Стихотворение "Бала йоклатканда"(бишек җыры)
материал на тему

Бишек җыры.

Әйдә, балам, ят инде

Ял итәрсең-йокласаң.

Татлы булыр йокың да.

Бишек җырын тыңласаң.

Җырларым бик күп минем

Җырлыйм икән кайсысын.

Телим сиңа йокының,

Иң-иң татлы, баллысын.

Йокла,балам,йокла инде,

Күзең йомылып бара.

Матур төшләр күрә-күрә,

Йокла син, газиз балам.

Көне буе уйнап син,

Арыгансың бит, балам,

Син йоклаган арада,

Ял итеп алыр анаң.

Әлли-бәлли,үскәнем,

Вакыт җиткән йокларга.

Йоклый әти-әниең дә,

Әбиең, бабаең да.

Шаяным-син, наяным,

Йокла инде ,күз нурым.

Син бит минем бердәнберем,

Синең өчен бу җырым.

Керпе дә әйткән йомшагым,

Аю да әйткән аппагым.

Булсаң иде син дә минем

Куанычым,шатлыгым.

Йоклый-йоклый, үсәрсең,

Тиздән тәпи китәрсең.

Әтиеңә-әниеңә,

Бәхет бүләк итәрсең.

Бәләкәчем,йокла син,

Син бит минем бергенәм.

Үстерербез, сине ,балам,

Яратып, сөеп кенә.

Менә йоклап та киттең,

Минем нәни колыным.

Тәмам итәм, әкрен генә,

Тылсымлы бишек җырын.