Эссе-минем педагогик күзаллау
статья по теме

Эссе  -  минем  педагогик  күзаллау.

Мин үземнең гомеремне балалар тәрбияүләүгә, аларга белем бирүгә багышладым. Хәзерге вакытта Актанышта балалар бакчасында эшлим.

Чыгышым белән мин Әлмәт районы Сөләй авылы кызы. Элек- электән шулай килгән бит: һәр ата- ана үзбаласын укымышлы итеп күрергә тели, аңа бәхетле киләчәк юрый. Минем укытучы һөнәрен сайлавыма әти- әнием  сөенеп туялмады. Бөгелмә педагогия училищесында уку еллары сизелми дә үтеп китте. Ниһаять мин укытучы булдым.

Актанышта балалар бакчасына эшкә урнаштым. Инде 21 ел үтеп киткән. Ләкин бер уй тынгылык бирми миңа. Югары белем алу кирәклеге турында уйлана башладым. Һәм 2002 елны читтән торып Чаллы дәүләт педагогия институтына укырга кердем. Аны уңышлы гына тәмамлап диплом да алдым. Хәзергесе вакытта балаларга физик тәрбия бирәм . Эшемне яратып башкарам. Балаларның сәламәтлеген саклау, ныгыту турында кайгырту –минем төп бурычым. Сәламәт бала – ул психикасы да, физик үсеше дә камил булган зат. Һәр көнне иртәнге гимнастикада һәм махсус шөгыльләрдә бу бурычларны тормышка ашырам. Көндәлек эшчәнлектә балаларның гәүдәне дөрес тотуларына, дөрес, ритмлы, җиңел йөрү һәм йөгерү күнекмәләре формалаштыру өстендә эшлим, ә иң мөһиме сәламәт булырга өйрәтәм. Чөнки “Сәламәт тәндә – сәламәт акыл”, диләр бит. Бу эш бер дә җиңел түгел. Сәламәт яшәү рәвешенә өйрәтүнең  бер китапта да әзер формуласы юк. Шулай да балаларга аңларлык итеп сәламәт яшәү рәвешенә кызыксыну уяту өстендә эшлим.

Минем педагогик эшемнең икенче максаты: физик тәрбиягә кызыксыну  тәрбияләү, балаларны сәламәт яшәү рәвешенә өйрәтү. Үземнең бар белгәнемне балаларга бирергә тырышам.  Аларның сәламәтлекләре өчен үземне җаваплы тоям. Үземнең эшчәнлектә балаларны үзләренең йомшак якларын җиңәргә, тырыш һәм тәртипле булырга өйрәтәм. Көн саен  балалар белән очрашам. Алар нинди төрлеләр! Аларның күзләрендә кызыксыну да бар, ышаныч та, сагаю да, ә кемнеңдер күзендә әлегә битарафлык.  Аларның һәрберсенең үз дөньясы, үз ихтыяҗлары. Кайчакта аларның ихтыяҗлары белән,  минем теләкләр туры да килми. Менә шул чакта каршылыклар килеп чыкмасын өчен һәр баланы аңларга тырышам, аңа шәхес кебек карыйм. Һәм гомумән балаларга бәхетле, акыллы, тәртипле һәм сәламәт булулурын телим. Менә минем педагогик күзаллау шушылардан тора.

/Садртдинова Ф.И./