Дуслык белән көчле без!
классный час (2 класс) по теме

Иске Суыксу урта гомуми белем бирү мәктәбенең

 башлангыч класс укытучысы

Зарипова Р.Р.

Тема: Дуслык белән көчле без.

Максат: 1) Укучылар арасындагы үзара мөнәсәбәтләрдә дуслыкның иң  мөһим сыйфатларның берсе булуына ышаныч тәрбияләү;

 2) Матур яшәү өчен дуслаша белү сыйфатларын тәрбияләү.

Дәрес барышы.

I. Актуальләштерү. (Уку мәсьәләсен кую).

Дуслык – дөньяда иң кирәкле нәрсәләрнең берсе. Минемчә, дуслары булган кеше генә бәхетле була. Йөз сум акчаң булганчы, йөз дустың булсын, диләр. Чынлап та, дуслары булган кеше беркайчан да югалып калмый. Дуслык – бөек нәрсә ул. Чын дуслыкны тоя белергә, табарга, югалтмаска кирәк. Һәр кеше үзенең дустын аның кешелеклелек сыйфатларына, кылган эшләренә карап сайлый. Әгәр дә дустыңа ышанычыңны күрсәтсәң, үзеңнең серләреңне курыкмыйча тапшыра алсаң, иптәшең чын дуслыкка лаек. "Дусларның теле каты тоелса да, күңеле йомшак була” дигән татар халык мәкале бар. Ягъни дуслар дөрес сүзне туры итеп әйтә алалар, аларның киңәшләре алтынга тиң. Минемчә, чын дус нинди генә хәлдә дә ярдәм итәргә әзер торучы, кайгыны да, шатлыкны да уртаклашучы булырга тиеш.

Дуслык хисе кешеләр белән кешеләр, шулай ук кешеләр белән хайваннар арасында да булырга мөмкин.

Әйткәнемчә, дуслык хисе ул әле кешеләр белән хайваннар яки кошлар арасында да туарга мөмкин. Минем дә өйдә канатлы дустым – тутый кошым бар. Аның кушаматы Кеша. Кешаны туган көнемә әтием белән әнием алып бирделәр. Мин аны беренче күрүдә үк ошаттым, чөнки ул бик матур, ачык яшел төстә. Ул башта кечкенә иде, ә хәзер инде үсә. Кешаны карау, тәрбияләү – минем эш. Мин аны ашатам, читлеген чистартам. Кеша укудан кайтуымны бик зарыгып көтә. Кайткач, мин аны читлегеннән чыгарам. Ул моңа бик шатлана. Үзенең рәхмәтен сиздерә: башыма килеп кунаклый. Мин әле аны сөйләшергә дә өйрәттем. Ул: ”Кеша әйбәт! Кеша әйбәт!” – дип әйтә белә. Телевизордан музыка тавышы ишетсә, үзенчә "җырлый” башлый. Кыскасы, Кеша – минем дустым, аны мин бик яратам!

   Дуслык – кешеләр арасындагы мөнәсәбәтләрнең иң яхшысы. Бу  турыда күп шигырьләр, хикәяләр язылган. Йомгаклап, берничә шигырь юлы язып китәм.

Дус яшәргә кирәк җир йөзендә,

Дуслар кирәк һәрбер кешегә,

Дуслык булса, яшәү дә күңелле,

          Уңай була һәрбер эшең дә.

Димәк, бүгенге дәрестә сүздә шул Дуслык турында барыр. (Тема белән танышу)

II. Төп өлеш.

1) Дус – сүзен сез ничек аңлыйсыз? (Ихтияҗларның, карашларның, фикерләрнең уртаклыгына, үзара рухи якынлык, бер-береңне ихтирам итү һ.б. хисләргә нигезләнгән мөнәсәбәт).

2)  Дуслык турында нинди мәкальләр, әйтемнәр беләсез?

а) Дуслары булмаган кеше ярты гомер генә яши.

б) Дусны ашыкмыйча гына сайла, тапкач – тиз алыштырма.

в) 100 сум акчаң булганчы – 100 дустың булсын.

г) Дус авырлыкта беленер һ.б.

д) дус-акчадан кыйммәтлерәк

е) дусларын онытканнарның, үзен дә онытылар.

3) Әңгәмә

- Ни өчен акыллы кеше ахмаклар белән дуслаша алмый?

- “Акыллы белән бәхәсләшсәң – акылың артыр, сантый белән бәхәсләшсәң соңгы акылыңны да югалтырсың” дигән мәкальне сез ничек аңлыйсыз?

- “Кем арбасына утырсаң, шуның җырын җырларсың”, “Бүреләр белән яшәсәң, бүреләрчә улыйсың” мәкальләрен сез ничек аңлыйсыз?

- Чын сүзен сез ничек аңлыйсыз? (Чын дус йөз елдан соң да дус булыр).

III. Хикәяләр уку. Укучыларның фикерләрен әйттереп бетерү, тыңлау.

IV. Йомгаклау.