Визитная карточка к конкурсу "Коми велӧдысь" (Учитель коми языка)
материал на тему

Визитнӧй карточка

Видза оланныд! Бур асыв ставныдлы, пыдди пуктана войтыр!

Менӧ  шуӧны Светлана Юрьевна Стрекалова, ме  ичӧт классъяс  велӧдысь.

         И ме зэв радпырысь чолӧмала ставнытӧ тайӧ кывкутана вермасьӧм-ордйысьӧм вылас!

А локтім ӧд ми татчӧ республикаса пасьталаысь!

Коми муным миян зэв тай ыджыд!

Коми муным миян зэв тай мича!

Коми муным, ставӧн тӧрмӧн пыжӧн

Бурлань кывтан ӧдтӧ эн жӧ-й личӧд!

Ми олам ас чужан Коми муын. Тайӧ миян ӧтувъя керка, уна национальностя йӧзлӧн бурӧн-ладӧн оланін. Ыджыд да паськыд Коми муным!

А ме вои республикалӧн медся шоныд да гажа инысь – Луздор районысь.

Уна чуймӧдантор эм миян районын. Но кыдзи тай «Поле чудес» программаын шуӧны: медся бура да уна сэн ли тан олысь йӧз йылысь   вермас висьтавны налӧн пусьӧм-пӧжасьӧмыс.

И ме тіянлы вайи чӧскыд пӧжас. Татшӧм чӧсмасьӧмторсӧ пӧжалӧны  миянын,  гашкӧ,  быд керкаын.      

(Пӧжас)

Быд мортлӧн эм аслас ичӧт рӧдина, места, кӧні сійӧ чужис, быдмис, верстяммис. Татшӧминӧн  меным лоӧ  муса  Абъячой сикт.

Ак, Абъячой тэ, Абъячой!

Тэ сьӧлом гаж, тэ сьӧлӧм дой!

Он вушйы сьӧлӧмысь кузь нэм.

Тэ медся, медся муса мем.        (Гений Дмитриевич  Горчаковлӧн   кывъясыс)

Ме чужи тайӧ сиктас. Ола тані жӧ. Тані менам бать-мам, ыджыд рӧдвуж котыр, чужан керкаӧй.  Миян сиктным ыджыд, мича, пуксьӧма-шылькнитчӧма Луза ю пӧлӧн.

Абъячойса шӧр школа, миян велӧдчанін.

Ов Гагаринлысь новлӧ, ставлы тӧдса, бур ним.

  И быд во апрель 12 лунӧ  школаын мунӧ гажлун «За честь школы». Миян велӧдчысьяс да велӧдысьяс школаса гажлун кежлӧ  вочисны проект «Абъячойлӧн сизим шензьӧдантор» («7 чудес Объячева»). Проект вӧчигӧн ставным гӧгӧрвоим:   мусаджык да мичаджык миян чужанінысь нинӧм абу.    (брошюра)

Миян сиктын чужисны да велӧдчисны Абъячойса шӧр школаын уна енбиа йӧз. Разалісны найӧ республика, Россия, да мир пасьтала. Та повстын:  коми литература да искусство туялысь и критик, филология сьӧрти доктор – Вера Алексеевна Латышева,  контр-адмирал Юлий Александрович Фомин, Россияса народнӧй артист, Мариинскӧй театрса солист Владимир  Борисович  Ванеев, Коми Республикаса вужвойтырлӧн шылада-драмаа театрса  веськӧдлысь, искусствоса нимӧдана уджалысь   Светлана Гениевна Горчакова да мукӧд.

Тані коркӧ менӧ велӧдіс Александр Тимофеевич Урнышев, ӧти кадӧ весиг директораліс. Сійӧ гижис аслас школа йылысь кывбур, мӧд нималана земляк Петр Васильевич Шучалин тайӧ кывбур вылас лӧсьӧдіс сьыланкыв. Сійӧ лоис школаса визитнӧй карточкаӧн. Оз на-й быд велӧдчанін вермы ошйысьны татшӧм мича сьыланкывнад.                  

                                              («Абъячойса шӧр школа» сьыланкыв))

Быд лун ме восьлала чужан сиктӧд аслам уджаланінӧ. Менӧ вочаалӧны миян велӧдчысьяс.

Найӧс ме велӧда радейтны чужан му, пыдди пуктыны коми кыв. На пӧвстын и комияс, и рочьяс, и украинечьяс, и армяна, и уна  мукӧд национальностя челядь. И быдӧн найӧ пиысь велӧдӧны коми кыв. А ме велӧда найӧс пыдди пуктыны да вылӧ донъявны чужан кылӧс, сылысь мичсӧ да мыла  шыяссӧ. Ме зэв ёна радла, кор челядьлӧн артмӧ, кор найӧ восьтӧны аслыныс выльторъяс. А сидзкӧ и луныс муніс бура да колана ногӧн.

А ӧні виздӧдлӧй ас йылысь сюжет            ( Презентация)

Со и тэчсис менам ас йылысь визитнӧй  карточка.

Коми оласног серти гажлунъяс дырйи козьналӧны казьтыланторъяс.  Ме тшӧтш вайи тіянлы козинъяс.

Тайӧ Лузяночка – Луз дорса ныв,  миян символ.

А со миян Луздорса кык ӧшмӧсысь минеральнӧй ваяс.

Ӧтиыс - сола, а мӧдыс вежӧдӧм. Сійӧ содтыштас тіянлы дзоньвидзалуннытӧ, бурдӧдас ас кылӧмнытӧ.

Виччысям савнытӧ миян гажа Луздор районӧ,

Абъячой сиктӧ,

Абъячойса шӧр школаӧ.