ә хайваннар тормышында нинди үзгәрешләр күзәтелә? Җаваплар:

• Хайваннар кышкы йокыга әзерләнәләр, кышка азык әзерлиләр.

Тәрбияче:  - Ә хәзер мин сезгә хайваннар турында табышмаклар әйтәм, сез уйлап җавап бирегез.

                                 Табышмаклар әйтешү

( балалар табышмакка дөрес җавап әйткәч, тактага шул хайван рәсемен элеп куялар)

1. Ул өстенә җәй дә кыш та

  Энәле күлмәк кия.

  Шулай да аны әнкәсе

“Йомшагым” диеп сөя.

                                          (Керпе)

2. Кош түгел оча,

Ябалактан курка,

Чикләвекләр ярата,

Сызгырса, урманны яңгырата.

                                                      (Тиен)

3. Алгы тәпие кыска,

Чабарга ул бик оста.

Соры тунын сала да,

Ак тунын кия кышка.      

                                        (Куян)

4. Көлтә - көлтә койрыгым,

Селки – селки барамын.

Кетәкләргә кереп мин

Тавык – чебеш аламын.

                                             (Төлке)

5. Сорыдыр төсе,

Үткендер төше,

Урманда йөри

Ашарга эзли.

                             (Бүре)

Тәрбияче: - Керпе, тиен, куян, төлке, бүре – алар нинди хайваннар?

- Алар кайда яшиләр?

                                     Физкультминутка

- Балалар, хәзер без кыргый хайваннар өчен урман ясарбыз. Безгә урманны сурәтләргә көзге яфраклар ярдәм итәчәк. Көзге яфракларны гуашь белән буяп, кәгазьгә төшәрәбез. Икенче яфракны төшергәндә яңа яфрак алабыз. (Тәрбияче үрнәк рәсем күрсәтә) .

- Балалар, көзен яфраклар нинди төскә керәләр? (Сары, кызыл, кызылсары)

- Без дә урманны ясаганда  сары, кызыл, кызылсары төсләрдән файдаланырбыз.

                                              Рәсем ясау

(Балалар әзер рәсемнәрне тактага элеп куялар, карап сокланалар)

Тәрбияче: - Күрегез, балалар, нинди матур көзге урман!

 Йомгаклау.