Милләт күрке - әҙәп
материал

   Башҡортостан Республикаһы Хәйбулла районы муниципаль район

Аҡъяр ауылы «Бәпембә» балалар баҡсаһы баланы үҫтереү үҙәге

муниципаль автономиялы мәктәпкәсә белем биреү учреждениеһы

Милләт күрке - әҙәп

(ата - әсәләр йыйылышы сығышы)

                                                                                     Әҙерләне:

                                                                                        тәрбиәсе Байсурина З.Ә.

      Милли ғорурлыҡты, үҙаңды, милли хәтерҙе һәм әҙәплелекте тәрбиәләүҙә иң беренсе сиратта ата - әсәнең әһәмиәте ҙур.

     Әҙәп-милләт күрке, мәҙәнилектең айырып алғыһыҙ күрһәткесе. Ата - бабаларыбыҙ йәш быуында кешелеклелек, әхлаҡлылыҡ, рухи  хистәр үҫтерергә тырышҡан, киң күңелле, кешеләр менән яҡшы мөнәсәбәттә, ихтирамлы булырға өндәгән.  

     Бала саҡта һөйөүҙән, иркәләүҙән ситләштерелгән кеше үҙ ғаиләһенә, балаларына йылы мөнәсәбәттә була алмай. Бала өсөн ғаилә - өмөт, яҡшылыҡ усағы. Әҙәплелек, зауыҡ тойғоһоноң нигеҙе бала  саҡта уҡ һалына. Шуға күрә мәрхәмәтлелек, яғымлылыҡ тәрбиә процесына ыңғай йоғонто яһай. Бәләкәй кешене бер туҡтауһыҙ йәберләү, ҡысҡырыу, язалау - ата-әсәнең тәрбиәүи көсһөҙлөгө, әҙәпһеҙлеге күрһәткесе ул. Балаларҙа ҡартлыҡҡа, ололарға шәфҡәтлелек, хеҙмәткә һөйөү тәрбиәләү өлкәндәр үрнәгендә үҫешә.

      Атай булыу - етди һәм яуаплы вазифа. Бигерәк тә  ир бала өсөн  атай кеше - батырлыҡ идеалы, ғәйрәтлек өлгөһө. Ҡатын - ҡыҙға ихтирам тойғоһон, яуаплылыҡ хисен, уларҙы яҡлау теләген улында тәү башлап атай кеше уятырға тейеш. Төплө аҡыллы атай бала алдындағы абруйын белеп файҙалана. Атай кеше үҙенең яғымлылығы, рәхимлелеге менән көслө.

      Атай кешенең ҡыҙ балаға ла йоғонтоһо ҙур. Етди, ғәйрәтле, оҫта ҡуллы, аҡыллы атай ҡыҙы өсөн "егетлектең" юғары өлгөһө булһа, ҡыҙ баланың ғәҙәт-зауығы, өйгә, ғаиләгә, яҡындарына мөнәсәбәте иң  элек үҙ әсәһе үрнәгендә үҫеш ала. Ата-әсәнең ыңғай тәртибе, ҡылған эштәре, үҙ-ара мөнәсәбәттәре теләһә ниндәй өгөт- нәсихәттәренә ҡарағанда ла көслөрәк йоғонто яһай.

   Әҙәплелек - милли мәҙәнилектең, тәрбиәлелектең айырып алғыһыҙ юлдашы ул. Әҙәпкә өйрәнеү бер ваҡытта ла һуң түгел. Милләтебеҙҙең телен, йөҙөн, күркәмлеген һаҡлап  алып ҡалыу - һәр ғаиләнең изге бурысы.