Сценарий новогоднего утренника на эрзянском языке
методическая разработка (1, 2, 3, 4 класс)

 «Уледе шумбрат» морось гайги. Весе пурнавить кузонть перька.

В.: - Шумбра чи,  вечкевикс оят!

Течи минек вейс

Тей тердимизь ды пурнымизь

Од иень Покш чись.

Каштмоледе, кунсолодо,

Чикорды кенкшесь!

Те састыне, апак капша

Сови тей ёвксось.

Налксема «КОКОРКИНЕ» С.М.Люлякинань ёвксонзо коряс.

Бабась: - Эрян бабинесь мон  ськамон.

Сакшныть  нуцькинень варштамон.

Нейгак вана Од иестэ

Сыть нуцькинень инжекс тезэ.

Бабась кокорка тенст пансь –

А ёвтавомашка тансть.

Теинь судо , сельмть, кургине.

Токик – кевери киринекс.

Вана нуцькиненьгак састь,

Кенярдозь кудос совасть.

Эйкакшт: - Шумбра ульть, вечкевикс бабай.

- А кузнэть мейсь те шкас арась?

Бабась: - Те иестэнть лиякс теинь:

Тантей кокорка тенк панинь.

Тынь кайседе ды озадо,

Кокоркинеде ярсадо.

Серёжа: - Кузнэвтеме мень Од ие?

 Кокоркадот пишти кие?»

Настя: -Нейке  вирев минь мольтяно,

Вирятянь кузнэ вештяно.

Бабась: Вирев мон а нолдатадызь:

Вачо верьгиз тынк сэвтядызь

Эли вирьсэ ёматадо.

Эрь, весе столь экшс озадо.

Миша: - Аволь васов минь мольтяно,

Котонек кузнэ туйтяно.

В.: Те шканть нардамось штавтовсь,

Кокоркась капшазь ёртовсь,

Панжизе кенкшенть келейстэ.

Кокоркинесь:  - Кандан тененк кузнэ нейке.

Кайседе, эно ютадо,

Курок сан, весе учодо.

В.: Пачкодсь Кокоркась вирь чирес.

Каштмоли  кузонь покш виресь.

Ва, лиссь вирьстэ Нумолнэ,

Ашо нурька пулыне.

- Тон, Кокорка, ков кеверят?

Ривездеяк, нать, а пелят?»

Кокоркась: -Вай, мей сельме, тевс чиян,

Лездый ялгине вешнян…

Тевесь, Нумол, вана мейсэ:

Рангить пакшат пси сельведьсэ.

Од иесь кенкш чирес сась,

Сынст те шкас кузнэст арась.

Алтынь мон сыненст муемс.

Ансяк кода ней улемс?»

Нумолнэ -Тень коряс а мезть ризнэмс:

 Арсян монсь тонеть лездамс.

Миша лелянень мольтяно,

Кедьстэнзэ кузнэ вештяно.

Адя, озак кутьмерезэнь,

Кундак парстине пилезэнь.

В.: Кокоркась сеске озась,

Вармакс Нумолось ношкстась.

Пачкодсть курок сынь Овтонтень.

Мери Овтось Нумолонтень:

- Таго, оям, инжекс сыть?

Кинь истя лангсот ускить?

Нумолнэ: - Миша леляй, лездак тензэ:

Кузнэ эряви сонензэ.

Овтось: - Вирятянтень сон ардозо,

 Мон жо ансяк завхозозо.

В.: Кокоркинесь сюконясь,

Нумолось сюкпря ёвтась.

Нумолось: - Озак таго кутьмерезэнь,

Кундак парстине пилезэнь.

Ней ардтано Вирятянтень –

Вирень сехте покш прявтонтень.

Кокорка: Вана, покштяй, сынек вейсэ

 Вешемс кузнэ пси седейсэ».

Вирятя: «Истят инжеть мон вечкан:

Вешицятненень максан.

Од иестэ зыянт тейнить:

Янгить кузтнэнь, синтрить-керить,

Апак кевксте виренть тапить,

Тарадонь кис чувто правтыть.

Тыненк максан налкшке марто:

Тёкшкесэнзэ тештть мик кавто.

Виряванть вана нурдозо,

Тозонь путозь цётмарозо.

Нурдтнэ сынсь кудов усктадызь.

Ойседе, мон ильтятадызь.

Кокорка, озак икелев,

Невть тон янонть эсеть велев.

Тон, Нумол, саик цётмаронть,

Ветяк улавонть стамбаро.

Овто, озак кузнэнть марто,

Вант, тештетнень илить правто.

В.: Ойсесть ялгатне, кенярдыть,

Нурдось лишмевтеме арды.

Ва, Ривезь каршозост понгсь.

Лоткась, пшкадсь ёжовось сонсь:

- Ялгат, ков истя ардтадо?

Саимизь, илимизь кадо.

Арасть оям, ськамон тесэ,

Тошначи сэви монь эйсэ.

Овтось: -  Од ие! Эно озак.

Зярдо кадсак обуцят?

Берянь тевть яла тейнят,

Секс ней тон арасть ялгат».

В.: Озась ёжов улавонтень,

Пелевес пачкодсть велентень.

Кудов бабантень совасть –

Од иеськак мартост сась.

Киштить нуцькат, Нумол, Овто,

Кишти ривезь бабанть марто.

Кузонть перька киштсь Кокоркась.

Весе палсесть ды кутморясть.

«Киштеде мартом» моронть коряс киштема

В:- Кузнэсь анок, шказо сась

Якшаматянть тей пачтямс.

- Якшаматясь, вант, уш арды,

Эйкакштненень казнеть канды.

Вакска сон аволь  юта?!

Серьгедьсынек тей бойка.

Весе вейсэ: - Якшаматя таго сак, шержей атя тей совак!

Якшаматясь:
Окойники монгак сынь,

Тынк ваксс эйкакш пачкодинь.

Эйкакштненень шумбра чи,

Инжетненень валдо чи!

Весеменень покш сюкпря,

Паро мельть ды уцяска!

Пиже кузнэ, мазый кузнэ тесэ мон неян.

Мазый толнэть тештекс цитнест тонь лангсо – мерян!

Якшаматясь стукади палкасонзо, весе цяпить, кузонть лангсо кирвазить толнэть.

В: - Пиже кузнэ, мазый кузнэ, вирьнесэ касыть.

Зняро кеняркс эйкакштнэнень течи тон кандыть.

Пурнавинек минь тонь перька, кундазь кедте кедьс,

Келейгады яла кирьксэсь – токи веленть пес.           М.Моторкин

- Моратанок минь тонть эйстэ моро мазыйне.

 «Ёлкасо» Е. Пятаевень  валморонть коряс  хороводной (Мордовские напевы мелодиясь)

Ёлка, ёлка, пижине,

Кодамо тон мазыйне!
Кудрявнеть тарадткеть,
Лангсот нурьгить налкшкеть.
Ацавсь ловне алгат,
Толнэть палыть лангат:
Тюжат, ожот, якстереть,
Цивтёрдыть, прок тештинеть.
Тонь лангс ваномс паро:
Тей эйкакшт састь зяро!
Киштить, весёлгалить,
Сынст вайгелест гайгить.
Вана Якшаматинесь,
Совась шержев сакалнэсь
Ды сыргась киштеме,
Морамо, налксеме.
Явшесь весеменень -
Весе эйкакштненень -
Паро – паро казнеть,
А стувтовикст, мазыйть.
Кандсь Якшаматинесь
Мельганзо морыне,

Морасть эйкакшкетне,

Мейле Од иентень
Весе сынь сюконясть

Ды поздоровт ёвтасть.

В: - Якшам атя, тон озака. Сизить нама яказь.

А эйкакште нурька морот морыть тонеть кецязь.

Нурька моронь конкурс

Вармась веленть ёнов арды,

Мартонзо лов кескав канды.

Вели, пиций толокс кишти,

 Кудотненень пацят викшни.

Каштом трубатнесэ моры,

Килей чувтотнень кутмори.

Лейпрятнень ловсо эцинзе,

Сивекссэ виртнень карксынзе.

Вармась увны, вармась ранги,

Тарадтнэсэ синди-янги.

Кие сонзэ кардасазо?

Варманть сонсь телесь патязо. Галина Жданкина.

Шумбрачи, гайгиця мором,

Шумбрачи, тиринь мастором!
Шумбрачи, вирть ды паксят.

Шумбрачи, ялгат, оят! Иван Инжуткин.    

Паро валт     С. Дмитриева
Вадря валось "Шумбрачи"

, Молицянень "Паро ки",
Удыцянень "Паро он",

- Неть валтнэнь содасыть тон?

"Инеськеть" валось вадря,

Иля стувт ёвтамс "Сюкпря".
Тон туемстэ ульть анок

Ёвтамс "Вастомазонок"

Шумбра чи теть, якшамков,

Ушосонть пек ламо лов,
Сон ашти весе пертьпелькссэнть.

Валдо чипаесь менельсэнть.

Якшаматясь эйкакштнэнень

Явши казнеть Од иентень.
Машинат, Някат, овтыне,  

А монень мик алашине. 

Якшамков, якшамков,

Ушосонть пек ламо лов,
Кудосо каштом ушттано,

Менельс кепети качамо.

Маризь Кемаль. Васень лов  

 Чинзэ стямсто монгак стинь

Ды ушов чиезь ношкстынь:

Вай, паксянок ёмасть ков?

Пертьпельганок сравтовсь лов!

 Латось – ашо, пиресь – ашо,

Чувттнэнь прява – манкань каша…

Вана мекс шержей варакась

 Исяк чокшнэ карнозь ракась!

Якшаматя.

Кенкш удало лекси телесь,

Каштомонзо ушты велесь.

Якшаматясь пувси вальмас,

Арты эйзэст кузт ды пальмат.

Сынь сиясо чиденть цитнить –

Сынст кисэ а веши питне.

Эрьва козонь венсти кедть,

Лейтнень ланга тарги сэдть.

Ламо вий атянть седейсэ,

Кельме веденть стасы эйсэ.

Сэняжантень содны кикст,

Качамосто поны пикст.

Ютыцятнень чамаст скири.

 Ёвксокс теевсь пиче виресь:

Чувттнэнь ланга сия каясь,

Ловпоровтнэс янось ваясь.

Ашо кемсэ вирев сась,

Тусто ловокс верде прась.

Кельмевтизе атясь судом.

Лембстэ уштса течи кудом.              

Якшаматя: - Кельмевтеменк мон а карман,

Морамонь кис казнеть явшан.  

Нурька моронь морамонь изницятненень Якшаматясь явши Шнамонь лопинеть

Ветицясь ёвтни содамоёвкст, содыцянтень Якшаматясь максы ламбамкат.

Атят-бабат пинге эрить-аштить,

 Зярдояк а некшныть вейкест-вейкест.

Сюпавчи весенень пурныть – таштыть.

Колмосядт кодгемень вете эйдест.  Иень шкатне ды читне.

Уськсэ керьксазь листэнзэ,

Стенас чавныть эйсэнзэ.

Од иестэ пря невти,

Омбоце иес чами. Календарь

Паксясо – ацамо, ушосо – якшамо.

Кодамо ней шкась инжекс тенек сась? Теле.

Копачизе моданть сиянь цитни ловось,

Вешкезь канды бурят… Кодамо те ковось? Ацамков

Те ковстонть, састо чиезь, ушодови эрьва иесь.

Ковось те сехте якшамо, скири сон судот ды чамат. А. Щеглов

Паксясо – якшамо, ушосо – якшамо.                                                         

Кодамо ней ковось инжекс карми само? Якшамков.

Пувить  вармат те ковстонть, увныть, вешкить, рангить.

Канды даволт ДАВОЛКОВ. Истя тензэ мерить.
Чудесь кизна тия лей, тельня сонзэ лангсо … эй

Кедтеме, пильгевтеме – тейни вальмас артовкст. Якшамо.

Ашо-ашо, теке чов, пры-певери мезе? Лов.

Менельстэ прыть тештинеть, мазыйнеть ды чевтинеть.

Кельме перть пельга сравтыть, моданть эйсэ кецявтыть. Ловтештинеть.

В.: - Ловтештинетне – тейтертне невтьсызь, кода прыть менельстэ.

«Телесь сась» моронть коряс тейтернетне невтить «Ловтештинень» киштема.

В.: - Мельс ледстясынек течи ёвксонь налксицятнень.

Вай, те мень чуда-тамаша? Кизна – сермав, тельня – ашо.

Шапка пиле, свал сорныця, эрьва кашторкссто кекшниця.

Моли-чалгавксонзо колы…Ракшанть лемезэ НУМОЛО.

Ундо потсто таргси медь, таган пильге, понав кедь.

Весе кирдить сонзэ коронть: вирсэнть ловови азорокс.

Коткудавонь пизэть яжи, чалгси сюроткак истя жо.

Лапань потязь тельня уды, покш пизэзэ-латконь кудо.

Стядо тапор-тупор чии…Ды те ОВТО, эно кие!

Ожо рунго, тюжа пуло, оно таймаскадсь киулос,

Косо вармат пансесь телесь,- пштистэ ваны веленть пелев.

Тосо атякшт рангсь-ва дивась! Те ракшантень мерить РИВЕЗЬ.

Пандо прясто эйкакшт вейсэ тельня ардтнить нурдынесэ.

Сэрей пандо прясто ливти цёрыне бойкасто.

Мезе канды эйсэнзэ? Мезе лангсо пильгензэ? Сокст.

Теленек ды кизэнек – боярава пижине.

Од иестэ инжекс сы, эйкакштнень марто кишти… Куз

В.:  - Кузонть перька аратанок, «Семеричка карть» кишттянок.

Киштемадо мейле вишка пакшатне ловныть валморынеть Якшаматянтень

Од иень поздоровт весе инжетненень.
Новольсь ташто иесь, стясь Од иень чись
Ды, прок эйкакш, чиезь Веленть куншкас лиссь.

Совась минек кудос, Валгсь столенек экшс.
Мезе тосо путозь -  А кельгстяви пекс!

Ташто ие, мерян Сюкпря теть сень кис:
Живан, ломанькс эрян -  Сован яла вийс.
Тонь каршо, Од ие, Кода эрси свал,
Кадык эрьва кие Канды кши ды сал.                    Числав Журавлев.

Од ие – од арсемат ды сехте паро мельть,

Учомат ды кемемат, бажамот иень перть.

Минек масторонь валдось неяви пек васов…

Ялгат, од ие марто! Од иень поздоровт.              Е.Пятаев

Курок  сы Од иесь. Ловнесь цитни мазый.

Якшаматясь чиезь, Туи налкшкеть каземс.

Пиже кузонть алов Ламбамушкат путы.

Марясынзе валот. Вакскават а юты.      Дмитрий Таганов

В.: - Частнэ шканть шаштыть икелев,

Школас промсь мик весе велесь.

Палы – цивтёрды ёлканок,

Од иентень весе анок.

Якшаматя, лиссть икелев,

Весе ваныть ней тонть пелев. А. Богомоловонь коряс

Якшаматя: - Эйкакшт тердян апак капша.

Пурнаводо перькан, пакшат.

Якшаматясь тененк кандсь питней,

Тантей казнень канст.

Явшан сетненень казнеть,

Кить ней тусть пек мелезэнь,

Кие эрясь валдо превсэ

Ды лезэ кандсь паро тевсэ. П.Бардинэнь коряс.

Весе пурнавить вейс, гайги «Уледе шумбрат» морось, Якшаматясь явши эйкакштненень казнеть.

Литературась: Чипайне. 2-4 классонь аволь классо ловномань книга. Анокстыцятне Храмова В.П., Ширманкина В.С., Саранск, Морд. кн. изд. 1995.

Моротне саезь: Анна Панишева - Эряк тиринь мастор- моронь дискстэ

6. Уледе шумбрат

10. Телесь сась

12. Киштеде мартом

Нина Спиркина - Самая красивая – моронь дискстэ

Эрзянь карть