Использование игровых технологий на уроках коми языка
методическая разработка

Использование игровых технологий на уроках коми языка

Ворсöмъяс отсöгöн челядьöс коми кывйö велöдöм

Коми кыв тöдöм миян кадö – абу тшöкыда паныдасьлантор, кöть сійö и лыддьысьö миян республикаын каналан кывйöн. Коми кывйö велöдöм заводитчö медводдза классянь, и сы вылö индысьö вежоннас этша час. Та вöсна коми кыв велöдны абу век кокньыд да интереснö. Уна велöдысь водзын сулалö юалöм: «Кыдзи  позьö ышöдны челядьöс велöдны  коми кыв, кыдзи отсавны налы радейтны тайö предметсö?»

        Ставлы тöдса, мый велöдчöм дорö кöсйöмыс да окотитöмыс челядьлöн ёна кыптö, кор урокö пыртан ворсан комъяс. Ворсігöн кагаыс уджалö оз мырдöн, а ас кöсйöм серти. Ворсöмлöн могыс – отсавны челядьлы мöвпалана сьöкыд удж вöчны босьтчöданаöн да интереснöйöн. Та вöсна коми кывйö тырбура велöдігöн колö пыртны урокъясö ворсан материал.

        Литератураын сетöма уна пöлöс ворсöм, ми вайöдам ворсöмъяслысь татшöм сикасалöм.

Ворсöмъяслöн сикасалöм.

1. фонетическöй ворсöмъяс
2. лексическöй ворöмъяс
3. грамматическöй ворсöмъяс
4. сёрни сöвмöдан ворсöмъяс

Пыдісяньджык видлалам став сикасъяссö.

Фонетическöй ворсöмъяс

Фонетическöй ворсöмъяслöн мог – велöдны стöча  да ясыда шуавны кывъясын быд шы, кужны кывны да торйöдны кывйысь индöм шы.

        Вайöдам пример вылö фонетическöй ворсöмъяс.

1. Шыпасъяса рад.

        Мог: кужны торйöдны шыяс да шыпасъяс öта-мöд костас.

        Сетöма некымын шыпас. Челядьлы колö быд шыпас вылö лöсьöдны кыв, сэсся сёрникузя, медым быд кыв заводитчис сетöм шыпасъяссянь.

        Ю     Д     Б     С     К      

        Ю дорын быдмö сэтöр куст.

        Юля да Катя сулалöны бипур дорын.

2. Курччöм слог.

        Мог: вайöдны кывъяс торъя слог дорö да паськöдны челядьлысь кыввор кытш.

        Джынъя яблöк вылын гижöма кык шыпаса слог. Челядь содтöны сэтшöм слог, медым артмис кыв. Артмöм кывъяс лыддьöны, гöгöрвоöдöны вежöртассö.

                Еджыд, ыджыд, джуджыд, паськыд,

                кöдзыд,векньыд, дженьыд, паныд.

3. Мачöн ворсöм.

        Мог: висьтавны колана шы вылö кывъяс.

        Челядь сувтöны кытшö, велöдысь шыблалö мач, шуö кутшöмкö шы. Челядь кутöны мачсö да висьталöны колана кыв.

4. Коді сюсьджык?

        Мог: сöвмöдны фонетическöй кылöм.

        Велöдысь лыддьö либö мойд комиöн. Челядь сюся кывзöны да висьталöны, пример вылö, [к] шы вылö заводитчысь кывъяс.

5. Пос.

        Мог: висьтавны сетöм шы вылö кывъяс.

        Велöдысь висьталö кутшöмкö шы. Челядь думыштöны кывъяс, кодъяс заводитчöны  колана шы вылö. Кутшöм рад висьталас унджык кыв, сымын унджык флажок сувтöдсьö налöн пос вылö (поскыс серпасалöма дöска вылын).

6. Тöдмав, мый ме висьталі.

        Мог: кужны вуджöдны роч кыв вылö кывъяс, кодъяс шуигöн пöшти öткодьöсь.

        Велöдысь шуö кык кыв. Велöдчысь мöдысь шуö найöс да вуджöдö роч кыв вылö.

        Кок – кöк                        Ош- оз                                   Син - сир

        Пöч – кöч                       Кань-пань                              Коз – рос

7. Пукты шыпас.

        Мог: кужны торйöдны кывйысь медводдза шысö да стöч тöдны, кутшöм шыпас петкöдлö индöм шысö.

        Быд велöдысьлöн некымын карточка-серпас да вундалöм шыпасъяс. Велöдысь петкöдлö шыпас, челядь шуалöны колана шы либö шыяс. Сы бöрын найö тупкöны серпассö колана шыпасöн.

• Велöдысь петкöдлö В шыпас, челядь тайö шыпасöн тупкöны серпасъяс: вöв, варыш, вурдысь, вотöс, вöр.
• Велöдысь петкöдлö Т шыпас, челядь тайö шыпасöн тупкöны серпасъяс: тупли, турипув, тури, тар, тасьті, турун.

8. Кут кыв водзсö.

        Мог: кужны торйöдны кывйысь медводдза шысö да вайöдны индöм шыа кывъяс.

        Велöдысь шуö кутшöмкö кыв. Челядь ас кежысь торйöдöны шуöм кывйысь медводдза шысö. Сэсся быдöн сьöрсьöн-бöрсьöн шуалöны татшöм шыа кывъяс.

        Велöдысь шуö шобді кыв. Челядь вайöдöны кывъяс: шонді, шебрас, шаньга, шы, шыд, шыр да с.в.

9. Кут кыв помсö.

        Мог: кужны торйöдны кывйысь бöръя шысö да вайöдны индöм шыа кывъяс.

        Велöдысь шуö кутшöмкö кыв. Челядь ас кежысь торйöдöны кывйысь бöръя шысö. Сьöрсьöн-бöрсьöн челядь шуалöны татшöм шыа кывъяс.

        Велöдысь шуö коз кыв. Челядь вайöдöны кывъяс: зарава, зон, зöр, зэр, зыр, зорöд да с.в.

10. Лавкаö.

        Мог: озырмöдны челядьлысь кывворсö, кужны вайöдны индöм шыа кывъяс.

        Лавкаысь вермасны ньöбны сöмын сэтшöм тöвар, сы нимын кö эм /п/ шы:

1. паськöм да кöмкот лавкаысь тöвар: пась, пальто, платтьö, кепысь, плаш, сарапан, партук, сапöг, тупли, тяпи, пими.
2. эмбур лавкаысь тöвар: лампа, рöмпöштан, шкап, пызан, пурт, пань, плитка.

        11. Град выв пуктас идралöм.

        Мог: кужны торйöдны кывйысь /к/ шы.

        Челядь водзын ичöт серпасъяс: уна сикас град выв пуктас. Велöдысь челядьлы сетö кык кöрзина. Челядь öти бöрся мöд босьтöны серпас, шуалöны град выв пуктаслысь нимсö да пуктöны колана кöрзинаö. Нимас кö кылö /к/ шыыс, пуктöны öти кöрзинаö, оз кö кыв – мöд кöозинаö.

        1 кöрзина: анькытш, капуста, картупель, лук, морков, свеклö.

        2 кöрзина: öгуреч, переч, помидор.

Лексическöй ворсöмъяс

Лексическöй ворсöмъяслöн мог – озырмöдны челядьлысь кывворсö и пыртны челядь сёрниö выль кывъяс.

        Вайöдам пример вылö лексическöй ворсöмъяс.

        1. Артмöд чеп.

        Мог: велöдны челядьöс орччöдны кывъяс, аддзыны налысь öткодьлун да торъяланлун.

        Сетöма кык кыв. Колö аддзыны сэтшöм промежуточнöй кывъяс, кодъяс лоöны вуджöмöн оти кывсянь мöд кывйö.

        Мöс – шаньга

        Мöс – йöв – няньшом – шаньга

        Ыж – кепысь

        Ыж – вурун – тупыль – кепысь 

2. Шыр – ичöт ныр.

        Мог: велöдны лöсьöдны дзугöм текст.

        Сетöма висьт, кöні мукöд кывсö йирöма шыр. Челядьлы кöлö думыштны да гижны колялöм кывъяс.

Вöрын.

        Котöртö   тэрыб    шыр. А    ыджыд   мыр вылын  пукалö полысь

кöч. Кöчлöн бöжыс дженьыд, а шырлöн   кузь    . Мыр     дорын

сулалö    еджыд    гоб. А со сэні -     джуджыд      ю.

3. Чери кыйöм.

        Мог: велöдны öдйö корсьны вежöрысь колана кыв да висьтавны гораа.

        Дöска вылын серпасалöма чери. Серпас дорас вöчöма бумагаысь зептор. Ворсігöн сэтчö велöдысь пуктö черияслысь серпасъяс. Велöдчысьлы колö петкöдлыны серпассö да гораа комиöн шуны черилысь нимсö.

4. Тыра пестер.

        Мог: велöдны öдйö корсьны вежöрысь колана кыв да висьтавны гораа.

        Кудйö либö пестерö водзвыв пукталöма чачаяс. Челядь видзöдтöг перъялöны найöс да шуöны комиöн предметлысь ним.

5. Мича дзоридз.

        Мог: велöдны лöсьöдавны кывтэчасъяс рöм петкöдлысь кывкöд.

        Бумагаысь вöчöм дзоридз лепестокъяс вылын клеитöма посни серпасъяс. Лепестокъясыс уна рöма. Челядь босьтöны кутшöмкö лепесток да лöсьöдöны кывтэчас.

        Тупли         Небöг         Дзоридз       Чышъян        Öдзöс          Майтöг                       Кольквиж               Гöрд         Кельдлöз       Турунвиж        Сьöд                     Лöз

6. Кöні син, кöні пель?

        Мог: кужны висьтавны сійö предметсö, код вылö петкöдлöны.

        Ставöн сувтöны кытшö. Кытш шöрас ворсысь (код вылö усис пуд). Сійö петкöдлö син вылас да шуö: «Тайö пель». Код весьтö сійö сувтö, сылы колö висьтавны: «Тайö син».  Коді оз куж вочавидзны, сувтö кытш шöрö.

7. Мый радейтö сёйны кöч.

        Мог: кужны бöрйыны сетöм серпасъясысь коланаöс.

        Сетöма некымын серпас, на бокын серпасалöма кöчöс. Челядь бöрйöны серас писис сэтшöмöс, мый сёйö кöч.

        Капуста       Сапöг       Морков         Ма        Бадь        Кампет

8. Кекöнач.

        Мог: кужны бöрйыны сетöм кывъясысь коланаяс.

        Велöдысь висьталö кывъяс кутшöмкö тема серти, а велöдчысьяс, кывйыс кö сетан тема серти, кинаныс клопнитöны. Пример вылö, темаыс «Сёян-юан».

        Öшинь    Нянь    Кöч     Рысь     Сов     Небöг    Пызь    Пурт    Шыд

        Тайö ворсöмсö позьö нуöдны мöдпöвъёвтöм дырйи любöй лексическöй тема велöдöм бöрын.

9. Висьтав, кутшöм.

        Мог: лöсьöдны ас кежысь кывтэчасъяс сетöм предмет петкöдлысь кывкöд.

        Велöдысь шуö кутшöмкö предмет петкöдлысь кыв. Велöдчысьяс думыштöны тайö кывйöн кывтэчас, а сэсся и сёрникузя.

        Пызан – ыджыд, джуджыд, выль, мича, пу...

        Джуджыд пызан вылын сулалö мича ваза.

10. Бумеранг.

        Мог: кужны öдйö вуджöдны роч кыв коми вылö.

        Велöдысь шуалö кывъяс рочöн, а велöдчысьяс вуджöдöны найöс коми вылö да öдйö висьталöны.

        Кошка - кань

        Дерево - пу

        Дождь – зэв

         Небо – енэж

        Трава – турун

11. Аддзы паныд кыв.

        Мог: кужны öдйö аддзыны паныд вежöртаса кыв.

        Велöдысь шуалö кывъяс, челядь корсьöн ыюрвежысь паныд вежöртаса кыв да висьталöнвы гораа.

         Югыд – пемыд

        Сьöд – еджыд

        Ыджыд – ичöт

        Небыд - чорыд

12. Кöні мый быдмö?

        Мог: сöвмöдны челядьлысь тöдöмлун матігöгöрса олöм йылысь, озырмöдны налысь кыввор.

        Классын челядь юксьöны куим котыр вылö:

        1 котыр – луд

        2 котыр – град

        3 котыр – вöр

        Велöдысь шуалö кывъяс, а челядь лэптöны ки сöмын сэки, кор кылöны налы лöсялана кыв. Велöдысь вермас шуны и сэтшöм кыв, коді оз лöсяв некоднан котырыслы. Сэки некод оз лэпты кисö.

        Кывъяс: капуста, пöлöзнича, ягсер, яблöк, катшасин, коз пу, лук, вый, сёркни, гут кулан тшак да мукöд.

Грамматическöй ворсöмъяс

Грамматическöй ворсöмъяслöн мог – велöдны колана ногöн вежлавны кывъяс, вöдитчыны грамматическöй конструкцияясöн, лöсьöдны кывтэчасъяс, сёрникузяяс.

         Вайöдам пример вылö грамматическöй ворсöмъяс

        1. Катшасин.

        Мог: велöдны челядьöс орччöдны кывъяс грамматическöй формаяс серти.

        Катшасин коръяс вылын сетöма некымын кыв. Челядь корсьöны на пиысь ковтöм либö лишнöй кыв да висьталöны, мыйла сійö лишнöй. Ковтöм кыв аддзöм бöрын корсö нетшыштöны. Сэсся кольöм коръяс пиысь корсьöны ковтöм кор да с.в.

        Коз, кыдз, козин, пожöм, пöжав, пипуяс.

        Лишнöй кыв «пöжав», сы вöсна мый тайö кыв, петöдлысь действие.

        Коз, кыдз, козин, пожöм, пипуяс.

        Лишнöй кыв «козин», сы вöсна мый тайö абу пу, кыдзи став кывйыс.

        Коз, кыдз, пожöм, пипуяс.

        Лишнöй кыв «пипуяс», сы вöсна мый тайö кывйыс сетöма уна лыдын.

        Коз, кыдз, пожöм.

        Лишнöй кыв «кыдз», сы вöсна мый сійö коръя пу.

        Коз, пожöм. Мыйöн тайö кывъясыс торъялöны?

        Шыпас лыднас, вежöртаснас.

2. Коді медся авъя?

        Мог: кужны колана ногöн вочавидзны юалöмъяс вылö.

        Велöдысьлöн водзвыв дасьтöма кык сикас карточка. Öти карточка вылас гижалöма юалöмъяс, мöдас – вочавидзöмъяс. Дасьтöм карточкаяссö босьтöны челядь да корсьöны пöвсö. Юалöмъяс вылö лöсьöдöны тыр вочавидзöм.

        Кытчö сунласьö чери?                       Ваö

        Кöні олö ур?                                         Пу горсйын

        Кытысь петіс нидзув?                      Муысь

        Кытысянь котöртö пон?                Чомсянь

3. Висьтав, кыдзи колö.

        Мог: кужны аддзыны сёрникузяын дзугöмъяс да лöсьöдны найöс.

        Велöдысь петкöдлö карточкаяс вылын сёрникузяяс да тшöктö бöрйыны правильнöй сёрникузяяс сетöм пытшкын. Неправильнöй сёрникузяяс челядь лöсьöдöны.

        Ме гижа. Коля гижа. Лöзъяс чышъянъяс. Пон котöртны. Гöрд дöрöм.

        Коля гижö. Лöз чышъянъяс. Пон котöртö.

4. Мый колö вöчны?

        Мог: кужны вöдитчыны грамматическöй формаясöн.

        Дзоридз коръяс вылын гижöма кывтэчас: тшöктан наклонениеа кадакыв да предмет петкöлысь кыв. Велöдчысьяс öтикаöн нетшыштöны корсö да вöчöны задание.

        Босьт небöг

        Лок дöска дорö

        Лыддьы кывбур

        Пуксьы парта сайö

        Видзöдлы ёрт вылад

5. Содты кывъяс.

        Мог: велöдны лöсьöдны сёрникузяяс да вöдитчыны грамматическöй формаясöн.

        Серпас серти челядь лöсьöдöны кык кывъя сёрникузя. Сэсся нюжöдöны сійöс, содтöны коймöд кыв, нёльöд…Кодлöн лоö медся Кузь сёрникузя, сійö и вермö.

        Кöч котöртö. Еджыд кöч котöртö. Мича еджыд кöч котöртö. и с.в.

6. Воськов – кыв.

        Мог: кужны вайöдны öткодь кыввужъя кывъяс, сявмöдны челядьлысь кыввор.

        Велöдчысьяс вöчöны воськöв и шуöны индöм кывйöн öткодь кыввужъя кывъяс.

        Бур – бура, буртор, медбур, бурöн, бурöдны, бурасьны, бурмыны, бурмöм.

        Гиж – гижöд, гижавны, гижысь, гижыштны, гижан, гижöдны.

        Сов – сола, солавны, солалöм, соласьны, соласьысь.

        Сьывны – сьылан, сьыланкыв, сьылысь, сьылöм.

7. Артмöд кыв.

        Мог: артмöдны выль кывъяс петкöдлöм серти.

        Сетöм кывъяс дорö челядь содталöны -а- шыпас да артмöдöны выль кывъяс.

        Вын – вына, гаж – гажа, гор – гора, лыд – лыда, мыж – мыжа, сям – сяма, турун – туруна, шуд – шуда, рöм – рöма, чери – чериа, бöж – бöжа.

        Выль кывъяс дорö вайöдöны лöсялана кывъяс да артмöдöны кывтэчасъяс: гажа кад, вына трактор, гора шы, да с.в.

Сёрни сöвмöдан ворсöмъяс

         Сёрни сöвмöдан ворсöмъяслöн мог – велöдны лöсьöдны морта-морт сёрни да öтка сёрни, сöвмöдны челядьлысь йитöда сёрни.

        Вайöдам пример вылö сёрни сöвмöдан ворсöмъяс.

        1.Тöдмав юалöмсö.

        Мог: кужны тöдмавны юалöмсö вочавидзöм серти.

        Класс водзö петö öти велöдчысь. Велöдысь сетö сылы кабала вылö гижалöм юалöмъяс. Велöдчысьыс ас кежсьыс лыддьö юалöмсö да гора вочавидзö сы вылö. Мукöдыслы колö тöдмавны юалöмсö.

        Кыдзи тэнö шуöны?

        Кутшöм урокъяс вöліны талун?

        Мый тэ радейтан вöчны?

        Кöні тэ чужлін?

        Кымын тэныд арöс?

        2. Кывъя нöдкывъяс.

        Мог: паськöдны челядьлысь кыввор кытш, сöвмöдны сёрни да кылан чуйдöм (внимание), водзвыв лöсьöдчытöг сёрнитны кужöм.

        Велöдысь вöзйö кывзыны висьт да тöдмавны, код йылысь мунö сёрниыс. Висьтыс нуöдсьö медводдза мортсянь и заводитчö «Ме» кывсянь. Колана артмöдчöм (условие) – кывзыны помöдзыс. Висьт помасьöм бöрын велöдысь юалö «Коді ме?». Челядь вочавидзöны да подулалöны ассьыныс мöвпсö.

        Ме ола вöрын. Воын кыкысь вежла ассьым паськöм. Радейта чеччавны пуысь пуö. Гожöмбыд запта аслым тшак да кольяс. Ме зэв мича да пушыд. Коді ме?    (Ур)

        Ме велöдчысьяслöн медводдза ёрт. Отсала аддзыны выль тöдöмлунъяс. Ме веськавла челядь киö быд лун. Менам оланін – пызан либö джадж. Коді ме?        (Велöдчан небöг)

        Ме югыдторъяс радейтысь лэбач. Ачым сьöд, а морöсöй еджыд. Ме зэв тэрыб да збой. Коді ме?     (Катша)

        Мöд урок кежлö челядь асьныс дасьтöны татшöм висьт.

        3. Юав да вочавидз.

        Мог: велöдны челядьöс юасьны серпас серти да колана ногöн вочавидзны юалöм вылö.

        Велöдысь петкöдлö челядьлы серпас. Серпас серти челядь сетöны öта-мöдыслы юалöмъяс.

4. Коді казялас медся уна?

        Мог: озырмöдны челядьлысь кывворсö, сöвмöдны сёрнисö.

        Индöм серпас сепрти челядь дасьтöны некымын сёрникузя. Недыр мысти велöдысь тупкö серпассö. Челядь юрвежысь висьталöны серпас вылын петкöдлöмтор йылысь.

5. Быдöнлöн аслас удж.

        Мог: тöдмöдны челядьöс уна сикас уджöн.

        Велöдысьлöн пызан вылын некымын серпас. Быд серпас вылын петкöдлöма мортлысь уджалöмсö. Челядь сьöрсьöн-бöрсьöн матыстчöны пызан дорö, босьтöны серпас да висьталöны 2-3 сёрникузя мортлöн удж йылысь.

1. Тайö велöдысь. Сійö велöдö челядьöс.
2. Тайö стрöитчысь. Сійö кыпöдö йöзлы оланін.
3. Тайö пусьысь. Сійö пуö-пöжалö сёян.

6. Волöн кутшöм кадö тайö овлö?

        Мог: паськöдны челядьлысь тöдöмлунсö вöр-ваын вежсьöмъяс йылысь, сöвмöдны налысь йитöда сёрни.

        Кудйысь челядьлы разöдöма уна сикас серпасалöм открытка. Быд открытка вылын петкöдлöма волöн öти кадся серпас. Класс водзын öти велöдчысь висьталö открыткавывса серпас йылысь (серпас петкöдлытöг), кывйöн серпасалö вöр-валысь мичсö. Мукöд челядь кывзöны висьталöмсö да тöдмалöны, волöн кутшöм кадö тайö овлö.  

7. Радио пыр юöр.

        Мог: велöдны висьтавны колана ногöн индöм тема серти.

        Велöдысь корö пуксьыны пызан сайö некымын велöдчысьöс да заводитö радио пыр аслыспöлöс сёрни:

Дона челядь!

        Талун тіянкöд сёрнитöны медводдз класса велöдчысьяс. Найö висьталасны сы йылысь, мый кужöны да радейтöны вöчны.

        Сёрнитан темаяс:

1. челядьлöн радейтана ворсöм да ворсантор;
2. кодöн кöсъян лоны;
3. кутшöм талун поводдя;
4. менам радейтана гортса пемöс;
5. менам рöдвуж;
6. менам нывъёрт.

8. Лöсьöд помсö.

        Мог: велöдны дасьтыны висьт сетöм сюрöс серти.

        Велöдысь лыддьö неыджыд висьт. Гижöдлöн медся кыпыд здукöдз воöм бöрын дугöдö лыддьöмсö. Велöдчысьяслы колö помавны висьтсö.

Бöрйöм ворсöмъясöн вöдитчöм отсалö челядьлы велöдчыны  кокньыда и окотапырысь.

        Сетöм ворсöмъясöн позьö вöдитчыны уроклöн быд юкöнын: кыдзи заводчигöн, сідзи и шöрас либö помас. А позьö нуöдны и урок-ворсöм, кор став урок чöжыс челядь велöдчöны ворсöм пыр. Татшöм урокъясöн вермöны лоны урок-мойдчöм, урок-путешествуйтöм, урок-КВН, урок-вермасьöм да с.в.

Список литературы

1. Сурнина С.Н., Молчанова В.А. Практикум по коми разговорной речи: Учеб. пособие для студентов филол. Факультета КГПИ. Сыктывкар. Изд.-во КГПИ, 2006.
2. Коми язык как государственный: Программно-метододический сборник 1-4кл./ Сост.Е.Н.Вязова, А.В.Сизова; КРИРОиПК. – Сыктывкар, 2007.
3. Вязова Е.Н., Сизова А.В. Методические рекомседации по обучению коми языку как неродному в 1 – 4 классах. – Сыктывкар: ООО «Анбур», 2013.