Сан турында төшенчә.
презентация к уроку (3 класс)

Дәрес № 62

Тема: Сан турында төшенчә.

1.Оештыру.

- Хәерле көн, укучылар!

Чыңлады көмеш кыңгырау,
Безне дәрескә чакырып.
Татар  теле дәресен башлыйк
Урыннарга утырып.  

Дәрестә игътибарлы булыгыз  һәм яңа белемнәр алырга әзерләнегез.

2.        Шигырь уку

Саныйлар

Җыелганнар утыргычка

Гөлнаралар, Санияләр.

Мактаныша-мактаныша,

Нәрсәдер саный алар.

Синең ничәү?

Минем бишәү.

Дүртәү генә минеке.

Ә минеке авызда  - ике,

Ә кесәдә -  унике!

-Ә мин кичә энем белән

Егермене ашадым.

Ә мин бүген берүземә

Унынчыны башладым.

Баксан, кызлар көн дә шулай

Бәйрәм ясыйлар икән:

Алар шулай саный-саный

Кәнфит ашыйлар икән.

                Роберт Миннуллин.

-Ә хәзер калын хәрефләр белән бирелгән сүзләрне укыйбыз:

Бишәү, дүртәү, ике, унике, егермене, унынчыны

Бу сүзләргә сораулар куеп карыйк әле. Бу сүзләр предметнын нәрсәсен белдерә?

Бишәү, дүртәү, ике, унике, егерме,  унынчыны сүзләре предметның санын, исәбен белдерә. Ничә?  Күпме? Сорауларына җавап бирә.

Предметның санын, исәбен белдерә торган сүзләр сан дип атала. Саннар ничә? Күпме? Никадәр? Сорауларына җавап бирә.

Димәк, бүгенге дәресебезнен темасы - Сан

Ә хәзер санамышларны укып карыйк.

Бер җиләк, ике җиләк, өч җиләк, дүрт җиләк, биш җиләк, алты җиләк, җиде җиләк, сигез җиләк, тугыз җиләк, ун җиләк – кура җиләк.

Бу санамышта барлык саннар да җиләк сүзен ачыклап килгән. Күпчелек  очракта сан исемне ачыклап килә. Сан белән ачыкланган исем саналмыш дип атала.

Сан янында килгән исем һәрвакыт берлек санда була: сигез җиләк, ун җиләк.

 Бу кагыйдәләрне кабатлагыз һәм исегездә калдырыгыз. Үзегез дә саннар кергән санамыш уйлап карагыз. Йөгерешле, качышлы һәм башка шуның кебек күмәк уеннарда үзегез уйлап тапкан санамышларны да кулланыгыз.

3. Саннар безнең тормышыбызда гел очрап тора. Тормышыбызны саннардан башка күз алдына да китереп булмый.

Саннарны кайларда очратабыз?

• Сәгать циферблатында саннар бар.

• Кибет үлчәүләрендә саннар бар.

• Температураны үлчәү өчен кулланыла торган термометрларда саннар бар.

• Машина номерларында саннар була.

•  Йорт номерлары саннар ярдәмендә языла.

3. Матур язу .

Мәскәүдә бер дә юк, Казанда икәү. (а хәрефе)

4. Бирелгән җөмләләргә кирәкле саннарны өстәп язарга.

1. Безнең сыйныфта  ________  укучы.
2. ___________ сентябрьдә балалар мәктәпкә баралар.
3. ___________Май – Җиңү көне.
4. Бу күлмәк ______________сум тора.
5. Без _______________гасырда яшибез.

Саннар: ике йөз, беренче, ун, тугызынчы, егерме беренче.

5. Днамик пауза.

6.Саннарның язылышына бәйле хаталы очракларны табарга. Хаталы язылган сүзләрне дөресләп язарга.  

1. Ун ике ай сизелми дә үтеп китте.
2. Әниемә утызалты яшь.
3. Егермеөченче февраль – Ватанны саклаучылар көне.
4. Ике гасырда икейөз ел.
5. Сигез елдан миңа ун сигез тула.

Тикшерү:

1.        Унике ай сизелми дә үтеп китте.

2.        Әниемә утыз алты яшь.

3.        Егерме өченче февраль – Ватанны саклаучылар көне.

4.        Ике гасырда ике йөз ел.

5.        Сигез елдан миңа унсигез тула.

7.Өй эше: Саннар кергән санамыш уйлап язарга. Кагыйдәләрне ятларга.