Конспект урока по крымскотатарскому (родному) языку, 2 класс Тема: "Ягоды, фрукты, овощи. Диалог"
презентация урока для интерактивной доски по чтению (2 класс)

                        Къырымтатар тили

                             2-джи сыныф

Мевзу: Мейвалар, емишлер ве себзелер. Диалог.

Макъсатлар:

Окъутув: талебелерге мейвалар, емишлер ве себзелер  акъкъында малюмат берюв; диалог устюнден иш алып барув; метинни анълы окъув алышкъанлыкъларыны мукеммеллештирюв; предметлернинъ аляметини бильдирген сезлерни тапмагъа огретюв; тапмаджаларнынъ джевапларыны тапып, булмачаны толдурмагъа огренюв;

Инкишаф: талебелернинъ сез байлыгъыны зенгинлештирюв, багъламалы нутукъларыны инкишаф этюв.

Тербиевий: ана тили дерслерине севги ашлав, сагълыкъ омюр тарзыны тербиелев, догъру ашайт алышкъанлыкъларыны ашлав.

Универсаль окъув арекетлер:

Регулятив: озь фикирлерини догъру ифаде этюв  беджериклиги, дерсте фаалиетнинъ макъсадыны къарарлав беджериклиги;

Окъутув: умумий арекетлерине коре таснифлев беджериклиги;

Коммуникатив: бири-бирини динълев ве анълав беджериклиги, озь фикирлерини агъзавий шекильде тизюв беджериклиги.

Дерснинъ теминаты: мейва ве емишлернинъ ресимлери, сепетчиклер, карточкалар, сансарчыкъ,

Дерсте къулланылгъан педагогик технологиялары: сагълыкъны эйбетлев, оюн, бераберликте ишлев(группаларда иш), индивидуаль окъутув, дифференциаль окъутув.

Дерснинъ чешити: янъы бильгилерни «ачма», янъы беджериклик ве алышкъанлыкъларны алув.

                       Дерснинъ кетишаты:

I. Тешкилий къысым.  Мотивация

- Селям алейкум, урьметли талебелер! Бири-биримизге бакъып, оз тебессюмлеримизни багъышлайыкъ.

       Мектеп чанъы чынъылдай,

      Сеси кескин янъгъырай,

      Дерске вакътында кирем

      Кеч къалмайып бир дирем.

II. Талебелернинъ бильги къабилиетлерини актуаллештирюв

1.Дерснинъ мевзу ве макъсадларыны талебелернен берабер чыкъарув.

  (слайд 2)

- Бугуньки  мевзуны бильмек ичюн, тапмаджанынъ джевабыны тапынъыз.

               ***

       Пишип бите емишлер,

       Пишип бите мейвалар,

       Бол берекет джыйыла,

       Бу не вакъыт ола? (Кузьде)

- Кузьде биз насыл берекет джыямыз? (Емиш, себзе ве мейваларны )

- Демек, бугунь дерсте биз не акъкъында лаф этеджемиз? Нени огренеджемиз?          Озьлеринъиз дерс мевзузыны айтынъыз. Макъсатлар къоюнъыз.

2.Оджа дерс мевзусыны айта (слайд 3)

2. Лугъат иши (янъы сезлерни огренюв) (слайд 4)

Берекет – урожай

Къайсы, зердали – абрикос

Емишлер – ягоды

Мейвалар – ягоды

Себзелер – овощи

Къыймет – ценность

3. Оюн «Айшеге ярдым эт» (слайд 5-6)

- Айше базаргъа кельди. Мейва, емиш ве себзелер аладжакъ ола. Амма оларнынъ адларыны унутты. Келинъиз, Айшеге ярдым этейик. (Оджа мейва, себзе ве емишлернинъ ресимлерини косьтере, талебелер адларыны тапалар). Сезлерни берабер текрарлайыкъ.

4. Диалог «Базарда» (дерслик с.97)

III. Янъы мевзу устюнден иш

- Дерсимизге бир айванчыкъ мусафирликке келеджек. Амма насыл айван олгъаныны тапмаджанынъ джевабындан билирмиз.

                     ***

       Оймакъ киби козьлери.   (слайд 7)

       Далдан далгъа сычырай.

       Къуйругъы дюльбер, йылтырай,

       Фындыкъ ве джевиз топлай. (Сансарчыкъ)

Оджа дерске макъсатлар къоя

- Догъру, бизим мусафиримиз – сансарчыкъ. О, сепетчигине чешит-тюрлю вазифелер кетирди. Шимди тавшанчыкъ сизлерге  бирер сепет багъышлайджакъ.

- Я сепетлер сизлерге неге керек олур? (Кузьлюк берекетни джыймак ичюн).

- Догъру, вазифелерни беджерген сонъ, Сансарчыкъ сизлерге мейва, себзе  я да емиш багъышлайджакъ. Ойле этип, дерснинъ сонъунда сепетлеринъизни мейва, себзе ве емишлернен толдурарсынъыз.

-  Башта эки группагъа болюнейик.

 I «Мейвалар»   Бугунь бизлер багъчагъа бараджамыз,

                           Сепет-сепет мейва ве емиш джыяджамыз.

 II «Емишлер»  Бу бостанда себзелер сачылгъан,

                           Оларны берабер джыяйыкъ.

1.Вазифе Шиирни ифадели окъунъыз (слайд 8)

       Джанэрик, джевиз, джилек –

       Бу мейвалар пек керек.

      Язда джыйсанъ берекет,

       Къышта олур чокъ къыймет.

- Берекетни не вакъыт джыялар? (кузьде)

- Мейвалар, себзелер ве емишлер бизге насыл къыймет кетирелер? (олар пек файдалы, оларда витаминлер чокъ, олардан татлы, хошав пиширелер, сонъ къышта ашайлар) (слайд 9)

2.Вазифе Карточкалар устюнден иш (дефтерден)

I гр. «Багъчада. Мейвалар.»

II гр. «Бостанда. Себзелер.»

Раатлыкъ дакъкъа (талебелер сезлерни айтып, мейваларны джыялар, далгъа узангъан киби арекетлер япалар; себзелерни джыйгъанда, эгильген  киби арекетлер япалар)  

- Бугунь бизлер багъчагъа бараджамыз,

  Сепет-сепет мейва джыяджамыз: алма, армут, шефтали, нар, эрик, юзюм, вишне, кираз, джилек, къайсы, къызылчыкъ…

- Бу бостанда себзелер сачылгъан,

  Оларны берабер джыяйыкъ: бакъла, къартоп, бибер, хыяр, чюкюндир, туруп, сарымсакъ, согъан, патильджан, хавуч,..

 3. Вазифе Метин устюнден иш.  Дерслик «Берекетли алма» с.117

1) Оджа метинни окъуй.

2) Лугъат иши  (слайд 10)

   Майышкъан, къыйышкъан-согнутый

   Бираз-немного, слегка

   шыралы, сувлы-сочный

   такъсимледи, больди-поделил

3) Метиннинъ мундериджеси боюнджа субет

- Икяе не акъкъында? (Алма тереги ве алма акъкъында)

- Икяеде кимлер акъкъында лаф кете? (Бекир, анасы, битасы ве къартбабасы)

- Алманы ким тапты? (Бекир)

- Бекир алманы озю ашады? (Екъ)

- Я ким алманы ашады? (Эр кес)

- Бу икяе сизлерни неге огрете? (Бири-биринен  болюшмеге. Бири-бирине ярдым этмеге керек.Тек озюни дегиль де, эр кесни тюшюнмек керек)

- Икяени бегендинъизми?

4. Вазифе Насыл? суалине джевап берген сезлерни тапып язынъыз

(слайд 11)

I.гр. Юзюм – татлы, лезетли, сувлы, баллы, къокъулы, сары, файдалы, …

        Хыяр – узун, ешиль, лезетли, къокъулы, сувлы, файдалы,…

II.гр. Армут – сары, къокъулы, сувлы, шыралы, лезетли, файдалы,…

         Бибер – ешиль, къокъулы, татлы, файдылы,…

Раатлыкъ дакъкъа «Сансарчыкъ» (слайд 7) (талебелер йырлайлар ве ойнайлар)

5. Вазифе «Мейвалар ве себзелер» оюны (слайд 12), (агъзавий шекильде)

- Сезлернинъ эр бир арифине янъы сезлер тапынъыз

I.гр.  мейвалар                                                  II.гр. себзелер

мелевше                                                              согъан                                                                         

емиш                                                                    ель

йип                                                                       бибер

вишне                                                                  зердали

алма                                                                     елькен

лимон                                                                  лезетли

армут                                                                   емек

рале                                                                      раф

6. Вазифе «Мейвалар ве себзелер» оюны (лото), (группаларда иш)

7. Вазифе   Оюн « Булмачаны чезинъиз» (слайд 13)

- Тапмаджаларнынъ  джевапларыны тапсанъыз, булмачаны чезерсинъиз.

1. Инесиз, йипсиз тизильген боюнджакъ,

    Табиат тизген, къол узьген. (юзюм)

2. Антери чокъ, дегмеси екъ. (къапыста)

3. Сары, къокъулы, баллы мейва, тийсен – къашындыра. (шефтали)

4. Аш, ашнынъ ичинде – таш,

   Ташнынъ ичинде кене аш. (къайсы)

5. Баарьде ачкъан пек дюльбер чечеклер. (ляле)

6. Ал янакълы, къокъулы, файдалы, теректе оськен мейва. (алма)

7. Алдым – бир дане,

    Ачтым – бинъ дане. (нар)

- Булмачанынъ эсас сезюни окъунъыз. МАШАЛЛА!

IV.  Дерске нетиджелер чыкъарув (слайд 14)

- Дерсни бегендинъизми?

- Сансарчыкъ берген вазифелери меракълы эдими?

- Насыл метиннен таныш олдыкъ? («Берекетли алма»)

- Икяе неге огрете?

- Мейвалар, емишлер ве себзелер бизлерге насыл файда кетирелер?

V. Эв вазифеси (слайд 15)

1).Дерслик с. 97 диалогны роллернен окъумакъ;

2).Энъ севген мейва я да емишнинъ ресимини язынъыз.

- Бугунь дерсте эр кес яхшы чалышты. Сепетлеринъиз мейва ве емишлерге толды. Сансарчыкъ эпинъизге МАШАЛЛА айта! (слайд 15)