Кизоть пингонза
план-конспект урока (2 класс) на тему

        МБОУ «Мамолаевскяй средняй общеобразовательнай школась»

«Кизоть пингонза»

Етафтозе  начальнай классонь учительсь

 Чубаева Т.В.

2014  

Цельхне:

-касфтомс и келептемс тонафнихнень содамошиснон природань картинатнень колга;

- тонафтомс иттнень природатьмельге наблюдениянь вятема, мазышинц няема;

- знакомондамс искусствань виттнень мархта, конат няфнесазь природать мазышинц;

- кемокстамс выразительна лувомань и корхтама маштомань навыкснон.

Оборудованиясь:

Кизонь пинкненди лемтьф мокшэрзянь и рузонь художникнень картинасна (презентация);

 Ф.В.Сычковонь портретоц;                                  

иттнень рисункасна и сочинениясна кизонь пинкнень колга.

Урокть молемац

1. Оргмоментсь.

2.Од материалть лангса работась.

1.Учительть ингольдень валоц.

- Шабат, тячи минь мархтонт тихтяма путешествия природав и васеттяма поэттнень, живописецнень произведенияснон мархта, конат лемтьфть кизоть пингонзонды. Кажнайть тинь ули кельгома пингонте.  Тинь анокладе ся пингть колга стихт, рисовандаде картинкат.

Васедсть весть кизоть ниле пингонза и кармасть споряма, кие эздост сяда лац рисовандай. Ушедсть художникне фкя-фкянь мельге архнемонза модать, наряжакшнемост вирьхнень,паксятнень, лугатнень.

Содасть, кодама пинге мархта васеттяма?

 Апак симнек, апак антт,

Шобдавас тись сери пантт.

- Виде, тя тялось.

Васенцекс сявозе кисточканц тялось. И вов модась вельхтявсь акша ловса, ляйхне эйндасть, матодовсть. Якай тялось панттнень, паксятнень ланга. Якай оцю ляпе валенцяса, шятни валом. Мазы лиссь картинась.

-А тяни, иднят, описандасть монь азксозень ста тов стане, штоба улель няфтьф природать состоянияц тялонда.

(Тонафнихне азыхть тялоть колга.)

-А кодама стихотвореният содатата тялоть колга?

(Тонафнихне лувсазь аноклаф стихотворенияснон тялоть колга).

ДЕКАБРСЬ

Сань и прокс кирьфтайне шитнень —

Сяда пяк аш ков, —

Пелян эрькстафтомдост иттнень,

Мон вдь тялонь ковсь.

ЯНВАРСЬ

Аньцек ушедыне шизень,

Васень шизень, васень кизень,

Теенть наряжань кузнят:

Перьфкаст кштикшнеда, иднят.

Вага кяскавозе вакссон —

Сада, казнет тячи макссян,

Лятфнесть ламоняс январть,

Васень ковонц календарть.

ФЕВРАЛЬСЬ

Сембе лядыкс кофнень коряс

Шалхкозт кяжиста кунцян,

Сяс мес лядыкс кофнень коряс

Якшамс коре виюван.

Ловонь панттнень эса шорян,

Фальхнень маран китнень лангс,

Ловса вальмятненди ёрян —

Эзост петфнян акша панкст.

ТЯЛА

Тялось сась! Тялось сась!

Учи эсонк нурдонясь!

Локса комачаф ульцясь,

Нинге Од кизонь кузнясь!

Аф кунара Якшам атясь

Тага тевонзонды фатясь:

Ляйть лангс клянцень седня тись,

Пиндолды ни ляень кись.

Вирти акша вазь сон казсь,

Шнафты эсонза кузнясь.

Коленди и налхкси пинесь,

Ловти лажатсь марнек велесь.

ТЯЛОСЬ САСЬ

Моли, моли васень ловсь
Прай и мады коза повсь,
Ацай саттнень пирьфнень
Паксятнень и внрьхнень,
Ефси вальмять ала
Пухонь одеяла.
А ляйть ваксса шабатне
Тисть ни ловонь бабаня.

-Иднят, тялоть колга сермадсть аф аньцек поэттне, тялоть мазышинц няфнезь и художникне эсь картинасост. Ванцаськ, кодама картинат рисовандасть синь тялоть колга.

  (Няфтевихть «Тяла», «Тялонь велеса», «Тялонь ки», «Тялонь илядь» Ф.В Сычковонь  картинанза, ).

- А тяни кулхцонттама валмуворкст тялоть колга.

Лама ловда-лама кшида.

-Тялода меле кодама пингсь сай?

Эйхне куцихть фкя-фкянь ланга,

Ляйса веттне шумондайхть.

Тялось аварди и ранги,-

Тя мъзярда эрси, а?… Тунда.

- Но вов сась тундась и ушедсь арьсема, кодама ба картина тейнза рисовандамс. Сон кандсь лямбе шиня, пиже, сянгяря луганя и мазы панчфт. Мархтонза лямбе ширде састь нармоннятне. Эстокиге перьфпяльсь весялгодсь!

   (Кулхцондовихть кафта сочиненият тундать колга).

-Кода сермадсть тундать саманц колга поэттне?

 (Кулхцондови стихт тундать колга).

МАРТСЬ

Кяжцень, тяла, синдень,

Вятине тундать,

Пеняцят, азк, кинди —

Кицень шумордать.

Эйнь оржа сюрот

Повфнень  коза-повсь,

Нюрьгихть, бта урот,

Алост караф ловсь.

АПРЕЛЬСЬ

Шады шадось

Шадозь шады,

Шадось шады —

Пингоц сась.

Сетьме Вадось

Ведти рады,

Вадось рады:

Сась тундась.

МАЙСЬ

Ватта, ватта, тюстон мзяра,

Коста васьфнеть нинге тняра!

Сембе шири тюст видян —

Масторть мазептян-тиян.

Вальмять ала, ляй трваса,

Вирьса, переса, лугаса —

Панчфт, панчфт, аньцек панчфт,

Бта шабань эрек ванфт.

 ТУНДА

Сон сась тя пингсь,

Мзярда кельгихть ломатть

Фкя-фкянь эса.

Мзярда панжихть саттне

И мазы морот

Морайхть цёфксне веса.

И вирське пижелгоды:

Шнафты палянц кальсь,

Мзярда моронц, мазы моронц

Морасы тундась.

САК ТУНДАНЯ

Сак, тунда-тунданя, сак
Вийцень кочкак-виензак,
Явафтк удоманц вирнять
Ацак нарнять-пиженять.

Сак тунда, тунданя, сак
Лямбе варманя уфак
Видек масторть ланга панчфт,
Катк синь нолдайхть медень таньф.

- А тяни, иднят, ванцаськ, кода няфтезь тундать  художникне.

  (Няфтевихть картинатне: Ф.В.Сычков «Тунда», «Мокшесь лиссь беряконзон эзда», «Эйсь тусь»; И.И.Левитан «Март»; А.Саврасов «Грачи прилетели».)

Вага кодама валмуворкст арьсесть ломаттне тундать колга:

Тундась мазы панчфса,

Сёксесь- сёронь таньфса.

Тунда видят – сексенда пидят.

Тундань кельги улят - пара вал кулят.

Ётасть кельмотне, моросне,

Прянь каяма ушедсть роснее,

Кенерсь масторонь къстынясь,

Панчфса щась марнек лугась.

Азость, кодама пингсь сась?

- Кундась тевонцты пси кизось. Кода пара ушеса! Менельса аяш фкявок коволня.  Псиста пиди шинясь.  Кодама аньцек панчф аф панжи саттнень и лугатнень эса. Вирьса кенерсть къстыхне, инезихне. Шуфттнень алга вирьса касыхть пангт

 (Иттне сяда тов азондыхть кизоть колга).

  -А кода кизоть колга сермадыхть поэттне?

 (Кизоть колга стихотворениянь лувомась).

ИЮНЦЬ

Кли ушесь мани-мани,

Кли лямбонянц шись пани —

Кудса киньге аф кирдьсак...

Коста идень тналть мусак?

Ну, конешна, ляйть трваста,

Ну, конешна, аньцек тяста:

Кие ёрдась ульмонят,

Кие ляи — алубрят,

Кие уема ни машты,

Кие мацянява шашни,

Кие вяшкомняс уфай —

Кажнайсь сонцень тевонц шнай.

ИЮЛЬСЬ

Пиземсь лоткась, и ульцява

Жольфса-горьфса шуди ведсь.

Менельть карксазе кучкава

Атямъёнксонь мазы седсь.

Мярьгат, сембе миронь панчфнень

Тюссна шоворсть тоза фкас, —

Летьке модав кадозь таньфснон,

А синць менели лийкстасть.

АВГУСТСЬ

Эрька вирень пери сада,

Сада, цёранят-стирнят,

Куду киньге тяда када —

Няфтян сембонди кстынят.

Ну,  а нинге, ну,  а нинге

Пангс мон эсонт серьгядян,

Тясть юмафта аньцек киньге,

Аньцек тяда эрьгоде.

ПАНЧФКЯ

Панжи панчфкясь,

Пееди шиняти.

Медень таньфкясь

Маряви мешкяти.

Панчфти пара –

Ули мес шинясь,

Мес пяк кенярди

Панчфкяти иднясь.

Панжи панчфкясь-

Киндиге аф шорси.

Аньцек цёфкскясь

Морнят тейнза морси.

(Няфтевихть картинат:Ф.В.Сычков «Киза», «Тише лядемста самась», «Паксяса», «Иттне панчфнень еткса»; И.Шишкин «Рожь»; В.Васильев «Мокрый луг») 

• А тяни кулхцонттама валмуворкст кизоть колга.

            Киза - тевонь пиза.

            Сай май - удомаце аф сай.

-Паксясь, пересь марнек шамсть ни.

Вармась калафни вирть щамонц.

Нармоннятне кис сърхкасть,

Азость, кодама пингсь сась?

Сась зрнянь сексеть очередоц рисовандамс. Полафтсь перьфпяльсь. Келуфнень и ушторхнень архтозень тюжаса. А поюнясь бъта кърьвязсь. Якстерь лопанянза пвлыхть толкс.  Саттнень эзга ёрясь мазы панчфт. Вирьса кенерсть пяшттне. Ванны азоравась перьфпяльге и кенярькшни эсь картинанц лангс.

Иттне морафтыхть  стихотвореният  наизусть сёксеть колга.

СЕНТЯБРСЬ

Месть, Ивання, тихольдят,

Сяка школав аф туят,

Вага кочкат кизонят —

Тонга ученик улят.

ОКТЯБРСЬ

Авартьф шаманц сёксень менельть

Марнек тавадозь туцят,

Каргонь полкне югу венемсть —

Ризфу вайгяльснон кулят.

Эсост кельмось тяста пани —

Саманц лятфни эрь шиня,

Бта виздезь перьфке ваны

Пиже щамфтома вирнясь.

Вакска лопанянзон канды

Кельме вармась кати-ков,

Пади, тячи, пади, ванды

Акша шаленц прафтсы ловсь.

НОЯБРСЬ

Ся аф зарясь палы,

Ся аф сонь руцясь,

Зарять тюсонц валы

Кажнай ошсь, ульцясь.

Ся — кумацень шада,

Ся — Октябрсь сась,

Шачем шинцты рады

Павазу странась.

СИЯНЬ СЁКСЕСЬ.

Сиянь сёксень инжикс тейнек сась,

Нармоттня лийкстать лямбе крайс.

Тюжа лопаттне шарозь прайхть,

Кирьхксня ярхцамс сёра вешихть

Шиттне нюрхкалюдсть, веттне кувалюдсть,

Вага тяфтама азонксозе сёксеть колга

А тяни ванцаськ художникнень работаснон сёксеть колга.

(Ф.В.Сычков  «Пизелксть ала», «Сексе»; И.Левитан «Золотая осень».)

4.Учительть мекольдень валоц.

Тячи, шабат, минь няеськ сембе кизонь пинкнень. Морафтоме стихотвореният, валмуворкст, ваноме картинат. Минь няеськ поэттнень и художникнень работаснон вельде. кода полафни природась тялонда, тунда, кизонда и сёксенда. .Мон арьсян, што тя урокта меле тинь сядонга карматада природать кельгома и ванфтома.

5. Кудонь тевсь. Сермадомс сочинения инь кельговикс кизонь пингть колга.