"Көз бәйрәме"
методическая разработка (1 класс) по теме

ТР Әтнә  муниципаль  районы  муниципаль бюджет  белем бирү  учреждениесе

 “Күәм  урта гомуми белем бирү мәктәбе”

                        (1нче сыйныфта үткәрелгән бәйрәм кичәсе)

                                                 Сыйныф җитәкчесе : Гатауллина Г.Р.

     Октябрь,   2012 ел

  Әкрен  генә   музыка  яңгырый.  Чайковскийның  “Чәчәкләр  вальсы”  кулланыла.    Кереш  музыкага  балалар  шигырь сөйлиләр.

1 м. Әле  кайчан  гына  иде  җәй  айлары

        Үтеп  бара  алтын  көзебез.

        Көзебезне  шулай  яратканга,

        Озатабыз  зурлап  үзебез.

2 м. Тылсымлы  көз  агачларның

        Күлмәкләрен  салдыра.

        Алтын-сары  яфракларын

        Җир  өстенә   яудыра.

3 м. Алтын  яфрак  ява  сукмакларга

        Ә  җил  аны  сөеп  иркәли.

        Бу  яфраклар  чын   алтыннан  микән

        Дия-дия  уйнап  киткәли.

А.б.  Балалар,

Кем  ничектер,  мин  көзен,

Бик  еш  болытлар  каплап

Торса  да  саф  күк  йөзен,

Иссә  дә  ачы    җилләр,

Койса  да  салкын  яңгыр

Нигъмәткә  бай  алтын  көз

Ямьлерәк   күк  барыбер.

Ә   сез  көзне   яратасызмы?

Балалар:  Яратабыз!

А.б. Ә  ни  өчен?

1 б. Көзге  бакчада  алмалар

       Таң  нурыдай  аллана.

       Хәтта   ачы   баланнар

       Миләшләр  дә  баллана.

2 б. Тыгызланып  туп  кебек

        Үсеп  җитә  бәрәңге.

        Кырда,  көлдә  пешкәне

        Һай  бигрәк  инде  тәмле!

3. б. Җиз  бүкәндәй   кишер  дә,

        Табак  чаклы  кабак  та,

        Ачы  торма,  шалкан  да

        Өлгерә  көзге  якта.

4 б. Агачлардан  алтын  күк

       Сары  яфрак  коела.

       Китәр  өчен  көньякка  

       Кошлар  бергә  җыела.

5 б. Көзнең   иң  олы  бүләге –

       Икмәк  тора  табында.

       Тормышыбыз  ямьле  булыр

       Икмәк   булган  чагында.

6 б.  Менә  мин  дә  ни  өчендер,

        Яратам  елның  көзен

        Көз  бай  итә  кешене

        Булса   тырыш  һәм түзем.

  Җыр  “Без мәктәпкә барабыз!” Хор

7 б. Һәр  көз  үзенчә  килә  ул,

   Һәр  көз  үзенчә  матур.

   Елмаешеп  бер  биесәк,

   Көзне  ярату  булыр.

Күмәк бию

А.б.  Дусларым  инде  мин  сезгә  ышанам.  Сез  көзне  бик  яратасыз икән. Ничек  матур итеп  аңа булган  хисләрегезне  белдердегез.Чү,  кемдер  килә  түгелме?

(Музыка  астында   Көзсылу  керә. Кулында  кәрзин. Анда  яшелчәләр  һәм  кызыл,  сары,  яшел  яфраклар. Әкрен  генә  яфракларны  сибеп үтә.)

Көзсылу:

Исәнмесез,  нәни  дуслар,

Сезне  күреп  килдем  мин.

Матур  бәйрәмегез  икән

Җырыгыздан  белдем  мин.

А.б. Балалар,  бу  бит  Көзсылу  үзе. Безнең  яраткан  сылу  көзебез. Матур  итеп  күрешик  әле.

Балалар: Исәнме,  Көзсылу!

Көзсылу: Әле  минем  сезгә  табышмакларым  да  бар.  Ә  табышмакларның  җавабы  кәрзиндә.

(Көзсылу  табышмаклар  әйтә. Балалар  уртага  чыгып,  кәрзиннән  җавапка  туры килгән  яшелчәне  алып  күрсәтәләр.

            1)Үскәндә  яфрагын  ашыйлар,

               Үсеп  җиткәч  үзен  ашыйлар.   (суган)

            2)Йөз  кат  кием,  барысы  да  төймәсез.  (кәбестә)

           3) Җир  астында  җиз бүкән

                Ул  ни  икән?                        (бәрәңге)

           4)   Җир  астында  алтын  казык,

                  Без  аны  алдык  казып.         (кишер)

              5)   Утырабыз  урманда

                   Ап-ак  эшләпә   киеп,

                   Киптерә  дә,  кыздыра  да

                   Кешеләр  безне  җыеп.     (гөмбә)

А.б. Көзсылу,  син  безнең  балаларның  күңелен  күтәрдең. Без  дә  сиңа  күчтәнәч  әзерләдек.

 Җыр. Җәй дә рәхәт!

Көзсылу:  Зур  рәхмәт. Дусларым  әйдәгез бергәләп биеп алабыз.

“Яфраклар ”  биюе.     (Ахырдан  бер рәткә  басалар,  мәкальләр  әйтәләр.)

Игә белгән, иген  ашар.

Җирне  сөйгән,  ач  булмас.

Җир  кемнеке,  икмәк  шуныкы.

Икмәк – тормыш  нигезе.

Бала:

Бакчалардан  яшелчәләр

Бар  да җыеп  алынды.

Ә  кырлардан  амбарларга

Мул  уңышлар  салынды.

Эш  беткәч,  уйнарга  ярый,

Дип  әйтә  безнең  халык.

Әйдәгез,  дуслар,  басыгыз,

Бер  уен  уйнап  алыйк.

“Күрсәт  әле,  үскәнем”  уены.  

Көзсылу:  Бик  күңелле  уйнадыгыз. Кыю  балалар   икәнсез.

Көзсылу:  

Яшәү  чыганагы  - кояш  нурын,

Җир  җылысын  саклап  үзендә

Күкрәкләргә  терәп  кисәр  икмәк

Һәр  табынның  тора  түрендә.

Көннәрегез  булсын  аяз,  якты,

Йөзләрегез  нурлы,  сөйкемле.

Өстәлегез  тулып  торсын

Бүгенгедәй  бәйрәм  шикелле.

Балалар:  Рәхмәт  сиңа,  Көзсылу!  Без  сине бик  яратабыз,  сау  бул!

Җыр.  Көзләр  килә!

(Балалар  музыка  астында  китәләр,  Көзсылу  саубуллашып  кала.)