"Як шукалi ўлетку папараць-кветку" Сцэнарый музычнай забавы у старшай групе
учебно-методический материал (старшая группа)

Як шукалi улетку папараць-кветку

Сцэнарый музычнай забавы з элементам фальклору

Несцерка.

Збірайся, дзетвара!

Пачынаецца гульня —

Будзем свята святкаваць

I Купалле сустракаць!

Ну-ка, музыка, грай і гасцей заклікай!

Песня «Сёння свята»

(у выкананні ансамбля «Сябры»).

Несцерка. Мы вельмі рады бачыць вас і ўсіх вітаем у гэты час! Хай ярка свеціць сонца вам, мы сёння рады ўсім гасцям!

Карагод «Мы на луг хадзілі».

Несцерка. Вельмі многа гадоў таму людзі прыдумалі легенду, што ў ноч на Купалле ў лесе цвіце папараць-кветка і той, хто знойдзе яе, будзе самым шчаслівым. Але хто толькі не шукаў яе, ніхто не знаходзіў.

У гэтую ноч людзі ладзілі гулянне: раскладвалі вогнішчы, вадзілі карагоды, спявалі песні, гадалі з вянкамі. Гэтая традыцыя захавалася і да нашага часу. Праводзіцца свята ў гонар Сонца, кветак і раслінаў, якіх шмат у лесе і на лузе. А якія кветкі вы ведаеце? (Адказы дзяцей.)

1-е дзіця. Каб раслі кветкі ды прыгажэлі дзеткі, трэба дожджык нам паклікаць!

Беларуская народная гульня

«Дожджык i кветачкі».

Несцерка.

На Купала Сонца грала

I на свята запрашала.

Сёння будуць музыкі граць,

Сёння будзем кастры раскладаць,

Песні спяваць, у танцах скакаць

Ды чароўную папараць-кветку шукаць!

Вядучы. А цяпер давайце станем усе ў карагод і заспяваем пра сонейка, каб усім было цёпленька.

Карагод «Свяці, свяці, сонейка».

Несцерка.

Людзі, паглядзіце,

Купала набліжаецца!

Гэта азначае, што свята пачынаецца!

Купалінка.

Я вельмі рада бачыць вас

I ўсіх вітаю ў гэты час.

Хай ярка свеціць сонца вам,

Я сёння рада ўсім гасцям!

2-е дзіця.

Добры дзень, зямліца добрая!

Пачынаецца свята народнае!

Добры дзень, палеткі і хаты!

Добры дзень, хлопцы, дзяўчаты!

3-е дзіця.

Будзем кветкі збіраць,

У вяночкі ўплятаць.

Станем дружна ў карагод —

Заспявае ўвесь народ!

Карагод «Купалінка».

Купалінка. На Купалле распальвалі вогнішча, у якое кідалі галінкі, старыя непатрэбныя рэчы. Але ліхія сілы пільнавалі папараць-кветку і ўсяляк перашкаджалі яе ўбачыць і знайсці. Адгадайце загадку: «,Яе ўсе баяцца трошкі — яна ў лесе мае хатку на курыных ножках і ў ступе лятае?» (Адказы дзяцей.)

З’яўляюцца Баба Яга i Лясун.

Баба Яга.

На Купалле вы сабраліся?

А нас вы спыталіся?

Мы такое Купалле вам зробім,

што ўсіх у цёмны лес загонім!

Лясун.

А мы зараз

будзем спрытнымi і лоўкімi.

Тых, хто пойдзе шукаць кветку,

З Ягой зловiм ўсіх у клетку.

Гульня «Бабка ёжка»

(Баба Яга  i  Лясун ловяць у карагодзе дзяцей. Тыя, каго злавілі, потым танцуюць).

Танец «Юрачка».

Баба Яга. Добра, адпускаю вас!

Купалінка. Ну, дык цяпер ідзіце ў гушчар і не перашкаджайце нам!

Баба Яга. Не, не — так проста мы не пойдзем. Калі вы адгадаеце нашы загадкі — тады пойдзем. А калі не, дык не будзе ў вас свята!

Лясун.

Зробім буру-непралаз, усе карані перавярнем,

Кветку шчасця схаваем і Купалінку забярэм!

Несцерка. Не, не! Мы згодны, загадвайце свае загадкі.

Баба Яга. Праз лясы і лугі спусціліся канцы дугі. (Вясёлка.)

Лясун.

Яно па небе плавае —

іскрыстае, рухавае.

Грэе моцна, свеціць ярка —

усяму свету качагарка.

(Сонца.)

Баба Яга. Гукнеш, дык адгукаецца, ад людзей хаваецца. (Рэха.)

Лясун: На Купалле заўсёды разводзяць вогнішча, праз якое скачуць парамі. Дзеці, пакажыце і вы свой спрыт, паспрабуйце пераскочыць праз вогнішча.

Хлопчыкі з дзяўчынкамі парамі пераадольваюць бутафорскі касцёр.

Баба Яга. Малайцы, усе дужа спрытныя! Цяпер ппглядзiм, як iч спрытныя хлопчыкi. Вось  мяшэчкі з саломай. Трэба стаць на бервяно і мяшэчкам зрушыць з яго Лясуна.

Пад вясёлую музыку ладзіцца гульня з Лясуном «Хто каго?».

Лясун. Добра, перамаглі нас! Пойдзем і не будзем вам перашкаджаць папараць-ветку шукаць.

Купалінка. Ох, слава богу! Вызваліліся ад нячыстай сілы. Людзі казалі, што ў купальскую ноч расцвітае папараць-кветка, а той, хто яе адшукае, будзе самы шчаслівы і зможа разумець размовы жывёл і раслін. Запрашаю вас, дзеці, у падарожжа, шукаць папараць- кветку!

Дзеці пад музыку шукаюць «папараць-кветку».

Купалінка (звяртаецца да таго, хто яе знайшоў).

Хай жа твой лёс будзе шчаслівы!

У хаце хай будзе весела,

I сытна, і мірна, і песенна!

Зараз запрашаю ўсіх пагуляць з папараць- кветкай!

Карагодная гульня «Вядзьмар»:

3 ліку ўдзельнікаў выбіраюць водзячага, ён трымае ляльку — «ведзьмара». Дзеці ладзяць карагод, у сярэдзіне якога стаіць Купалінка, і гавораць:

«Купалінка, Купалінка,

Купалінка наша,

Дай нам золата багата».

Купалінка адказвае:

«Дам вам папараць-кветку,

Будзеце багатыя

На ўвесь белы свет».

Дае аднаму з дзяцей «папараць-кветку», потым кажа:

«Вядзьмар ідзе,

Папараць-кветку адбярэ».

Дзеці ўтвараюць паўмесяц і адводзяць рукі за спіну, нібыта хаваюць «папараць-кветку». Водзячаму трэба адгадаць, у каго знаходзіцца падарунак Купалінкі. Калі здагадаецца, той уцякае і імкнецца аддаць кветку Купалінцы. Калі гэта атрымаецца, дзіця выконвае ролю Купалінкі, калі не — становіцца водзячым. Гульня паўтараецца 2-3 разы.

Купалінка (звяртае ўвагу на вянкі з кветак і траў). Несцерка, паглядзі, якія вянкі сплялі дзяўчынкі.

Несцерка. Вельмі прыгожыя! Давайце патанцуем з імі.

Песня "Вяночкi" сл. i муз. Я. Жабко

Купалiнка: Вяночкi такiя прыгожыя, трэба з iмi пагуляць!

Карагодная гульня «Вяночак»

Дзеці стаяць кругам. У цэнтры яго — Купалінка з вянком у руках, яна адвольна ходзіць і кажа:

«Вось вянок які прыгожы ў мяне,

Вось вянок які цудоўны ў мяне!

(Называе імя дзіцяці) я вяночак падару,

Скокі вясёлыя разам з ім я завяду!»

Купалінка надзявае вянок названаму дзіцяці, ён выходзіць у цэнтр круга і танцуе разам з ёй, астатнія дзеці, прытанцоўваючы, пляскаюць у далоні. Гульня паўтараецца 2—3 разы.

Купалінка. Спакон веку нашы продкі частавалі адзін аднаго стравамі купальскай вячэры.

Са святам Купальскім усіх вас вітаю —

Частую вас боханам-караваем!

(частуе караваем)

4-е дзіця.

Ад шчырае нівы, ад роднай зямліцы

Мы хочам у пояс усім пакланіцца!

Купалінка. Дарагія дзеці! Як добра, што мы сустрэліся з вамі! Дзякуй вам за цудоўнае свята! Бывайце здаровы і ў шчасці жывіце,

А прыйду ў госці — дык добра прыміце!

5-е дзіця. Мы Купалле сустракалі, мы спявалі і гулялі.

6-е дзіця. Госці нас павіншавалі: шчасця, радасці жадалі.

7-е дзіця. Трэба нам цяпер часцей запрашаць такіх гасцей.

8-е дзіця. I заўжды такому святу будзем мы ў садзе рады!

Несцерка: Вось і скончылася Купалле — свята росквіту зямлі, свята народнай творчасці!

Мы праводзілі сонца на другую палову года.

Купалінка.

Хай і ў гэтай палове года

Кветка шчасця будзе ў народа!

Источники: Пралеска 2012, 6

Дубініна, Д.М. Родныя вобразы ў паэтычным слове: дапам. для педагогаў устаноў дашкольнай адукацыі: у 2 ч. Ч. 2 / Д.М. Дубініна. — Мазыр: Белы Вецер, 2008.